આજના ડિજિટલ યુગમાં, નાની એવી જિજ્ઞાસા સંતોષવી હોય કે કોઈ મોટો પ્રશ્ન ઉકેલવો હોય, લોકો તરત જ ‘ગૂગલ’ પર પહોંચી જાય છે. ગૂગલ આજે વિશ્વનું સૌથી શક્તિશાળી અને લોકપ્રિય સર્ચ એન્જિન છે, જેના પર દર સેકન્ડે લાખો લોકો અબજો પ્રશ્નો પૂછે છે. પરંતુ શું તમે ક્યારેય વિચાર્યું છે કે આ વિશાળ મશીન પર સૌથી પહેલી શોધ કઈ હતી? આ પ્રશ્ન જેટલો રસપ્રદ છે, તેટલો જ રહસ્યમય પણ છે, કારણ કે સ્વયં ગૂગલ પાસે પણ આનો કોઈ સત્તાવાર રેકોર્ડ નથી.

પ્રથમ શબ્દ શું સર્ચ કરવામાં આવ્યો હતો?

ગૂગલની સ્થાપના 1998 માં લેરી પેજ અને સેર્ગેઈ બ્રિન નામના બે દૂરદર્શી વિદ્યાર્થીઓએ સ્ટેનફોર્ડ યુનિવર્સિટીમાં કરી હતી. શરૂઆતના દિવસોમાં તેમનું મુખ્ય ધ્યાન ઇન્ટરનેટ પર વિખરાયેલી માહિતીને વ્યવસ્થિત રીતે ગોઠવવા અને તેને લોકો માટે સુલભ બનાવવા પર હતું. તે સમયે ટેકનોલોજી અને ડેટા સ્ટોરેજની મર્યાદાઓને કારણે, દરેક સર્ચનો કાયમી રેકોર્ડ રાખવો એ કંપનીની પ્રાથમિકતામાં નહોતું. પરિણામે, ગૂગલના જન્મ સમયે જે પ્રથમ શબ્દો સર્ચ કરવામાં આવ્યા હતા, તે ઇતિહાસના ગર્ભમાં ક્યાંક ખોવાઈ ગયા છે.

ગૂગલ પર પ્રથમ સર્ચ “ગેર્હાર્ડ કેસ્પર” હતું

ઈન્ટરનેટ અને સોશિયલ મીડિયા પર આ બાબતે અનેક અટકળો અને દાવાઓ કરવામાં આવે છે. કેટલાક લોકો માને છે કે ગૂગલ પર પહેલી શોધ “ગૂગલ” શબ્દ જ હતો, જ્યારે કેટલાકનું માનવું છે કે તે યુનિવર્સિટી સાથે સંબંધિત કોઈ એકેડેમિક પ્રશ્ન હતો. એક જાણીતો દાવો એવો પણ છે કે ગૂગલ પર પ્રથમ સર્ચ “ગેર્હાર્ડ કેસ્પર” હતું, જે તે સમયે સ્ટેનફોર્ડ યુનિવર્સિટીના પ્રમુખ હતા. જોકે, ગૂગલ દ્વારા આમાંથી કોઈપણ દાવાની ક્યારેય પુષ્ટિ કરવામાં આવી નથી.

આજે ગૂગલ આપણી દિનચર્યાનો અતૂટ ભાગ રહ્યો

આજે ગૂગલ આપણી દિનચર્યાનો એક અતૂટ ભાગ બની ગયું છે. શિક્ષણ, આરોગ્ય, મુસાફરીથી માંડીને જટિલ ટેકનિકલ પ્રશ્નોના જવાબો આપતું આ પ્લેટફોર્મ છેલ્લા બે દાયકામાં માહિતી શોધવાની રીતને સંપૂર્ણપણે બદલી નાખી છે. કંપનીએ શરૂઆતના વર્ષોમાં લોગ જાળવી રાખવાની કોઈ વ્યવસ્થિત સિસ્ટમ ન બનાવી હોવાથી, આ રહસ્ય કદાચ હંમેશા માટે અણઉકેલ્યું જ રહેશે. આમ, જે ગૂગલ દુનિયાના તમામ સવાલોના જવાબ આપે છે, તે પોતાની જન્મકથાના આ એક પ્રશ્નનો જવાબ કાયમ માટે ગુમાવી ચૂક્યું છે. ગૂગલની આ સફર આપણને યાદ અપાવે છે કે ઘણીવાર મોટી સફળતાઓની શરૂઆત અત્યંત સાધારણ અને ક્યારેક ઇતિહાસના પાનાઓમાંથી અદ્રશ્ય રીતે થતી હોય છે.
આ પણ વાંચોઃ શું ચોમાસામાં પણ સનસ્ક્રીન યુઝ કરવુ જોઇએ?