GST Collection January 2026 Hits ₹1.93 Lakh Crore; Net Revenue Up 7.6%
નવી દિલ્હી1 દિવસ પેહલા
- કૉપી લિંક
એપ્રિલ 2025માં સૌથી વધુ ટેક્સ કલેક્શન 2.37 લાખ કરોડ રૂપિયા થયું હતું.
જાન્યુઆરી 2026માં GST કલેક્શન 6.2% વધીને 1.93 લાખ કરોડ રૂપિયાને પાર કરી ગયું છે. 1 ફેબ્રુઆરીએ જાહેર કરાયેલા સરકારી આંકડા મુજબ, જાન્યુઆરી 2025માં આ આંકડો ₹1.82 લાખ કરોડ હતો. સપ્ટેમ્બરમાં ઘટાડવામાં આવેલા ટેક્સ દરો પછી કલેક્શન ત્રણ મહિનાથી સતત વધી રહ્યું છે.
ડોમેસ્ટિક માંગમાં મજબૂતી અને ઇમ્પોર્ટ એક્ટિવિટીમાં તેજીના કારણે ટેક્સ કલેક્શનમાં આ વધારો જોવા મળ્યો છે. જોકે, સેસ કલેક્શન અને રિફંડના મોરચે થોડી સુસ્તી રહી છે. જ્યારે, ઇમ્પોર્ટથી કુલ ₹52,253 કરોડનો ટેક્સ મળ્યો, જે ગયા વર્ષ કરતાં 10.1% વધુ છે.
એપ્રિલથી જાન્યુઆરી સુધીનું કુલ કલેક્શન ₹18.43 લાખ કરોડ થયું
નાણાકીય વર્ષ 2025-26ના શરૂઆતના 10 મહિના (એપ્રિલથી જાન્યુઆરી) નું કુલ ગ્રોસ GST કલેક્શન હવે ₹18.43 લાખ કરોડ પર પહોંચી ગયું છે. ગયા વર્ષના સમાન સમયગાળાની સરખામણીમાં તેમાં 8.3% નો વધારો નોંધાયો છે.
નિષ્ણાતોનું કહેવું છે કે ટેક્સ નિયમોના યોગ્ય પાલન (કમ્પ્લાયન્સ) અને દેશમાં વધતી વપરાશને કારણે આ આંકડો સતત મજબૂત રહ્યો છે.
નેટ રેવન્યુ ₹1.70 લાખ કરોડ રહ્યું, રિફંડ 3% ઘટ્યું
જાન્યુઆરી મહિનામાં રિફંડ એડજસ્ટ કર્યા પછી સરકારનું નેટ GST રેવન્યુ ₹1,70,719 કરોડ રહ્યું, જેમાં 7.6%નો વાર્ષિક વધારો થયો.
જ્યારે રિફંડની વાત કરીએ તો તેમાં 3.1%નો ઘટાડો આવ્યો છે અને તે ₹22,665 કરોડ રહ્યું. ઘરેલું રિફંડમાં 7.1%નો ઘટાડો થયો, જ્યારે એક્સપોર્ટ સંબંધિત રિફંડમાં 2.9%નો નજીવો વધારો જોવા મળ્યો.
હરિયાણામાં 27%નો વધારો, છત્તીસગઢમાં 23%નો ઘટાડો
ટેક્સ કલેક્શનના મામલે અલગ-અલગ રાજ્યોનું પ્રદર્શન મિશ્ર રહ્યું છે. મેન્યુફેક્ચરિંગ હબ ગણાતા રાજ્યોમાં સારો વધારો જોવા મળ્યો. હરિયાણાના GST કલેક્શનમાં સૌથી વધુ 27%નો વધારો થયો છે. જ્યારે, કેટલાક રાજ્યોના કલેક્શનમાં મોટો ઘટાડો પણ જોવા મળ્યો છે. છત્તીસગઢમાં સૌથી વધુ 23%નો ઘટાડો જોવા મળ્યો.
કેન્દ્રશાસિત પ્રદેશોમાં ચંદીગઢ અને પુડુચેરી અવ્વલ
કેન્દ્રશાસિત પ્રદેશો (UTs) માં પણ ઉતાર-ચઢાવ જોવા મળ્યો. ચંદીગઢમાં GST કલેક્શન 15% અને પુડુચેરીમાં 11% વધ્યું. તેનાથી વિપરીત, લક્ષદ્વીપ અને લદ્દાખ જેવા નાના પ્રદેશોના કલેક્શનમાં 30% સુધીનો ભારે ઘટાડો નોંધાયો. જ્યારે, દેશના મોટા રાજ્યો જેવા કે ઉત્તર પ્રદેશ (2%), દિલ્હી (3%) અને પશ્ચિમ બંગાળ (1%) માં ગ્રોથ ઘણો ધીમો રહ્યો.
કોમ્પન્સેશન સેસ 55%થી વધુ ઘટ્યો
જાન્યુઆરીમાં કોમ્પેન્સેશન સેસ કલેક્શનમાં ભારે ઘટાડો થયો છે. તે 55.6% ઘટીને ₹5,768 કરોડ રહ્યો. નિષ્ણાતોના મતે, ટ્રાન્ઝિશનલ મિકેનિઝમ (GST લાગુ થયાના શરૂઆતના વર્ષોમાં રાજ્યોને થતા નુકસાનની ભરપાઈ કરવાની વ્યવસ્થા) ધીમે ધીમે સમાપ્ત થવાને કારણે આ ઘટાડો થયો છે.
સૌથી વધુ ટેક્સ કલેક્શન એપ્રિલ 2025માં રહ્યું
સરકારે એપ્રિલ 2025માં ગુડ્સ એન્ડ સર્વિસિસ ટેક્સ (GST) માંથી 2.37 લાખ કરોડ રૂપિયા એકત્ર કર્યા હતા. વાર્ષિક ધોરણે તેમાં 12.6%નો વધારો થયો હતો. આ GST કલેક્શનનો રેકોર્ડ છે.
આ પહેલા સૌથી વધુ GST કલેક્શનનો રેકોર્ડ એપ્રિલ 2024માં બન્યો હતો. ત્યારે સરકારે 2.10 લાખ કરોડ રૂપિયા ભેગા કર્યા હતા.
ઇકોનોમીની તંદુરસ્તી દર્શાવે છે GST કલેક્શન
GST કલેક્શન એ દર્શાવે છે કે દેશની અર્થવ્યવસ્થા કેટલી સ્વસ્થ છે. જો કલેક્શન વધુ હોય, તો તેનો અર્થ એ છે કે લોકો જોરશોરથી ખરીદી કરી રહ્યા છે, ફેક્ટરીઓમાં ઉત્પાદન વધી રહ્યું છે અને લોકો પ્રામાણિકપણે ટેક્સ ભરી રહ્યા છે.
2017માં GST લાગુ કરવામાં આવ્યો હતો
સરકારે 1 જુલાઈ 2017ના રોજ દેશભરમાં GST લાગુ કર્યો હતો. ત્યારબાદ કેન્દ્ર અને રાજ્ય સરકારોના 17 કર અને 13 ઉપકરને હટાવવામાં આવ્યા હતા.
latest video
news via inbox
Subscribe for the latest updates, promotions, and ads.
