ઇન્ટરનેશનલ મોનેટરી ફંડ (IMF) એ સોમવારે નાણાકીય વર્ષ 2025-26 માટે ભારતના GDP વૃદ્ધિના અંદાજને 0.7% વધારીને 7.3 ટકા કર્યો છે. આ પહેલા ઓક્ટોબરમાં IMF એ તેના 6.6% રહેવાનો અંદાજ લગાવ્યો હતો. IMF એ તેના વર્લ્ડ ઇકોનોમિક આઉટલુક રિપોર્ટમાં જણાવ્યું છે કે ભારતમાં વિકાસ દર અપેક્ષા કરતાં ઘણો સારો રહ્યો છે. ખાસ કરીને નાણાકીય વર્ષ 2025-26 ના ત્રીજા અને ચોથા ક્વાર્ટરમાં ભારતીય અર્થતંત્રએ મજબૂત પકડ દર્શાવી છે, જેની અસર આખા વર્ષના આંકડાઓ પર દેખાશે. 2026-27 માટે પણ અંદાજ વધાર્યો IMF એ માત્ર આ વર્ષ માટે જ નહીં, પરંતુ આગામી નાણાકીય વર્ષ માટે પણ વૃદ્ધિનો અંદાજ વધાર્યો છે. 1 એપ્રિલ 2026 થી શરૂ થતા નાણાકીય વર્ષ 2026-27 માટે ભારતના GDP વૃદ્ધિનો અંદાજ 6.2% થી વધારીને 6.4 ટકા કરવામાં આવ્યો છે. જોકે, સંસ્થાનું એમ પણ કહેવું છે કે 2027-28 સુધીમાં વૃદ્ધિ ફરીથી 6.4% ની આસપાસ સ્થિર થઈ શકે છે, કારણ કે અમુક સમય માટે અસર દર્શાવતા ‘ટેમ્પરરી ફેક્ટર્સ’ (અસ્થાયી પરિબળો) ની અસર ત્યાં સુધીમાં ઓછી થઈ જશે. સરકારી આંકડાઓમાં પણ મજબૂતી દેખાઈ રહી છે ભારતના આંકડા મંત્રાલયના ‘ફર્સ્ટ એડવાન્સ એસ્ટીમેટ’ મુજબ, ચાલુ નાણાકીય વર્ષમાં ભારતીય અર્થતંત્ર 7.4% ના દરે વૃદ્ધિ કરી શકે છે. પાછલા નાણાકીય વર્ષ 2024-25માં આ દર 6.5% રહ્યો હતો. જુલાઈ-સપ્ટેમ્બર 2025 ના ક્વાર્ટરમાં ભારતનો વિકાસ દર 8.2% નોંધાયો હતો, જ્યારે એપ્રિલ-સપ્ટેમ્બરના પ્રથમ છ મહિનામાં સરેરાશ વૃદ્ધિ 8% રહી છે. આ દર્શાવે છે કે મેન્યુફેક્ચરિંગ અને સર્વિસ સેક્ટરમાં તેજી યથાવત છે. મોંઘવારીમાંથી પણ મળશે રાહત IMF એ મોંઘવારી અંગે સકારાત્મક વલણ દર્શાવ્યું છે. રિપોર્ટ મુજબ, 2025 માં ખાદ્યપદાર્થોની કિંમતોમાં ઘટાડો થવાથી મોંઘવારી દર ઘટશે. ભારતમાં રિઝર્વ બેંક (RBI) એ રિટેલ મોંઘવારી એટલે કે કન્ઝ્યુમર પ્રાઇસ ઇન્ડેક્સ (CPI) ને 4% પર રાખવાનું લક્ષ્ય નક્કી કર્યું છે. તેમાં 2% ઉપર કે નીચેની છૂટછાટ રાખવામાં આવી છે. IMF નો અંદાજ છે કે આવનારા સમયમાં મોંઘવારી દર આ ટાર્ગેટ રેન્જની અંદર જ રહેશે. ઇમર્જિંગ માર્કેટમાં ભારતનો દબદબો IMF મુજબ, ઉભરતા બજારો અને વિકાસશીલ દેશોમાં સરેરાશ વૃદ્ધિ 4% થી ઉપર રહેશે. તેમાં ભારત સૌથી ઝડપથી વિકસતી મુખ્ય અર્થવ્યવસ્થા બની રહ્યું છે. ભારતની આ વૃદ્ધિ ઘરેલું માગ અને સરકારી ખર્ચમાં તેજીને કારણે છે.