“ઇન્ડિયા એઆઈ ઇમ્પેક્ટ સમિટ 2026” વિશ્વના સૌથી મોટા ટેકનોલોજી કાર્યક્રમોમાંનો એક, આજે 16 ફેબ્રુઆરીના રોજ ભારતમાં શરૂ થયો. વડાપ્રધાન નરેન્દ્ર મોદીએ તેનું ઔપચારિક ઉદ્ઘાટન કર્યું. ત્યારબાદ તેમણે ભાગ લેનારા સ્ટાર્ટઅપ્સના પેવેલિયનની મુલાકાત લીધી અને તેમની નવીનતાઓ વિશે જાણકારી લીધી.

આ કાર્યક્રમ 20 ફેબ્રુઆરી સુધી નવી દિલ્હીના ભારત મંડપમ ખાતે ચાલુ રહેશે. સમિટની સાથે “ઇન્ડિયા એઆઈ ઇમ્પેક્ટ એક્સ્પો 2026″નું પણ આયોજન કરવામાં આવી રહ્યું છે. વિશ્વભરની કંપનીઓ તેમના નવીનતમ એઆઈ સોલ્યુશન્સનું પ્રદર્શન કરશે.

જનતા વાસ્તવિક જીવનમાં એઆઈ કેવી રીતે કાર્ય કરે છે અને તે કૃષિ, આરોગ્યસંભાળ અને શિક્ષણ જેવા ક્ષેત્રોમાં ભવિષ્યમાં કેવા ફેરફારો લાવશે તે જોઈ શકશે.

PM મોદી બોલ્યા- દુનિયાભરમાંથી આવેલા લોકોનું સ્વાગત

સોશિયલ મીડિયા પ્લેટફોર્મ X પર એક પોસ્ટમાં PM મોદીએ લખ્યું કે, આજથી દિલ્હીના ભારત મંડપમમાં ઇન્ડિયા ‘AI ઇમ્પેક્ટ સમિટ’ શરૂ થઈ રહી છે. હું આ સમિટમાં ભાગ લેવા આવેલા દુનિયાભરના નેતાઓ, મોટા બિઝનેસમેન, ઇનોવેટર્સ, પોલિસી બનાવનારાઓ, રિસર્ચર્સ અને ટેક્નોલોજીના જાણકારોનું દિલથી સ્વાગત કરું છું.

આ સમિટની થીમ ‘સર્વજન હિતાય, સર્વજન સુખાય’ એટલે કે ‘સૌનું ભલું અને સૌની ખુશી’ છે. આ માનવતાની પ્રગતિ માટે આર્ટિફિશિયલ ઇન્ટેલિજન્સ (AI)નો ઉપયોગ કરવાના આપણા સહિયારા સંકલ્પને દર્શાવે છે.

સામાન્ય લોકો માટે સમિટમાં આ 5 વસ્તુઓ ખાસ હશે

• AI ઇમ્પેક્ટ એક્સ્પો: 70,000 ચોરસ મીટરથી વધુ મોટા વિસ્તારમાં એક મેગા પ્રદર્શન યોજાશે. તેમાં 30થી વધુ દેશોની 300+ કંપનીઓ તેમના AI ગેજેટ્સ અને ટેકનોલોજી પ્રદર્શિત કરશે. સામાન્ય લોકો જોઈ શકશે કે AI વાસ્તવિક જીવનમાં કેવી રીતે કાર્ય કરે છે.
• શિક્ષણ અને કૌશલ્ય વિકાસ: વિદ્યાર્થીઓ અને યુવાનો માટે ‘YUVAi’ અને ‘AI for ALL’ જેવા કાર્યક્રમો યોજાશે. આના દ્વારા લોકો શીખી શકશે કે AI ટૂલ્સનો ઉપયોગ તેમના અભ્યાસ અને કારકિર્દીને સુધારવા માટે કેવી રીતે કરવો.
• રોજિંદી સમસ્યાઓ પર ધ્યાન: એક્સ્પોમાં એવા AI મોડલ્સનું ડેમો હશે જે ખેતીમાં પાકની બીમારી ઓળખવામાં, હોસ્પિટલોમાં વધુ સારી સારવાર કરવામાં અને ભાષા અનુવાદને સરળ બનાવવામાં મદદ કરે છે.
• સ્ટાર્ટઅપ્સ લીડર્સ સાથે મુલાકાત: દેશ-વિદેશના સ્ટાર્ટઅપ્સ પોતાના અનોખા પ્રોડક્ટ્સ રજૂ કરશે. સામાન્ય લોકો આ ઇનોવેટર્સ સાથે સીધી વાત કરી શકશે અને સમજી શકશે કે ભવિષ્યની ટેકનોલોજી કેવી હશે.
• એક્સપિરિયન્સ ઝોન: સમિટમાં ઘણા ‘થીમેટિક પેવેલિયન’ બનાવવામાં આવ્યા છે. અહીં લોકો પોતે AI પાવર્ડ મશીનો અને સોફ્ટવેરનો અનુભવ લઈ શકશે, જેમ કે સ્માર્ટ હેલ્થ મોનિટરિંગ અને AI ટ્યુટર.

સુંદર પિચાઈ, સેમ ઓલ્ટમેન અને મુકેશ અંબાણી સહિત 40+ CEO

• સમિટમાં 100થી વધુ દેશો ભાગ લે તેવી અપેક્ષા છે. તેમાં ફ્રાન્સના રાષ્ટ્રપતિ ઇમેન્યુઅલ મેક્રોન અને બ્રાઝિલના રાષ્ટ્રપતિ લુલા ડી સિલ્વા સહિત 15-20 દેશોના રાષ્ટ્રાધ્યક્ષો અને 50થી વધુ મંત્રીઓ સામેલ થશે.
• વિશ્વની અગ્રણી ગ્લોબલ અને ભારતીય ટેક કંપનીઓના 40થી વધુ CEO પણ સમિટમાં ભાગ લે તેવી અપેક્ષા છે. ગૂગલના CEO સુંદર પિચાઈ, OpenAIના સેમ ઓલ્ટમેન, Nvidiaના જેન્સન હુઆંગ અને માઈક્રોસોફ્ટ-ગૂગલના અન્ય મોટા નામો તેમાં ભાગ લેશે.
• રિલાયન્સ ઇન્ડસ્ટ્રીઝના ચેરમેન મુકેશ અંબાણી, ટાટા સન્સના એન. ચંદ્રશેખરન, ઇન્ફોસિસના નંદન નીલેકણી, ભારતી એન્ટરપ્રાઇઝિસના સુનીલ ભારતી મિત્તલ, TCSના CEO કે. કૃતિવાસન અને HCL ટેકના રોશની નાદર મલ્હોત્રા પણ સામેલ થશે.

5 દિવસનું પૂરું શેડ્યૂલ: 19મીએ પીએમ મોદી CEOs સાથે મીટિંગ કરશે

• 16 ફેબ્રુઆરી (સોમવાર): સમિટના પહેલા દિવસની શરૂઆત નિષ્ણાતો અને નીતિ નિર્માતાઓ વચ્ચે ‘રાઉન્ડટેબલ’ ચર્ચાઓથી થશે. આ જ દિવસે સાંજે 5 વાગ્યે વડાપ્રધાન નરેન્દ્ર મોદી ‘ઇન્ડિયા AI એક્સપો’નું ઉદ્ઘાટન કરશે. અહીં 300 થી વધુ ભારતીય અને વિદેશી સ્ટાર્ટઅપ્સ તેમના એવા ગેજેટ્સ પ્રદર્શિત કરશે જે AI ની મદદથી ચાલે છે.
• 17 ફેબ્રુઆરી (મંગળવાર): બીજા દિવસનું સંપૂર્ણ ધ્યાન એવા ક્ષેત્રો પર રહેશે જેનો સામાન્ય માણસના જીવન સાથે સીધો સંબંધ છે. સરકાર ખેતી, આરોગ્ય, શિક્ષણ, ઊર્જા, લિંગ સશક્તિકરણ અને દિવ્યાંગોની મદદ માટે 6 વિશેષ સંશોધન પુસ્તકો લોન્ચ કરશે. આ પુસ્તકો જણાવશે કે કેવી રીતે AI ની મદદથી આ ક્ષેત્રોમાં મોટા ફેરફારો લાવી શકાય છે.
• 18 ફેબ્રુઆરી (બુધવાર): દુનિયાના ટોચના વૈજ્ઞાનિકો, સંશોધકો અને થિંક ટેન્ક પોતાની ‘કટિંગ-એજ’ રિસર્ચ દુનિયા સમક્ષ રજૂ કરશે. ટેક કંપનીઓ અને સ્ટાર્ટઅપ્સ ડેમો આપીને બતાવશે કે તેમની AI ટેકનોલોજી ખરેખર કેવી રીતે કામ કરે છે અને ભવિષ્યની મશીનો કેવી હશે.
• 19 ફેબ્રુઆરી (ગુરુવાર): પીએમ મોદી સત્તાવાર રીતે ઉદ્ઘાટન સમારોહને સંબોધિત કરશે. સુંદર પિચાઈ, સેમ ઓલ્ટમેન અને બિલ ગેટ્સ જેવા 100 થી વધુ ગ્લોબલ દિગ્ગજો પીએમ મોદી સાથે એક મેજ પર બેસશે. આમાં ભારતમાં AI સેક્ટરમાં મોટા રોકાણ અને વ્યૂહાત્મક ભાગીદારી પર મહત્વપૂર્ણ નિર્ણયો લેવાશે.
• 20 ફેબ્રુઆરી (શુક્રવાર): GPAI કાઉન્સિલની મીટિંગ યોજાશે. સભ્ય દેશોના પ્રતિનિધિઓ એકસાથે બેસશે જેથી AI ને સુરક્ષિત અને ભરોસાપાત્ર બનાવી શકાય.

વિદેશ મંત્રાલયના વીડિયોમાં જુઓ સમિટની માહિતી

7 ચક્રો અને 3 સૂત્રો પર આધારિત છે આખી સમિટ

આ વખતની ચર્ચાઓને 7 ‘ચક્રો’માં વહેંચવામાં આવી છે, જેમાં હ્યુમન કેપિટલ, સામાજિક સશક્તિકરણ માટે સમાવેશ, સુરક્ષિત અને ભરોસાપાત્ર AI, ઇનોવેશન, સાયન્સ, AI રિસોર્સિસનું લોકશાહીકરણ અને આર્થિક વિકાસનો સમાવેશ થાય છે. સમિટની સંપૂર્ણ રૂપરેખા ત્રણ ‘સૂત્રો’ પર આધારિત છે.

• લોકો: AI નો ઉપયોગ માનવીય પ્રગતિ અને સાંસ્કૃતિક વિવિધતાના સન્માન માટે કરવો.
• ગ્રહ: જવાબદારીપૂર્વક ઇનોવેશનને પ્રોત્સાહન આપવું.
• પ્રગતિ: AI ને સમાવેશી વિકાસનું એન્જિન બનાવવું જેથી સૌને સમાન તકો મળે.

દિવ્ય ભાસ્કરને Google પર મનપસંદ સોર્સ બનાવો