અમેરિકા-ભારત ટ્રેડ ડીલે ભારતીય શેરબજારમાં ઉત્સાહનો માહોલ લાવી દીધો છે. નિફ્ટી અને બેન્ક નિફ્ટીએ રેકોર્ડ છલાંગ લગાવી, જોકે ભારે ઉતાર-ચઢાવ અને નફાખોરીએ રોકાણકારોની ધડકનો પણ વધારી. તેમ છતાં, બજાર 2.5 ટકાથી વધુના વધારા સાથે બંધ થવામાં સફળ રહ્યું. સેન્સેક્સ 2072 અંક અને નિફ્ટી 639 અંક વધીને બંધ થયા. કારોબાર દરમિયાન સેન્સેક્સ 85,871ની સર્વોચ્ચ સપાટીએ પહોંચી ગયો હતો. અદાણી પોર્ટ્સ 9.12 ટકાના વધારા સાથે ટોપ ગેઇનર રહ્યો. નિફ્ટી 2.53 ટકા ઉછળીને 25,700ની ઉપર બંધ થયો. બેન્ક નિફ્ટીએ 61,765નો નવો ઓલ-ટાઇમ હાઇ બનાવ્યો.

નિષ્ણાતોનું માનવું છે કે ફી ઘટવાથી નિકાસ સસ્તી થશે, જેનાથી ભારતીય કંપનીઓના નફામાં મોટો વધારો થવાની અપેક્ષા છે. આનાથી અમેરિકાને નિકાસ કરતી કંપનીઓનો ખર્ચ હવે 7% ઓછો થઈ જશે. જિયોજીત ઇન્વેસ્ટમેન્ટના રિસર્ચ હેડ વિનોદ નાયરના મતે, ભારત અને અમેરિકા વચ્ચે થયેલી આ ડીલ બજાર માટે એક ‘સેન્ટિમેન્ટ બૂસ્ટર’ છે, પરંતુ રોકાણકારોને હજુ પણ ‘સ્ટોક સ્પેસિફિક’ રહેવાની જરૂર છે. તેજી જોઈને પૈસા ન લગાવો. ડિસેમ્બર 2026 સુધીમાં નિફ્ટી-50 માટે 29,150નો લક્ષ્યાંક રાખવામાં આવ્યો છે. જોકે, તેમને આશા છે કે નિફ્ટી વાર્ષિક ધોરણે 10%થી 15% નું વળતર આપી શકે છે.

વૈશ્વિક કંપનીઓ હવે ચીનના વિકલ્પ તરીકે ભારતમાં રોકાણ વધારશે

બર્નસ્ટીન, નોમુરા અને જેફરીઝ જેવા વૈશ્વિક દિગ્ગજ બ્રોકરેજે ટ્રેડ ડીલને ભારતીય બજાર માટે ‘ગેમ-ચેન્જર’ ગણાવી છે. તેમના મતે, અમેરિકાને નિકાસ કરતી ભારતીય કંપનીઓનો ખર્ચ ઘટશે અને નફો વધશે. નોમુરા અનુસાર, અનિશ્ચિતતા સમાપ્ત થવાથી હવે વૈશ્વિક કંપનીઓ ચીનના વિકલ્પ તરીકે ભારતમાં રોકાણ વધારશે.

સેન્ટિમેન્ટ-ફંડામેન્ટલ મજબૂત, પરંતુ ઘટાડામાં ખરીદીની રણનીતિ અપનાવો

માર્કેટ એનાલિસ્ટ અંબરીશ બાલિગા અનુસાર, ટ્રેડ ડીલથી ખુલ્લા નિકાસના બંધ રસ્તાઓ, હવે ‘સેન્ટિમેન્ટ’ અને ‘ફંડામેન્ટલ’ બંને મજબૂત. ભારત-અમેરિકા ટ્રેડ ડીલની બજાર પર અસર ફક્ત ‘સેન્ટિમેન્ટલ’ નથી, પરંતુ તેની પાછળ મજબૂત ફંડામેન્ટલ કારણો પણ છે. જેમ કે ડીલથી લાભ મેળવનારા સેક્ટર્સ ઘણા ચાલી ચૂક્યા છે, તેથી તરત જ તેમાં ખરીદી ન કરો. થોડા દિવસો સુધી બજારના ‘કન્સોલિડેટ’ (સ્થિર) થવાની રાહ જુઓ. જ્યારે થોડો ઘટાડો કે કરેક્શન આવે, ત્યારે આ સેક્ટર્સમાં લાંબા ગાળા માટે રોકાણ કરવું યોગ્ય રહેશે.