દેશની 5 મોટી કાર કંપનીઓ આગામી 5-6 વર્ષમાં ઉત્પાદન વધારશે.

દેશની પાંચ મોટી કાર કંપનીઓ આગામી 5-6 વર્ષમાં લગભગ 1 લાખ કરોડ રૂપિયાનું રોકાણ કરીને ઉત્પાદન ક્ષમતા 65% સુધી વધારવા જઈ રહી છે. આનાથી કારનું વાર્ષિક પ્રોડક્શન 55 લાખથી વધીને 90 લાખ સુધી પહોંચી શકે છે. વધતી માંગ વચ્ચે આનાથી સપ્લાય વધશે, નવા મોડલ આવશે અને લોકપ્રિય મોડલ માટે રાહ જોવાનો સમયગાળો ઘટી શકે છે.

દેશની મોટી ઓટોમોબાઈલ કંપનીઓ મારુતિ સુઝુકી ઇન્ડિયા, ટોયોટા કિર્લોસ્કર મોટર, મહિન્દ્રા એન્ડ મહિન્દ્રા, ટાટા મોટર્સ અને JSW MG મોટર ઇન્ડિયાએ આક્રમક વિસ્તરણની યોજના બનાવી છે. આ અંતર્ગત મોટા પાયે રોકાણ કરીને નવા કારખાના ખોલવામાં આવશે. SUV, EV અને હાઇબ્રિડ ટેકનોલોજી પર ભાર મૂકવામાં આવશે. આનો અર્થ એ છે કે આગામી વર્ષોમાં સ્પર્ધા વધશે. પરિણામે, હાલની સરખામણીમાં ઓછી કિંમતે વધુ સારા ફીચર્સવાળી કાર બજારમાં આવી શકે છે.

ક્ષમતા વિસ્તરણની હરીફાઈ: નવી ફેક્ટરીઓ, મોડલ, ટેકનોલોજી પર ફોકસ

મારુતિ સુઝુકી: 35,000 કરોડ રૂપિયાનું નવું રોકાણ

કંપની હાલમાં વાર્ષિક 26 લાખ કાર બનાવી શકે છે. 2027 થી 2030ની વચ્ચે વધારાની 15 લાખ કારની ઉત્પાદન ક્ષમતા ઉમેરશે. ગુજરાતના ગાંધીનગરમાં વાર્ષિક 10 લાખ કારનો નવો મોટો પ્લાન્ટ લાગશે. વધતી સ્પર્ધા વચ્ચે કંપની બજાર હિસ્સેદારી બચાવવા માંગે છે.

ટોયોટા કિર્લોસ્કર મોટર: ક્ષમતા બમણી કરશે

ટોયોટા કિર્લોસ્કર મોટર ઉત્પાદન ક્ષમતા બમણી કરીને વાર્ષિક 10 લાખ કાર સુધી પહોંચાડવા જઈ રહી છે. બિદાદી (કર્ણાટક) પ્લાન્ટનું વિસ્તરણ કરશે. મહારાષ્ટ્રના છત્રપતિ સંભાજીનગરમાં નવું મોટું કારખાનું સ્થાપશે. આનાથી ફોર્ચ્યુનર, ઇનોવા જેવા મોડલની લાંબી વેઇટિંગ ઘટશે.

મહિન્દ્રા એન્ડ મહિન્દ્રા: વાર્ષિક ઉત્પાદન 7.4 લાખ વધારશે

કંપની નાગપુરમાં 5 લાખ અને ચાકણમાં 2.4 લાખ યુનિટની નવી સુવિધા ઉમેરશે. હાલમાં ઉત્પાદન ક્ષમતા વાર્ષિક 7.74 લાખ કારની છે. 2030 સુધીમાં તેને 15 લાખથી ઉપર લઈ જવાનું લક્ષ્ય છે. 2027 માં આવનારી કોમ્પેક્ટ SUV રેન્જ માટે આ જરૂરી છે.

ટાટા મોટર્સ નવી EV, SUV લોન્ચ કરશે

કંપની તમિલનાડુમાં નવો પ્લાન્ટ સ્થાપશે. જેમાં 9,000 કરોડ રૂપિયાનું રોકાણ થશે અને વાર્ષિક 2.5 લાખ કારોનું ઉત્પાદન થશે. વર્તમાન ફેક્ટરીઓ વાર્ષિક 8.5 લાખ સુધીની કારોનું ઉત્પાદન કરી રહી છે. કંપની ઇલેક્ટ્રિક કારો અને SUVના નવા મોડલ પર ધ્યાન કેન્દ્રિત કરશે. નવા મોડલ લોન્ચ કરશે.

એમજી મોટર ક્ષમતા ત્રણ ગણી કરશે

જેએસડબ્લ્યુ એમજી મોટર ઇન્ડિયા 4,000 કરોડ રૂપિયાના રોકાણ સાથે ક્ષમતા લગભગ ત્રણ ગણી કરીને વાર્ષિક 3 લાખ કારો સુધી પહોંચાડશે. કંપની પ્લગ-ઇન હાઇબ્રિડ અને ઇલેક્ટ્રિક કારોના નવા મોડલ બજારમાં ઉતારવા પર ફોકસ કરી રહી છે.

આક્રમક વિસ્તરણની જરૂરિયાત શા માટે પડી

– GSTના માળખામાં ફેરફાર અને ઘટાડાથી ટેક્સ વ્યવસ્થા હવે સંપૂર્ણપણે સ્પષ્ટ થઈ ગઈ છે. પહેલા ટેક્સના મામલે અનિશ્ચિતતા હતી, પરંતુ હવે કંપનીઓ લાંબા ગાળાનું આયોજન કરી શકે છે.

– માંગ સતત વધી રહી છે. આગામી વર્ષોમાં પણ લગભગ આ જ સ્થિતિ રહેશે. વાહન ડીલરોના સંગઠન ફાડાના પ્રેસિડેન્ટ સીએસ વિગ્નેશ્વરે જણાવ્યું કે GSTમાં ઘટાડો ઘણા વર્ષો સુધી માંગને મજબૂત રાખશે. ઘરેલું, વિદેશી બજારોમાં મજબૂત માંગ સૌથી મોટું આકર્ષણ.

– 2025માં રેકોર્ડ 45.30 લાખ કારોનું વેચાણ થયું.

– ઘરેલું બજારમાં વાર્ષિક વેચાણ 7.3% વધ્યું, ઇલેક્ટ્રિક વાહનોનું રજીસ્ટ્રેશન 17% વધ્યું

– વાહનોની નિકાસમાં 19.2%નો જબરદસ્ત વધારો થયો.

દિવ્ય ભાસ્કરને Google પર મનપસંદ સોર્સ બનાવો