દેશની સૌથી મોટી એરલાઇન ઇન્ડિગો મોટા પાયે પાઇલટોની ભરતી કરવાની તૈયારીમાં છે. કંપની 1,000થી વધુ પાઇલટોની નિમણૂક કરશે. આ ભારતીય ઉડ્ડયન ક્ષેત્રમાં કોઈપણ એરલાઇન દ્વારા કરવામાં આવતી સૌથી મોટી ભરતી ઝુંબેશમાંની એક છે.

આ નિર્ણય ગયા વર્ષે ડિસેમ્બરમાં આવેલી ઓપરેશનલ મુશ્કેલીઓ પછી લેવામાં આવ્યો છે, જ્યારે ક્રૂની અછતને કારણે માત્ર 7 દિવસમાં 5,000થી વધુ ફ્લાઇટ્સ રદ કરવી પડી હતી.

ટ્રેઇનીથી લઈને કેપ્ટન સુધીના પદો પર ભરતી થશે

મીડિયા રિપોર્ટ્સ અનુસાર, ઇન્ડિગોની આ ભરતી પ્રક્રિયામાં ટ્રેઇની ફર્સ્ટ ઓફિસર, સિનિયર ફર્સ્ટ ઓફિસર અને કેપ્ટનના પદોનો સમાવેશ થાય છે. કંપની તેના વિસ્તરણ અને રેગ્યુલેટરી જરૂરિયાતોને પૂરી કરવા માટે આ પગલું ભરી રહી છે.

દર મહિને 4 નવા વિમાન સામેલ થઈ રહ્યા છે

ઇન્ડિગો દર મહિને કાફલામાં 4 નવા વિમાન ઉમેરશે. તેમને ઉડાડવા માટે નવા પાઇલટ્સની જરૂર છે. કંપની દર મહિને 20 થી 25 ફર્સ્ટ ઓફિસરને પ્રમોટ કરીને કેપ્ટન બનાવી રહી છે. એક ટ્રેની ઓફિસરને તૈયાર થવામાં 6 મહિના લાગે છે. કેપ્ટન બનવા માટે 1,500 કલાક ઉડાનનો અનુભવ જરૂરી છે. કંપની આ ધોરણોને કડક કરી રહી છે.

ડીજીસીએના નિયમોનું પાલન એક પડકાર છે

નિયમો મુજબ, દરેક વિમાન માટે પાઇલટ્સના ત્રણ સેટ (એક કેપ્ટન અને એક ફર્સ્ટ ઓફિસર) હોવા જરૂરી છે. પરંતુ ઇન્ડિગોના વિમાનોનો ઉપયોગ ખૂબ વધારે થાય છે, તેથી તેને ધોરણ કરતાં બમણા પાઇલટ્સની જરૂર પડે છે.

તપાસમાં જાણવા મળ્યું હતું કે કંપનીને 2,422 કેપ્ટનની જરૂર હતી, પરંતુ તે સમયે તેની પાસે ફક્ત 2,357 કેપ્ટન જ હાજર હતા. સંકટને જોતા ડીજીસીએએ 10 ફેબ્રુઆરી સુધી નાઇટ ડ્યુટીના નિયમોમાં કેટલીક હંગામી છૂટ આપી હતી.

ડિસેમ્બરમાં શા માટે સંકટ આવ્યું હતું

ડિસેમ્બરમાં પાઇલટોના આરામના નવા નિયમો લાગુ થયા હતા. આ અંતર્ગત રાત્રે 12 વાગ્યાથી સવારે 6 વાગ્યાની વચ્ચે લેન્ડિંગની સંખ્યા મર્યાદિત કરી દેવામાં આવી હતી અને સાપ્તાહિક આરામનો સમય વધારી દેવામાં આવ્યો હતો.

DGCAની તપાસમાં સામે આવ્યું કે ઇન્ડિગોએ નવા નિયમો મુજબ પૂરતી ભરતીઓ કરી ન હતી અને ન તો ટ્રેનિંગની ગતિ વધારી હતી. આ કારણે પાઇલટો પર કામનો બોજ વધી ગયો અને મોટી સંખ્યામાં ફ્લાઇટ્સ રદ થઈ.

દિવ્ય ભાસ્કરને Google પર મનપસંદ સોર્સ બનાવો