IPLની ચમક જેટલી મોટી છે, તેટલી જ નિર્દય પણ છે. અહીં એક જ સીઝનમાં કરોડો કમાતા ખેલાડીઓની કિંમત આવતા વર્ષે જમીન પર આવી શકે છે. તાજેતરમાં લખનઉ સુપર જાયન્ટ્સ છોડીને દિલ્હી કેપિટલ્સ સાથે જોડાયેલા રિષભ પંતના વાર્ષિક પગારમાં 12 કરોડ રૂપિયાનો મોટો ઘટાડો થયો છે. લીગ ઇતિહાસના સૌથી મોંઘા ખેલાડી 27 કરોડ રૂપિયાના પંત માત્ર 15 કરોડ રૂપિયામાં દિલ્હી માટે રમશે. જોકે, પંત એકમાત્ર એવા ખેલાડી નથી, જેમની સેલરીમાં આટલો મોટો ઘટાડો જોવા મળ્યો છે. આ પહેલા પણ ઘણા ખેલાડીઓને પોતાની IPL સેલરીમાં મોટો ઘટાડો સહન કરવો પડ્યો છે. ચાલો આવા જ પાંચ ખેલાડીઓ વિશે જાણીએ- વેંકટેશ અય્યર – ઓક્શનમાં થયું હતું 17 કરોડ રૂપિયાનું નુકસાન
વર્ષ 2025માં કોલકાતા નાઈટ રાઈડર્સે ઓલરાઉન્ડર વેંકટેશ અય્યરને 23.75 કરોડ રૂપિયામાં ખરીદ્યો હતો. પરંતુ એક સીઝન પછી જ તેને રિલીઝ કરી દીધો. મિની ઓક્શનમાં રોયલ ચેલેન્જર્સ બેંગલુરુએ તેને માત્ર 7 કરોડ રૂપિયામાં ખરીદ્યો. એટલે કે કિંમતમાં લગભગ 17 કરોડ રૂપિયાનો મોટો ઘટાડો આવ્યો. ઝાય રિચર્ડસન- ઈજાએ કરોડોની રમત બગાડી વર્ષ 2021માં પંજાબ કિંગ્સે વિશ્વાસ વ્યક્ત કરીને 14 કરોડ રૂપિયાની મોટી રકમ ખર્ચી હતી. પરંતુ ઈજા અને સતત અનુપલબ્ધતાની અસર તેની કિંમત પર પડી. 2023ના ઓક્શનમાં મુંબઈ ઈન્ડિયન્સે તેને માત્ર 1.5 કરોડ રૂપિયામાં ખરીદ્યા. કમનસીબે, આ ઓસ્ટ્રેલિયન પેસર તે સીઝનમાં પણ ઈજાને કારણે કોઈ મેચ રમી શક્યો નહીં. મિચેલ સ્ટાર્ક- ચેમ્પિયન બનાવ્યા પછી પણ કિંમત અડધી થઈ ગઈ ઓસ્ટ્રેલિયન દિગ્ગજ મિચેલ સ્ટાર્કને 2024માં કોલકાતા નાઈટ રાઈડર્સે 24.75 કરોડ રૂપિયા આપીને IPLનો સૌથી મોંઘો ખેલાડી બનાવ્યો હતો. સ્ટાર્કે પ્લેઑફમાં 5 વિકેટ ઝડપી અને ખિતાબ જીતાડ્યો. આમ છતાં, આગામી ઓક્શનમાં દિલ્હીએ તેને માત્ર 11.75 કરોડમાં ટીમમાં સામેલ કર્યો. જેમિસન- કોવિડને કારણે 15 કરોડથી બેઝ પ્રાઈસ પર પહોંચ્યો ન્યુઝીલેન્ડના લાંબા કદના ઝડપી બોલર કાઈલ જેમિસન પર 2021માં RCBએ 15 કરોડ રૂપિયાની બોલી લગાવી. ત્યારબાદ કોવિડને કારણે તેણે 2022ની સીઝનમાંથી નામ પાછું ખેંચી લીધું. જ્યારે તે 2023ની ઓક્શનમાં પરત ફર્યો, ત્યારે ચેન્નઈએ તેને તેની બેઝ પ્રાઈસ એટલે કે 1 કરોડ રૂપિયામાં ખરીદ્યો. સેમ કરન- એક વર્ષમાં 87% ઘટી વેલ્યુ, મેચ પણ 5 જ રમ્યો
ઇંગ્લેન્ડના ઓલરાઉન્ડર સેમ કરનને પંજાબ કિંગ્સે 2024માં 18.5 કરોડમાં જોડ્યો હતો. તેણે 270 રન બનાવ્યા અને 16 વિકેટ પણ ઝડપી. આમ છતાં ટીમે તેને રિલીઝ કરી દીધો. ચેન્નઈએ તેને 2.4 કરોડમાં ખરીદી લીધા. આનાથી સેલરી 87 ટકા સુધી ઘટી ગઈ. તે સીઝનમાં કરનને 5 મેચ જ રમવા મળી.