ઈરાનના વરિષ્ઠ અધિકારી મોહસિન રઝાઈએ અમેરિકાને ચેતવણી આપતા કહ્યું છે કે હોર્મુઝ સ્ટ્રેટને અમેરિકી સેનાનું કબ્રસ્તાન બનાવી દેવામાં આવશે. મોહસિન રઝાઈ અગાઉ ઈરાનની રિવોલ્યુશનરી ગાર્ડ (IRGC) માં કમાન્ડર રહી ચૂક્યા છે.

તેમણે અમેરિકી સેનાને સમુદ્રી લૂંટારા (પાઈરેટ) ગણાવતા કહ્યું કે અમેરિકા વિશ્વનો એકમાત્ર એવો પાઈરેટ છે જેની પાસે એરક્રાફ્ટ કેરિયર્સ છે.

રઝાઈએ ગયા મહિને ઈસ્ફહાનમાં એક અમેરિકી F-15E વિમાન તોડી પાડવામાં આવ્યું હોવાનો ઉલ્લેખ કરતા કહ્યું કે, જે રીતે તે વિમાનનો કાટમાળ પડ્યો હતો, તેવો જ અંજામ અમેરિકી જહાજો અને સૈનિકોનો પણ થઈ શકે છે.

બીજી તરફ, અમેરિકી રાષ્ટ્રપતિ ડોનાલ્ડ ટ્રમ્પે ચેતવણી આપી છે કે જો ઈરાન કોઈ ભૂલ કરશે તો તેના પર ફરીથી હુમલા થઈ શકે છે. તેમણે કહ્યું કે અમેરિકા અત્યારે મજબૂત સ્થિતિમાં છે, જ્યારે તેહરાન દબાણમાં છે અને સમજૂતી કરવા માંગે છે.

આ સિવાય, ટ્રમ્પે ‘ટ્રુથ સોશિયલ’ પર પોસ્ટ કરીને જણાવ્યું કે પાકિસ્તાનની મધ્યસ્થી દ્વારા ઈરાન તરફથી 14-પોઈન્ટનો પ્રસ્તાવ મળ્યો છે, જેના વિગતવાર ડ્રાફ્ટની રાહ જોવાઈ રહી છે. અમે આ નવા પ્રસ્તાવની સમીક્ષા પણ કરી રહ્યા છીએ.

ઈરાને 3 એપ્રિલે ઇસ્ફહાન પ્રાંતમાં અમેરિકાનું F-15E ફાઇટર જેટ તોડી પાડ્યું હતું, જેની તસવીર 5 એપ્રિલે જાહેર કરવામાં આવી હતી.

ઈરાનના 14-પોઈન્ટના પ્રસ્તાવમાં અનેક મુદ્દાઓ સામેલ

ઈરાની મીડિયા રિપોર્ટ્સ અનુસાર આ 14-પોઈન્ટનો પ્રસ્તાવ અમેરિકાના 9-પોઈન્ટ પ્લાનના જવાબમાં મોકલવામાં આવ્યો છે.

તેમાં 30 દિવસની અંદર તમામ મુદ્દાઓના સમાધાન, ભવિષ્યમાં હુમલાઓ સામે ગેરંટી, ક્ષેત્રમાંથી અમેરિકી સૈનિકોની વાપસી, ફ્રીઝ કરાયેલી ઈરાની સંપત્તિઓને મુક્ત કરવા, પ્રતિબંધો હટાવવા અને યુદ્ધના વળતરની માગ સામેલ છે.

આ ઉપરાંત, પ્રસ્તાવમાં હોર્મુઝ સ્ટ્રેટને લઈને નવી પદ્ધતિ બનાવવાની, અમેરિકી નૌકાદળની નાકાબંધી સમાપ્ત કરવાની અને પ્રાદેશિક સંઘર્ષોનો અંત લાવવાની વાત પણ કહેવામાં આવી છે. રિપોર્ટ્સ અનુસાર, કરાર પછી પરમાણુ કાર્યક્રમ પર અલગથી વાતચીતનો પ્રસ્તાવ પણ મૂકવામાં આવ્યો છે.

ઈરાનના વિદેશ મંત્રી અબ્બાસ અરાઘચીએ 25 એપ્રિલે પાકિસ્તાન પ્રવાસ દરમિયાન વડાપ્રધાન શાહબાઝ શરીફ સાથે મુલાકાત કરી. પાકિસ્તાનની મધ્યસ્થીમાં ઈરાને 14-મુદ્દાનો પ્રસ્તાવ રજૂ કર્યો છે.

છેલ્લા 24 કલાકના 5 મોટા અપડેટ્સ…

ઈરાન યુદ્ધ સંબંધિત અપડેટ્સ માટે નીચેના બ્લોગમાંથી પસાર થાઓ…

લાઈવ અપડેટ્સ

4 મિનિટ પેહલા

• કૉપી લિંક

એક્સપર્ટ બોલ્યા- ઈરાન નમવા તૈયાર નથી, સમજૂતીમાં આ જ સૌથી મોટો અવરોધ

ઈરાન અને અમેરિકા વચ્ચે સંભવિત સમજૂતીને લઈને નવી ટિપ્પણી સામે આવી છે. એક્સપર્ટે કહ્યું છે કે ડીલની દિશામાં થોડી હલચલ દેખાઈ રહી છે, પરંતુ રાષ્ટ્રપતિ ડોનાલ્ડ ટ્રમ્પનું વલણ જ સૌથી મોટો અવરોધ બની શકે છે.

ઈરાન પોડકાસ્ટના હોસ્ટ અને સેન્ટર ફોર ઈન્ટરનેશનલ પોલિસીના સીનિયર ફેલો નેગર મોર્તઝાવીએ અલ જઝીરાને જણાવ્યું કે, ઈરાન પોતાના પ્રસ્તાવમાં ફેરફાર કરીને લવચીકતા (flexibility) બતાવી રહ્યું છે. તેમણે ઉમેર્યું કે ટ્રમ્પ પણ યુદ્ધમાંથી બહાર નીકળવા માંગે છે.

જોકે, મોર્તઝાવીના જણાવ્યા અનુસાર અસલી સમસ્યા એ છે કે મામલો હવે “અહંકાર” નો બની ગયો છે. તેમણે કહ્યું કે ટ્રમ્પ પોતાને સંપૂર્ણ રીતે વિજેતા તરીકે જોવા માંગે છે અને ઈરાન પાસેથી સંપૂર્ણ શરણાગતિની (surrender) અપેક્ષા રાખી રહ્યા છે.

તેમણે વધુમાં કહ્યું કે હકીકત એ છે કે ઈરાન સંપૂર્ણ રીતે નમવાનું નથી. આવી સ્થિતિમાં જ્યાં સુધી વ્હાઇટ હાઉસ આ વાતને નહીં સમજે, ત્યાં સુધી બંને પક્ષો વચ્ચે અલગ-અલગ મુદ્દાઓ પર સમજૂતીના પ્રયાસો મુશ્કેલ બનેલા રહેશે.

10 મિનિટ પેહલા

• કૉપી લિંક

ટ્રમ્પ બોલ્યા- હોર્મુઝ ખોલવા માટે પગલાં ભરીશું

અમેરિકી રાષ્ટ્રપતિ ડોનાલ્ડ ટ્રમ્પે જણાવ્યું છે કે હોર્મુઝની સામુદ્રધુની (Strait of Hormuz) માં ફસાયેલા જહાજોને સોમવાર સવારથી બહાર કાઢવાના પ્રયાસો શરૂ કરવામાં આવશે. તેમણે જણાવ્યું કે અમેરિકી પ્રતિનિધિઓને સૂચના આપવામાં આવી છે કે જહાજો અને તેમના ક્રૂ (ચાલક દળ) ને સુરક્ષિત બહાર કાઢવા માટે તમામ સંભવિત પ્રયાસો કરે.

ટ્રમ્પે સોશિયલ મીડિયા પર લખ્યું છે કે, આ પગલું માનવીય ધોરણે લેવામાં આવી રહ્યું છે, કારણ કે અનેક જહાજોમાં ખાવા-પીવાની સામગ્રી ઓછી થઈ રહી છે. જો કોઈ આ પ્રક્રિયામાં અવરોધ ઊભો કરશે, તો તેની સામે કડક કાર્યવાહી કરવામાં આવશે.

08:51 PM3 મે 2026

• કૉપી લિંક

એપ્રિલમાં કુવૈતની કાચા તેલની નિકાસ શૂન્ય, 35 વર્ષ પછી આવું બન્યું

ટેન્કરટ્રેકર્સના જણાવ્યા અનુસાર, એપ્રિલ 2026 માં કુવૈતે કાચા તેલની નિકાસ કરી નથી. 1991ના અખાતી યુદ્ધ પછી પહેલીવાર આવું બન્યું છે. કુવૈત ઓઈલનું ઉત્પાદન તો કરી રહ્યું છે, પરંતુ ક્રૂડ ઓઈલ દેશની બહાર મોકલવામાં આવ્યું નથી.

08:15 PM3 મે 2026

• કૉપી લિંક

ટ્રમ્પે ઈરાનના પ્રસ્તાવને નકાર્યો, નેતન્યાહુને માફી આપવાની સલાહ આપી

અમેરિકી રાષ્ટ્રપતિ ડોનાલ્ડ ટ્રમ્પે ઈરાનના નવા પ્રસ્તાવને સ્પષ્ટપણે ફગાવી દીધો છે. તેમણે ઈઝરાયલી મીડિયા ‘કાન ન્યૂઝ’ સાથે વાત કરતા કહ્યું કે, “મેં તેને સંપૂર્ણ રીતે જોયો છે, પરંતુ તે સ્વીકાર્ય નથી.”

નેતન્યાહુના કેસ મુદ્દે ટ્રમ્પે મીડિયાને કહ્યું કે- “તમારા રાષ્ટ્રપતિને કહો કે તેઓ બીબી (નેતન્યાહુ) ને માફ કરી દે. તેઓ યુદ્ધના સમયના વડાપ્રધાન છે. અત્યારે ઈઝરાયલને એવા વડાપ્રધાનની જરૂર છે જે પૂરી રીતે યુદ્ધ પર ધ્યાન કેન્દ્રિત કરી શકે.” ટ્રમ્પે વધુમાં ઉમેર્યું કે ઈઝરાયલના નિર્માણમાં તેમનો અને નેતન્યાહુનો મોટો ફાળો રહ્યો છે.

08:13 PM3 મે 2026

• કૉપી લિંક

ઈરાન અને સ્પેનના વિદેશ મંત્રીઓ વચ્ચે ફોન પર ચર્ચા

ઈરાનના વિદેશ મંત્રી અબ્બાસ અરાઘચીએ એક નિવેદનમાં જણાવ્યું છે કે ઈરાન અને સ્પેનના વિદેશ મંત્રીઓ વચ્ચે યુદ્ધ સંબંધિત સ્થિતિ અને બંને દેશોના સંબંધો અંગે ફોન પર વાતચીત થઈ હતી. ઈરાની વિદેશ મંત્રીએ સ્પેનના તેમના સમકક્ષને યુદ્ધ સમાપ્ત કરવા માટે લેવામાં આવી રહેલા પગલાંની જાણકારી આપી હતી. ઈરાન રાજદ્વારી માર્ગો દ્વારા આ સંઘર્ષને ખતમ કરવાનો પ્રયાસ કરી રહ્યું છે.

ઈરાનનું કહેવું છે કે આ પ્રયાસોનો હેતુ આ વિસ્તારમાં લાંબા ગાળાની શાંતિ અને કાયમી સુરક્ષા સુનિશ્ચિત કરવાનો છે. જોકે, આ વાતચીત ક્યારે થઈ અને અન્ય કયા મુદ્દાઓ પર ચર્ચા થઈ, તેની વિગતો હજુ સામે આવી નથી.

06:12 PM3 મે 2026

• કૉપી લિંક

હોર્મુઝમાં કાર્ગો શિપ પર બોટ દ્વારા હુમલો

હોર્મુઝ સ્ટ્રેટમાં એક મોટા કાર્ગો જહાજ પર નાની નૌકાઓ દ્વારા હુમલો કરવામાં આવ્યો છે. આ ઘટના રવિવારે ઈરાન તટથી આશરે 11 માઈલ દૂર બની હતી.

યુકે (UK) ના મેરીટાઇમ ટ્રેડ ઓપરેશન્સ સેન્ટરના જણાવ્યા અનુસાર, આ હુમલામાં કોઈ જાનહાનિ થઈ નથી. અહેવાલોમાં જણાવાયું છે કે ઈરાન અગાઉ પણ આ વિસ્તારમાં સ્પીડ બોટ્સનો ઉપયોગ કરીને અનેક જહાજો પર હુમલો કરી ચૂક્યું છે અને કેટલાક જહાજોને પોતાના કબજે પણ લીધા છે.

દરમિયાન, ઈરાની સંસદના ઉપાધ્યક્ષ અલી નિકઝાદે કહ્યું છે કે ઈરાન હોર્મુઝથી પાછળ હટશે નહીં અને આ વિસ્તાર હવે પહેલા જેવો રહેશે નહીં.

06:11 PM3 મે 2026

• કૉપી લિંક

ગાઝામાં 8 હજાર લોકોના મૃતદેહ કાટમાળમાં દટાયેલા, 90% વિસ્તાર તબાહ

ગાઝામાં હજુ પણ લગભગ 8,000 લોકોના મૃતદેહ કાટમાળ નીચે દટાયેલા છે. મીડિયા રિપોર્ટ અનુસાર, ઈઝરાયલના હુમલા બાદ અહીં અત્યાર સુધીમાં ખૂબ જ ઓછો કાટમાળ હટાવી શકાયો છે.

સંયુક્ત રાષ્ટ્ર (UN) સાથે જોડાયેલા એક અધિકારીના જણાવ્યા અનુસાર, કાટમાળ હટાવવાનું કામ ખૂબ જ ધીમી ગતિએ ચાલી રહ્યું છે અને તેને પૂર્ણ કરવામાં 7 વર્ષ જેટલો સમય લાગી શકે છે. ગાઝામાં અનેક પરિવારો હજુ પણ તેમના સંબંધીઓના મૃતદેહ કાઢવાની રાહ જોઈ રહ્યા છે, જેથી તેઓ તેમની અંતિમવિધિ કરી શકે.

સ્થાનિક સિવિલ ડિફેન્સનું કહેવું છે કે તેમની પાસે ભારે મશીનરીની અછત છે, જેના કારણે કાટમાળ હટાવવાનું કામ વધુ ધીમું પડી રહ્યું છે.

રિપોર્ટમાં એમ પણ કહેવામાં આવ્યું છે કે ગત વર્ષે થયેલા સીઝફાયર છતાં હિંસા સંપૂર્ણપણે અટકી નથી. ગાઝાના આરોગ્ય મંત્રાલયના જણાવ્યા મુજબ, આ સમયગાળા દરમિયાન 828 લોકોના મોત થયા છે અને 2,342 લોકો ઘાયલ થયા છે.

બે વર્ષની આ લડાઈમાં ગાઝામાં 72,000થી વધુ લોકો માર્યા ગયા છે અને 1.72 લાખથી વધુ ઘાયલ થયા છે. લગભગ 90% ઈન્ફ્રાસ્ટ્રક્ચર તબાહ થઈ ચૂક્યું છે. સંયુક્ત રાષ્ટ્રનો અંદાજ છે કે ગાઝાને ફરીથી વસાવવા માટે અંદાજે 70 બિલિયન ડોલર (લગભગ ₹5.8 લાખ કરોડ) નો ખર્ચ થશે.

06:03 PM3 મે 2026

• કૉપી લિંક

કુવૈતને જૂનમાં ઓઇલ ઉત્પાદન વધવાની અપેક્ષા

કુવૈતના ઓઇલ મંત્રી અનુસાર, જૂન મહિનામાં દેશનું ઓઇલ ઉત્પાદન વધીને 2.6 મિલિયન બેરલ પ્રતિ દિવસ (લગભગ 26 લાખ બેરલ) થઈ શકે છે. ઓપેક+ (OPEC+) સમૂહના 7 દેશોએ પણ જૂનમાં પોતાના ઓઇલ ઉત્પાદન લક્ષ્યને 1,88,000 બેરલ પ્રતિ દિવસ વધારવાનો નિર્ણય કર્યો છે. આ સતત ત્રીજો મહિનો છે જ્યારે ઉત્પાદન વધારવાની વાત કહેવામાં આવી છે. જોકે, રિપોર્ટમાં કહેવામાં આવ્યું છે કે આ વધારો વધુ અસરકારક ન હોઈ શકે. તેનું કારણ એ છે કે હોર્મુઝ હજુ પણ બંધ છે.

06:03 PM3 મે 2026

• કૉપી લિંક

અમેરિકાના દબાણને કારણે ઈરાની બંદરો પાસે 49 જહાજોએ રસ્તો બદલ્યો

અમેરિકી સેનાના સેન્ટ્રલ કમાન્ડ (CENTCOM) એ જણાવ્યું છે કે ઈરાનના બંદરો પર ચાલી રહેલી નાકાબંધી દરમિયાન અત્યાર સુધીમાં 49 વેપારી જહાજોનો રસ્તો બદલી દેવામાં આવ્યો છે.

CENTCOM ના જણાવ્યા અનુસાર, તેના કમાન્ડર એડમિરલ બ્રેડ કૂપરે USS મિલિયસ નામના યુદ્ધ જહાજની મુલાકાત લીધી હતી, જે આ મિશન હેઠળ વિસ્તારમાં પેટ્રોલિંગ કરી રહ્યું છે.

દિવ્ય ભાસ્કરને Google પર મનપસંદ સોર્સ બનાવો