દેશમાં સાયબર ફ્રોડના કિસ્સા વધ્યા છે. દિલ્હી, નોઇડા અને ચંદીગઢમાંથી એક મોટા સાયબર છેતરપિંડી નેટવર્કનો પર્દાફાશ થયો. સેન્ટ્રલ બ્યુરો ઓફ ઇન્વેસ્ટિગેશન (CBI) દ્વારા આ મામલે વધુ તપાસ કરતા સામે આવ્યું કે સાયબર ઠગ ટેલિકોમ સિસ્ટમમાં ખામીઓનો ઉપયોગ કરી સામાન્ય લોકો સાથે છેતરપિંડી કરે છે. આ કેસમાં સામે આવ્યું કે સિમ બોક્સ કૌભાંડો દેશભરમાં ઝડપથી ફેલાઈ રહ્યા છે. જાણો શું છે સિમ બોક્સ કૌભાંડ અને તે કેવી રીતે કાર્ય કરે છે.

શું છે સિમ બોક્સ ટેકનોલોજી જાણો

સિમ બોક્સ એ એક ખાસ પ્રકારનું મશીન હોય છે. આ મશીન એકસાથે સેંકડો કે હજારો સિમ કાર્ડ રાખી શકે છે. ગુનેગારો સિમ બોક્સનો ઉપયોગ આંતરરાષ્ટ્રીય કોલને સ્થાનિક કોલ તરીકે છુપાવવા માટે કરતા હોવાનું સીબીઆઈની તપાસમાં જાણવા મળ્યું છે. આ માત્ર ટેલિકોમ ચાર્જ બચાવે છે પણ કોલ્સ અને સંદેશાઓનું સાચું સ્થાન પણ છુપાવે છે. આ જ ટેકનોલોજીનો ઉપયોગ નકલી સંદેશાઓ, નકલી લોન ઓફરો અને રોકાણ કૌભાંડો દ્વારા લોકોને છેતરવા માટે થાય છે.

સિમ બોક્સ દ્વારા કેવી રીતે થાય છે  છેતરપિંડી

આ પ્રકારની છેતરપિંડી મોટી સંખ્યામાં સિમ કાર્ડ મેળવવાથી શરૂ થાય છે. આ સિમ કાર્ડ ઘણીવાર નકલી દસ્તાવેજો અથવા ખોટી ઓળખનો ઉપયોગ કરીને મેળવવામાં આવે છે. પછી તેમને સિમ બોક્સમાં દાખલ કરવામાં આવે છે અને સર્વર અને ડોંગલ્સ સાથે જોડવામાં આવે છે. પછી, દરરોજ લાખો SMS સંદેશાઓ મોકલવામાં આવે છે જેમાં ફિશિંગ લિંક્સ, નકલી બેંક ચેતવણીઓ અથવા ઇનામ જીતવાના વચનો હોય છે. મોબાઈલ યુઝર્સને લોભામણી અને લલચામણી જાહેરાતો આપી લિંકથી કનેક્ટ કરવામાં આવે છે.

સિમ બોક્સ દ્વારા થાય છે માહિતીનો દુરુપયોગ 

એકવાર કોઈ વ્યક્તિ લિંક પર ક્લિક કરે છે અથવા તેમની માહિતી શેર કરે છે, તો છેતરપિંડી કરનારાઓ તેમના બેંક ખાતા અથવા વ્યક્તિગત ડેટાની ઍક્સેસ મેળવે છે. તપાસમાં એ પણ બહાર આવ્યું છે કે ઘણા વિદેશી સાયબર ગુનેગારો ભારતમાં સ્થિત નેટવર્કનો ઉપયોગ કરીને લોકો સાથે છેતરપિંડી કરી રહ્યા હતા. સિમ બોક્સ કૌભાંડો ફક્ત નાણાકીય છેતરપિંડી વિશે નથી. તે ઓળખ ચોરી, બેંક ખાતા ખાલી કરવા અને વ્યક્તિગત માહિતીનો દુરુપયોગ થાય છે. તેથી આ બાબત વધુ ભયાનક સાબિત થઈ શકે છે.

સિમ બોક્સ કૌભાંડથી બચવાનો ઉપાય

આજના સમયમાં, થોડી સાવધાની તમને ગંભીર મુશ્કેલીમાંથી બચાવી શકે છે. લોન, નોકરી અથવા રોકાણ સંબંધિત અજાણ્યા નંબરો પરથી આવતા સંદેશાઓ પર વિશ્વાસ ન કરો. SMS માં લિંક્સ પર ક્લિક કરતા પહેલા કાળજીપૂર્વક વિચારો અને નંબરની ચકાસણી કરો. જો તમને કોઈ શંકાસ્પદ સંદેશ મળે, તો તાત્કાલિક સરકારી સાયબર ક્રાઈમ પોર્ટલ, cybercrime.gov.in પર તેની જાણ કરો . ઉપરાંત, આવા સંદેશાઓને આપમેળે બ્લોક કરવા માટે તમારા ફોન પર સ્પામ ફિલ્ટર ચાલુ કરો. 

આ પણ વાંચો : Auto News : વર્ષ 2026માં મોંઘી થઈ શકે છે આ કાર, જાણો કેમ લીધો આ નિર્ણય?