કેરળના તિરુવનંતપુરમમાં ગુરુવારે થયેલા એક માર્ગ અકસ્માતના કેસમાં મલયાલમ એક્ટર અને પ્રોડ્યુસર મણિયન પિલ્લા રાજુની પોલીસે ધરપકડ કરી હતી. આ અકસ્માત તેમની કાર અને એક બાઇક વચ્ચે થયો હતો. જોકે, કેસ નોંધાયા બાદ તેને જામીન પર મુક્ત કરવામાં આવ્યા હતા.

ઘટનાના CCTV ફૂટેજમાં જોવા મળ્યું કે, ગુરુવારે રાત્રે રાજુની કાર રસ્તા પર આવી રહી હતી, ત્યારે સામેથી આવતી બાઇક તેની સાથે અથડાઈ. વીડિયોમાં બાઇક પર સવાર બે યુવકો હવામાં ઉછળીને રસ્તા પર પડતા જોવા મળ્યા.

ઘટનાના વીડિયોમાં જોઈ શકાય છે કે, કારની ટક્કર બાદ બાઇક સવારો ખૂબ જ ખરાબ રીતે નીચે પટકાયા હતા.

ટક્કર બાદ એક્ટર ઘટનાસ્થળેથી ફરાર થઈ ગયા હતા: પોલીસ

ANI મુજબ, કેરળ પોલીસે રાજુ વિરુદ્ધ ભારતીય ન્યાય સંહિતા (BNS) અને મોટર વાહન અધિનિયમની કલમો હેઠળ FIR નોંધી છે. પોલીસનું કહેવું છે કે, અકસ્માત સમયે કાર એક્ટર જ ચલાવી રહ્યા હતા અને ટક્કર બાદ તે ઘટનાસ્થળે રોકાયા ન હતા.

આ અકસ્માત ગુરુવારે રાત્રે લગભગ સાડા નવ વાગ્યે શહેરના વઝુથાકૌડ વિસ્તારમાં ત્રિવેન્દ્રમ ક્લબ સામે થયો હતો. અકસ્માતમાં બાઇક સવાર બે યુવકો, સૂરજ અને નિદેવને ઇજા પહોંચી હતી. બંનેને હૉસ્પિટલમાં દાખલ કરવામાં આવ્યા છે. સૂરજના પગ અને ખભામાં ઈજા થઈ છે, જ્યારે નિદેવને ગરદન અને પગમાં ઈજા થઈ છે. કેસ નોંધાયા બાદ મણિયન પિલ્લા રાજુને મેડિકલ ટેસ્ટ માટે તિરુવનંતપુરમ જનરલ હૉસ્પિટલ લઈ જવામાં આવ્યા હતા, ત્યારબાદ તેમને જામીન પર છોડી દેવામાં આવ્યા હતા.

કોણ છે મણિયન પિલ્લા રાજુ?

મણિયન પિલ્લા રાજુનું સાચું નામ સુધીર કુમાર છે. તેઓ મલયાલમ ફિલ્મ ઇન્ડસ્ટ્રીના જાણીતા એક્ટર અને પ્રોડ્યુસર છે. તેમણે પોતાની કારકિર્દીમાં 400થી વધુ ફિલ્મોમાં કામ કર્યું છે. તેમને ‘મણિયન પિલ્લા રાજુ’ નામ 1981ની ફિલ્મ ‘મણિયન પિલ્લા અથવા મણિયન પિલ્લા’માં ભજવેલા લોકપ્રિય પાત્ર પરથી મળ્યું.

મણિયન પિલ્લા રાજુએ વર્ષ 1976માં ફિલ્મ ‘મોહિનીઅટ્ટમ’થી એક્ટિંગની શરૂઆત કરી હતી.

રાજુએ પોતાની લાંબી કારકિર્દીમાં ‘બોઇંગ બોઇંગ’, ‘કિલુક્કમ’, ‘થેનમાવિન કોમ્બાથ’ અને ‘સ્પદિકમ’ જેવી ઘણી હિટ ફિલ્મોમાં કામ કર્યું. ફિલ્મ ‘કિલુક્કમ’ માટે તેમને કેરળ રાજ્ય ફિલ્મ પુરસ્કાર પણ મળ્યો. એક પ્રોડ્યુસર તરીકે પણ તેમણે ‘આયે ઓટો’, ‘છોટા મુંબઈ’ અને ‘પાવડા’ જેવી ફિલ્મો પ્રોડ્યુસ કરી છે.