ભારતે તબીબી વિજ્ઞાન અને ટેકનોલોજીના ક્ષેત્રમાં એક અદ્ભુત સિદ્ધિ હાંસલ કરી છે, જેણે આખી દુનિયાને ચોંકાવી દીધી છે. કલ્પના કરો કે હરિયાણાના ગુરુગ્રામમાં બેઠેલા એક ડૉક્ટર, 1600 કિલોમીટર દૂર હૈદરાબાદની હોસ્પિટલમાં દાખલ દર્દીનું સફળતાપૂર્વક ઓપરેશન કરી રહ્યા છે. 

1600 કિલોમીટર દૂરથી ઓપરેશન કરવાની આ કોઈ સાયન્સ ફિક્શન ફિલ્મની વાર્તા નથી, પરંતુ વાસ્તવિકતા છે. સફદરજંગ હોસ્પિટલ અને VMMC (દિલ્હી) ના યુરોલોજી વિભાગના વડા પ્રોફેસર અનૂપ કુમારે દેશની પ્રથમ રોબોટિક યુરોલોજિકલ ટેલિસર્જરી સફળતાપૂર્વક પાર પાડીને ભારતીય તબીબી ઇતિહાસમાં એક નવો સીમાચિહ્ન સ્થાપિત કર્યો છે. કેન્દ્રીય આરોગ્ય પ્રધાન જે.પી. નડ્ડાએ પણ આ ઐતિહાસિક સિદ્ધિ બદલ તબીબી ટીમની પ્રશંસા કરી છે.

ગુરુગ્રામ બેસીને ડો અનુપ કુમારે કરી સફળ સર્જરી

આ જટિલ ઓપરેશનની શરૂઆત હૈદરાબાદની પ્રીતિ કિડની અને યુરોલોજી હોસ્પિટલથી થઈ હતી, જ્યાં 32 વર્ષીય મહિલા દર્દી મૂત્રમાર્ગની ગંભીર અને જટિલ સમસ્યાથી પીડાઈ રહી હતી. આ સ્થિતિ માટે ‘રોબોટિક મોડિફાઇડ લીચ ગ્રેગોઇર યુરેટેરિક રિઇમ્પ્લાન્ટેશન’ નામની અત્યંત જટિલ સર્જરીની આવશ્યકતા હતી. ગુરુગ્રામમાં બેસીને ડૉ. અનૂપ કુમારે અદ્યતન સર્જિકલ રોબોટિક સિસ્ટમનું નિયંત્રણ સંભાળ્યું હતું. હાઇ-સ્પીડ ઇન્ટરનેટ અને અત્યંત આધુનિક નેટવર્કની મદદથી, રોબોટિક આર્મ્સે હૈદરાબાદમાં રહેલા દર્દીની આ સર્જરી કોઈપણ પ્રકારના વિલંબ કે વિક્ષેપ વિના ખૂબ જ ચોકસાઈપૂર્વક પૂરી કરી હતી. આ કામગીરીમાં હૈદરાબાદના ડૉ. ચંદ્રમોહન વાડ્ડી અને તેમની ટીમ દ્વારા સ્થળ પર સંપૂર્ણ સહાય પૂરી પાડવામાં આવી હતી.
https://twitter.com/ani_digital/status/2090473852908568641

આટલા લાંબા અતંરે ટેલિસર્જરી કરવાનો પ્રથમ બનાવ

સરકારી સંસ્થાના કોઈ સર્જન દ્વારા આટલા લાંબા અંતરે ટેલિસર્જરી કરવાનો આ પ્રથમ બનાવ છે. ડૉ. અનૂપ કુમારે આ સફળતાનો શ્રેય વરિષ્ઠ ડૉક્ટરો અને હોસ્પિટલ વહીવટને આપ્યો છે. તેમણે વિશ્વાસ વ્યક્ત કર્યો છે કે આ ટેકનોલોજી ભવિષ્યમાં દેશના કોઈપણ દૂરના ખૂણામાં બેઠેલા દર્દીઓને શ્રેષ્ઠ અને ઉચ્ચ સ્તરીય સારવાર પૂરી પાડવામાં ક્રાંતિકારી સાબિત થશે. હવે દર્દીઓને માત્ર સુપર-સ્પેશિયાલિટી સારવાર માટે મોટા શહેરોમાં લાંબી મુસાફરી કરવાની કે ભારે ખર્ચ કરવાની જરૂર નહીં પડે. આ ટેકનોલોજીથી સમય અને નાણાં બંનેની બચત થશે અને કટોકટીના સમયે દર્દીઓનો કિંમતી જીવ બચાવી શકાશે.

આ પણ વાંચોઃ Haryana : પત્નીએ પતિને મારવા ક્રૂરતાની હદ કરી પાર, આંતરડા બહાર કાઢી પરબિડીયામાં ભર્યા