IPLમાં આજે ‘એલ-ક્લાસિકો’ મેચમાં મુંબઈ ઈન્ડિયન્સ (MI)નો સામનો ચેન્નઈ સુપર કિંગ્સ (CSK) સામે મુંબઈમાં થશે. મેચ MIના હોમ ગ્રાઉન્ડ વાનખેડે સ્ટેડિયમમાં સાંજે 7:30 વાગ્યે શરૂ થશે, જ્યારે ટૉસ સાંજે 7:00 વાગ્યે થશે.

આ મેચમાં CSKના ભૂતપૂર્વ કેપ્ટન એમએસ ધોનીના પરત ફરવાની શક્યતા છે, જે આ સીઝનમાં અત્યાર સુધી રમાયેલી 6 મેચમાં મેદાનમાં ઉતર્યો નથી. બીજી તરફ, રોહિત શર્મા પણ ઈજામાંથી સાજો થઈને આ મેચમાં પરત ફરી શકે છે, તેણે ગત બે મેચ ગુમાવી હતી.

આ સીઝનમાં બંને ટીમનું પ્રદર્શન નિરાશાજનક રહ્યું છે. બંનેએ 6માંથી માત્ર 2 મેચ જીતી છે, જ્યારે 4માં હારનો સામનો કરવો પડ્યો છે. સારા નેટ રન રેટને કારણે મુંબઈ ઈન્ડિયન્સ સાતમા સ્થાને છે, જ્યારે ચેન્નઈ સુપર કિંગ્સ આઠમા નંબરે છે.

CSK સામે MI 3 મેચથી આગળ

IPLની બે સૌથી સફળ ટીમ વચ્ચે અત્યાર સુધી 41 મેચ રમાઈ છે, જેમાં MIને 22 જ્યારે CSKને 19માં જીત મળી છે. વાનખેડેમાં રમાયેલી 13 મેચમાં પણ MIની ટીમ 8 અને CSK 5 મેચ જીત્યું છે. પરંતુ 2023થી બંને ટીમ વચ્ચે રમાયેલા પાંચ મેચમાં MI માત્ર એક જ મેચ જીતી શક્યું છે.

તિલક વર્માએ ગત મેચમાં સદી ફટકારી હતી

તિલક વર્મા આ સીઝનમાં મુંબઈ ઈન્ડિયન્સ માટે શાનદાર ફોર્મમાં જોવા મળ્યો છે. તેણે 6 મેચમાં 144 રન બનાવ્યા છે, જેમાં એક સદી સામેલ છે. આ સદી ગત મેચમાં મુંબઈ તરફથી રમતા આવી હતી. તેનો સ્ટ્રાઈક રેટ 187.01નો છે.

બોલિંગમાં શાર્દૂલ ઠાકુર પર જવાબદારી છે. તેણે 5 મેચમાં 6 વિકેટ લીધી છે, જેમાં 3/39 તેનું સર્વશ્રેષ્ઠ પ્રદર્શન રહ્યું છે. જોકે તેનો ઇકોનોમી રેટ 13.57 રહ્યો છે, પરંતુ વિકેટ લેવાની ક્ષમતાથી તેણે ટીમને મહત્વના સમયે સફળતા અપાવી છે.

સંજુ CSKનો ટૉપ પ્લેયર

સંજુ સેમસન આ સીઝનમાં ચેન્નઈ સુપર કિંગ્સ માટે શાનદાર લયમાં દેખાઈ રહ્યો છે. તેણે 6 મેચમાં 192 રન બનાવ્યા છે, જેમાં એક સદી સામેલ છે. 174.54ના સ્ટ્રાઈક રેટથી બેટિંગ કરીને સેમસને ટીમને ઝડપી શરૂઆત અપાવી છે.

બીજી તરફ બોલિંગમાં અંશુલ કંબોજે જબરદસ્ત પ્રદર્શન કર્યું છે. તેણે 6 મેચમાં 13 વિકેટ ઝડપી છે, જેમાં 3/22 તેનું સર્વશ્રેષ્ઠ પ્રદર્શન રહ્યું છે. 9.73ના ઇકોનોમી રેટ સાથે કંબોજે સતત વિકેટો લઈને CSKની બોલિંગને મજબૂતી આપી છે.

આ સીઝનમાં વાનખેડેમાં ચોથી મેચ

વાનખેડે સ્ટેડિયમની પિચ સામાન્ય રીતે બેટર્સ માટે ઘણી મદદરૂપ માનવામાં આવે છે, જ્યાં ઘણીવાર હાઈ-સ્કોરિંગ મેચ જોવા મળે છે. જોકે, નવા બોલથી ફાસ્ટ બોલરોને થોડી મદદ પણ મળે છે.

આ મેદાન પર અત્યાર સુધી IPLની 126 મેચ રમાઈ ચૂકી છે, જેમાંથી 58 મેચ પહેલા બેટિંગ કરનારી ટીમે જીતી છે, જ્યારે 68 મેચમાં ટાર્ગેટને ચેઝ કરનારી ટીમ સફળ રહી છે. આ સીઝનમાં અહીં રમાયેલી 3 મેચમાંથી 2માં 200થી વધુ સ્કોર બન્યા છે. હોમ ટીમ મુંબઈને અહીં એક મેચમાં જીત મળી છે, જ્યારે બે મેચમાં હારનો સામનો કરવો પડ્યો છે.

મુંબઈમાં આજે ગરમી રહેશે

મુંબઈમાં ગુરુવારે દિવસભર પ્રચંડ ગરમી સાથે તેજ તડકો રહેશે, જેનાથી હવામાન વધુ આકરું લાગશે. બપોરના સમયે પવન ફૂંકાવાથી થોડી રાહત મળી શકે છે, પરંતુ ગરમીની અસર જોખમી રહેશે. વરસાદની બિલકુલ શક્યતા નથી. તાપમાન 39 થી 27 ડિગ્રી સેલ્સિયસની વચ્ચે રહી શકે છે.

બન્ને ટીમની સંભવિત પ્લેઇંગ-12

મુંબઈ ઈન્ડિયન્સ (MI): રોહિત શર્મા, ક્વિન્ટન ડી કોક, નમન ધીર, સૂર્યકુમાર યાદવ, હાર્દિક પંડ્યા (કેપ્ટન), તિલક વર્મા, શેરફન રધરફોર્ડ, મિચેલ સેન્ટનર, ક્રિષ ભગત, જસપ્રીત બુમરાહ, અલ્લાહ ગઝનફર અને અશ્વની કુમાર.

ચેન્નઈ સુપર કિંગ્સ (CSK): સંજુ સેમસન, ઋતુરાજ ગાયકવાડ (કેપ્ટન), સરફરાઝ ખાન, શિવમ દુબે, મહેન્દ્ર સિંહ ધોની (વિકેટકીપર), ડેવાલ્ડ બ્રેવિસ, જેમી ઓવરટન, મેથ્યુ શોર્ટ, અંશુલ કંબોજ, નૂર અહેમદ, મુકેશ ચૌધરી અને ગુરજપનીત સિંહ.

દિવ્ય ભાસ્કરને Google પર મનપસંદ સોર્સ બનાવો