સિનિયર એક્ટર નસીરુદ્દીન શાહે કહ્યું છે કે, તેમને મુંબઈ યુનિવર્સિટીના એક કાર્યક્રમમાંથી છેલ્લી ઘડીએ કોઈ કારણ જણાવ્યા વિના અને માફી માંગ્યા વિના હટાવી દેવામાં આવ્યા. તેમણે આ અનુભવને અપમાનજનક અને નિરાશાજનક ગણાવ્યો, કારણ કે તેઓ વિદ્યાર્થીઓ સાથે વાતચીત કરવા ઉત્સાહિત હતા.

નસીરુદ્દીન શાહે ગુરુવારે ‘ધ ઇન્ડિયન એક્સપ્રેસ’માં લખેલા પોતાના આર્ટિકલમાં કહ્યું કે, તે 1 ફેબ્રુઆરીના રોજ યોજાનારા આ કાર્યક્રમમાં સામેલ થવા માંગતા હતા. આ કાર્યક્રમ મુંબઈ યુનિવર્સિટીના ઉર્દૂ વિભાગ દ્વારા આયોજિત કરવામાં આવ્યો હતો, પરંતુ 31 જાન્યુઆરીની રાત્રે મોડેથી તેમને જણાવવામાં આવ્યું કે, હવે તેમને આવવાની જરૂર નથી.

‘દેશ વિરોધી નિવેદનનું એક ઉદાહરણ આપો’

નસીરુદ્દીન શાહે આરોપ લગાવ્યો કે, બાદમાં યુનિવર્સિટીએ દર્શકોને કહ્યું કે, તેમણે પોતે કાર્યક્રમમાં આવવાની ના પાડી દીધી હતી. તેમણે કહ્યું કે, યુનિવર્સિટીએ સાચું કહેવાની હિંમત ન કરી અને કથિત રીતે એમ કહેવામાં આવ્યું કે તેઓ દેશ વિરુદ્ધ નિવેદનો આપે છે. આના પર શાહે પડકાર ફેંક્યો કે, જો આવું હોય તો તેમના કોઈ એક નિવેદનનું ઉદાહરણ આપવામાં આવે, જેમાં તેમણે દેશને ખરાબ કહ્યો હોય.

નસીરુદ્દીન શાહે કહ્યું કે, તેઓ સત્તાધારી સરકારના ઘણા કામોની પહેલા પણ ટીકા કરતા રહ્યા છે અને આગળ પણ કરતા રહેશે. તેમણે કહ્યું, ‘હું અવારનવાર આ વાત પર ચિંતા વ્યક્ત કરતો રહ્યો છું કે, આપણા દેશમાં સિવિક સેન્સ અને એકબીજા પ્રત્યે સંવેદનશીલતા સતત ઓછી થતી જઈ રહી છે.’

શાહે કહ્યું કે, ‘તેઓ ઘણા બીજા મુદ્દાઓ પર પણ ખુલીને પોતાની વાત રજૂ કરતા રહ્યા છે. એવા મુદ્દાઓ, જે મારા જેવા લોકોને આ દિશાને લઈને પરેશાન કરે છે, જે તરફ આપણે જતા દેખાઈ રહ્યા છીએ.’

નસીરુદ્દીન શાહ તેમની સ્પષ્ટવક્તા શૈલી માટે જાણીતા છે.

નસીરુદ્દીન શાહે એ પણ લખ્યું, ‘મેં ક્યારેય પોતાને ‘વિશ્વગુરુ’ કહેનારાઓની પ્રશંસા કરી નથી. હું તેમના કામ કરવાની રીતથી સહમત નથી. મને તેમનું પોતાને મોટા બતાવવું પસંદ નથી. છેલ્લા દસ વર્ષમાં તેમનું એક પણ કામ મને પ્રભાવિત કરી શક્યું નથી.’

તેમણે કહ્યું, ‘જ્યાં વિદ્યાર્થી કાર્યકરોને મુકદ્દમા વિના વર્ષો સુધી જેલમાં રાખવામાં આવે છે, પરંતુ દોષિત દુષ્કર્મીઓ અને હત્યારાઓને અવારનવાર જામીન મળી જાય છે. જ્યાં ગૌ-રક્ષકો ખુલ્લેઆમ લોકોને ઘાયલ કરે છે અને મારી નાખે છે. જ્યાં ઇતિહાસને ફરીથી લખવામાં આવી રહ્યો છે અને પાઠ્યપુસ્તકોની સામગ્રી બદલવામાં આવી રહી છે. જ્યાં વિજ્ઞાન સાથે પણ ચેડાં કરવામાં આવી રહ્યા છે અને જ્યાં એક મુખ્યમંત્રી પણ ‘મિયાં’ને પરેશાન કરવાની વાત કરે છે.’

શાહે અંતમાં એ પણ લખ્યું, ‘આ નફરત આખરે ક્યાં સુધી ચાલશે? આ તે દેશ નથી, જેમાં હું મોટો થયો અને જેણે મને પ્રેમ કરવાનું શીખવ્યું હતું. આજે વિચાર પર પહેરો છે. દેખરેખ વધી ગઈ છે. નફરત હવે બે મિનિટની રહી નથી. તે ચોવીસ કલાક ચાલે છે. શું એ કહેવું ખોટું હશે કે, પરિસ્થિતિઓ જ્યોર્જ ઓરવેલના પુસ્તક ‘1984’ જેવી થઈ રહી છે? જ્યાં મોટા નેતાની પ્રશંસા ન કરવી દેશદ્રોહ માનવામાં આવે છે?’