નેપાળના જાણીતા પર્વતારોહક નિર્મલ પુર્જા પાકિસ્તાનમાં હિમસ્ખલન એટલે કે એવલાંચની ઝપેટમાં આવ્યા બાદ ગુમ થઈ ગયા છે.

અલ્પાઇન ક્લબ ઓફ પાકિસ્તાન (ACP) અનુસાર, કારાકોરમ વિસ્તારમાં 8,051 મીટર ઊંચા બ્રોડ પીક પર ચઢાણ દરમિયાન લગભગ 7,000 મીટરની ઊંચાઈએ આ દુર્ઘટના બની હતી.

ન્યૂઝ એજન્સી PTI અનુસાર, પુર્જા સાથે 9 સભ્યો હતા. શિખર પર ચઢવાનો પ્રયાસ કરતી વખતે બરફીલા તોફાને 10 સભ્યોની ટીમને પોતાની ઝપેટમાં લીધી હતી.

ગુમ થયેલા લોકોમાં નેપાળના 6, પાકિસ્તાન, ઓમાન, અમેરિકા અને ચીનનો એક-એક પર્વતારોહક સામેલ છે. તેમાંથી 4ના મૃતદેહ મળી આવ્યા છે. બચાવ કામગીરી ચાલુ છે, પરંતુ ખરાબ હવામાનને કારણે બચાવ કાર્યમાં અવરોધ આવી રહ્યો છે.

GPS ટ્રેકરમાં હલચલના સંકેત

એવરેસ્ટ ક્રોનિકલના રિપોર્ટ અનુસાર, નિર્મલ પુર્જાના GPS ટ્રેકરમાં હળવી હલચલ જોવા મળી છે. જોકે, નિષ્ણાતોનું કહેવું છે કે આ ટેકનિકલ ખામી પણ હોઈ શકે છે.

ટ્રેકિંગ ડેટા અનુસાર ગુરુવારે સવારે 9:38 વાગ્યે પૂર્જા 6,659 મીટરની ઊંચાઈ પર હતા. ત્યારબાદ સવારે 10:18 વાગ્યે 800 મીટરનો ઝડપી ઘટાડો નોંધાયો, જે હિમપ્રપાતના સમય સાથે સુસંગત છે.

બરફમાં દટાયેલા વ્યક્તિને શોધવામાં સૌથી અસરકારક ઉપકરણ એવલાંચ બીકન હોય છે.

બચાવ હેલિકોપ્ટર પહાડી વિસ્તારોમાં પહોંચી શકતા નથી

નેપાળ પર્વતારોહણ સંઘના પૂર્વ અધ્યક્ષ આંગ શેરિંગ શેરપાએ જણાવ્યું કે ખરાબ હવામાનને કારણે હેલિકોપ્ટર પહાડી વિસ્તારમાં ઉતરી શકતા નથી, જેના કારણે બચાવ કામગીરી પ્રભાવિત થઈ છે.

પાકિસ્તાન સરકારના સંપર્કમાં નેપાળ

નેપાળના સંસ્કૃતિ, પર્યટન અને નાગરિક ઉડ્ડયન મંત્રાલયે જણાવ્યું હતું કે તેઓ પાકિસ્તાનમાં સ્થિત નેપાળી દૂતાવાસ દ્વારા પાકિસ્તાની સરકાર સાથે સતત સંપર્કમાં છે.

નેપાળના પર્યટન મંત્રી ખડક પ્રસાદ પૌડેલે સોશિયલ મીડિયા પર જણાવ્યું હતું કે તેઓ પરિસ્થિતિ પર નજર રાખી રહ્યા છે અને પર્વતારોહકોના સુરક્ષિત પરત ફરવાની આશા રાખી રહ્યા છે.

આલ્પાઇન ક્લબ કરી રહ્યું છે સંકલન

આલ્પાઇન ક્લબ ઓફ પાકિસ્તાનના ઉપાધ્યક્ષ કરાર હૈદરીએ જણાવ્યું હતું કે હિમપ્રપાત પછી આખી ટીમ સાથેનો સંપર્ક તૂટી ગયો છે. ક્લબે જણાવ્યું હતું કે તેઓ સરકારી અધિકારીઓ સાથે મળીને શક્ય તમામ સંસાધનો એકત્ર કરવાનો પ્રયાસ કરી રહ્યા છે.

દિવ્ય ભાસ્કરને Google પર મનપસંદ સોર્સ બનાવો