નાના પડદાની લોકપ્રિયતાને મોટા પડદા પર લાભ ઉઠાવવાના પ્રયત્નો ઘણીવાર જોખમી હોય છે. ત્યારે ‘ભાભીજી ઘર પર હૈં’ ફિલ્મ આ જ જોખમનું નિષ્ફળ ઉદાહરણ છે. જે પાત્રો ટીવી પર ખડખડાટ હસાવતા હતા, તે જ પાત્રો બે કલાકની ફિલ્મમાં થાક અને કંટાળો પેદા કરે છે.

વાર્તાની જગ્યાએ ઘોંઘાટ છે, હાસ્યની જગ્યાએ અશ્લીલતા છે અને મનોરંજનની જગ્યાએ હતાશા છે. વાર્તા અશ્લીલ મજાકોથી ભરપૂર છે. આ ફિલ્મ શુક્રવારે રિલીઝ થઈ ચૂકી છે. આ ફિલ્મને દિવ્ય ભાસ્કરે 5 માંથી 1 સ્ટારનું રેટિંગ આપ્યું છે.

‘ભાભીજી ઘર પર હૈં’માં રવિ કિશન અને મુકેશ તિવારી મહત્ત્વની ભૂમિકામાં છે.

ફિલ્મની વાર્તા શું છે?

મનમોહન તિવારી અને વિભૂતિ મિશ્રાની પડોશી હરીફાઈ વચ્ચે બે ગુંડા ભાઈઓ શાંતિ અને ક્રાંતિની એન્ટ્રી થાય છે. બંનેને અંગૂરી અને અનિતા સાથે પ્રેમ થઈ જાય છે અને અહીંથી જ ભાગદોડ અને બળજબરીથી રચાયેલી ઘટનાઓની લાંબી શૃંખલા શરૂ થાય છે. વાર્તા આગળ વધવાને બદલે વારંવાર ટુચકાઓના સહારે ટકે છે. ફાર્ટ સંબંધિત સંવાદો, દ્વિઅર્થી ટિપ્પણીઓ અને શરીર પર કેન્દ્રિત હાસ્ય એટલા બધાં છે કે કથાનું કોઈ સંતુલન બની શકતું નથી. ઘણા દૃશ્યો અસ્વસ્થ કરે છે, ઘણા કંટાળાજનક લાગે છે અને અંત સુધી આવતાં આવતાં દર્શકનો ધૈર્ય જવાબ દેવા લાગે છે.

સ્ટારકાસ્ટની એક્ટિંગ કેવી છે?

આસિફ શેખ અને રોહિતાશ ગૌર તેમના પરિચિત પાત્રોમાં સહજ છે, પરંતુ પટકથા તેમને મર્યાદિત કરી દે છે. શુભાંગી અત્રે કેટલીક ક્ષણોમાં ચમકે છે, પણ તેના ભાગે પણ પુનરાવર્તન જ આવે છે. વિદિશા શ્રીવાસ્તવને કરવા માટે બહુ ઓછું મળે છે.

રવિ કિશન ઊર્જા લાવવાનો પ્રયાસ કરે છે, પરંતુ નબળું લેખન તેમની હાજરીનો પૂરો લાભ ઉઠાવી શકતું નથી. સહાયક કલાકારોની ભીડ છે, પણ તેમનો ઉપયોગ વાર્તાને મજબૂત કરવામાં થઈ શકતો નથી.

‘ભાભીજી ઘર પર હૈં’ ફિલ્મમાં શુભાંગી અત્રે જ ‘અંગૂરી ભાભી’નું પાત્ર ભજવી રહી છે.

ફિલ્મનું ડિરેક્શન અને તકનીકી પાસું કેવું છે?

ડિરેક્ટરે ટીવીની દુનિયાને જેવી હતી, તેવી જ મોટા પડદા પર ઉતારી દીધી, પરંતુ સિનેમાની માંગણીઓ અનુસાર વિસ્તરણ આપ્યું નહીં. પટકથામાં કડકાઈ નથી, સંપાદન ઢીલું છે અને ઘણા દૃશ્યો બિનજરૂરી રીતે ખેંચાય છે.

વિઝ્યુઅલ કમ્પોઝિશન સાધારણ છે, બેકગ્રાઉન્ડ મ્યુઝિક અસર છોડતું નથી. આખી ફિલ્મ એક એવા વિસ્તૃત એપિસોડ જેવી લાગે છે, જેને કોઈ નક્કર કારણ વગર લાંબો કરી દેવામાં આવ્યો હોય.

ફાઇનલ વર્ડિક્ટ, જોવી કે નહીં?

આ ફિલ્મ તેના પ્રશંસકોને જૂનો સ્વાદ આપવાનો પ્રયાસ કરે છે, પરંતુ તે જ સ્વાદ અહીં વાસી અને બનાવટી લાગે છે. જો સિનેમા પાસેથી અપેક્ષા હોય તો આ અનુભવ નિરાશ કરશે. એક સ્ટાર, અને તે પણ ફક્ત કલાકારોની મહેનતના નામે.