બોલિવૂડ એક્ટર પંકજ ત્રિપાઠી તાજેતરમાં આઇફાના કનેક્સ ઇવેન્ટમાં સામેલ થયા. અહીં તેમણે સોશિયલ મીડિયા અને એક્ટિંગ સાથે જોડાયેલા ઘણા મજેદાર પ્રશ્નોના જવાબ આપ્યા. જ્યારે તેમને પૂછવામાં આવ્યું કે, જો તેઓ પોતાની યુ-ટ્યુબ ચેનલ શરૂ કરશે તો શું કરશે? તો તેમણે રમુજી અંદાજમાં જણાવ્યું કે, તેઓ મોટિવેશનલ સ્પીકર બનશે.

ઇવેન્ટમાં પંકજ ત્રિપાઠીએ ઓફ કેમેરા પોતાના મોટા ભાઈની તબિયત સાથે જોડાયેલું અપડેટ પણ આપ્યું. તેમણે જણાવ્યું કે, બિહારમાં થયેલા હુમલા બાદ હવે તેમના ભાઈની તબિયત પહેલા કરતા સારી છે.

પંકજ ત્રિપાઠીએ પોઝ આપ્યા.

‘યુ-ટ્યુબ ચેનલ પર પ્રવચન આપીશ’

ઇવેન્ટ દરમિયાન હોસ્ટ દિયા મિર્ઝાએ પંકજ ત્રિપાઠીને પૂછ્યું કે, ‘જો તમે ક્યારેય યુ-ટ્યુબ પર આવો, તો તમારું કન્ટેન્ટ કેવું હશે?’ આના પર પંકજ ત્રિપાઠીએ હસતાં હસતાં જવાબ આપ્યો, ‘હું પ્રવચન કરીશ અને મોટિવેશનલ સ્પીકર બનીશ.’ તેમણે આગળ મજાક કરતાં કહ્યું કે, ‘આજના સમયમાં મોટિવેટ થનારા લોકો ઓછા બચ્યા છે અને મોટિવેશનલ સ્પીકર વધારે થઈ ગયા છે. બીજાને મોટિવેટ કરનારને શોધવામાં આવી રહ્યા છે, પરંતુ મોટિવેટ થવા માટે કોઈ બચ્યું જ નથી.’

પંકજ ત્રિપાઠીને પ્રશ્ન પૂછતી હોસ્ટ દિયા મિર્ઝા.

‘મારું નામ ‘ઓથેન્ટિસિટી કુમાર’ છે’

જ્યારે પંકજ ત્રિપાઠીને પૂછવામાં આવ્યું કે, શું તેમના પર સોશિયલ મીડિયા પર સક્રિય રહેવાનું કે અભિનય દરમિયાન વધુ લાઉડ પર્ફોર્મન્સ આપવાનું દબાણ રહે છે? તો તેમણે સ્પષ્ટ ઇનકાર કર્યો. તેમણે કહ્યું, ‘મારા પર આવું કોઈ દબાણ નથી રહેતું. મેકર્સ મને કહે છે કે તમે જે કરો છો, તે જ સ્ક્રીન પર કરી દો. મને તો એ જ અંદાજના પૈસા મળે છે, જે હું ખરેખરમાં કરું છું.’ તેમણે પોતાની સાદગી અને ઓરિજિનાલિટી વિશે વાત કરતા પોતાને રમુજી અંદાજમાં ‘ઓથેન્ટિસિટી કુમાર’ ગણાવ્યા.

‘ભાઈની તબિયતમાં સુધારો થઈ રહ્યો છે’

ઇવેન્ટ દરમિયાન પંકજ ત્રિપાઠીએ ઓફ કેમેરા પોતાના મોટા ભાઈ વિજેન્દ્ર નાથ તિવારીની તબિયત વિશે માહિતી આપી. તેમણે જણાવ્યું કે, તેમના ભાઈની તબિયત હવે પહેલાં કરતા સારી છે અને તેઓ ધીમે ધીમે રિકવર કરી રહ્યા છે. નોંધનીય છે કે, તાજેતરમાં 21 જૂને બિહારના ગોપાલગંજ જિલ્લામાં તેમના ભાઈ પર હુમલો થયો હતો, જેના પછી પંકજ ત્રિપાઠી પોતાના પરિવારને મળવા પટના પહોંચ્યા હતા. હાલમાં તેમના ભાઈની સારવાર પટનાની હોસ્પિટલમાં ચાલી રહી છે.

પંકજ ત્રિપાઠીના ભાઈને તાત્કાલિક હૉસ્પિટલમાં ખસેડવામાં આવ્યા હતા.

જમીન વિવાદમાં કુહાડી વડે હુમલો થયો હતો

ગોપાલગંજ પોલીસના જણાવ્યા અનુસાર, આ ઘટના માધોપુર પોલીસ સ્ટેશન વિસ્તારના બેલસંડ ગામમાં બની હતી. પંકજ ત્રિપાઠીના મોટા ભાઈ વિજેન્દ્ર નાથ તિવારી તેમના ઘરની બહાર બેઠા હતા, ત્યારે જૂના જમીન વિવાદ અને ઘર પાસે માટી ફેંકવાની વાતને લઈને તેમના પાડોશી રાજેશ સાહે તેમના પર કુહાડી વડે હુમલો કર્યો. હુમલામાં તેમની પીઠ અને ખભા પર ગંભીર ઈજાઓ થઈ હતી.

ઘટનાની જાણ થતાં જ પોલીસ પણ ઘટનાસ્થળે પહોંચી હતી.

તેમને પહેલા ગોપાલગંજ સદર હોસ્પિટલ લઈ જવામાં આવ્યા હતા, જ્યાંથી ગંભીર હાલત જોતા ડોકટરોએ તેમને પટનાની હોસ્પિટલમાં રેફર કર્યા હતા. પોલીસે મુખ્ય આરોપીની ધરપકડ કરી લીધી છે અને હુમલામાં ઉપયોગમાં લેવાયેલી કુહાડી પણ જપ્ત કરી લીધી છે.

દિવ્ય ભાસ્કરને Google પર મનપસંદ સોર્સ બનાવો