પાકિસ્તાન ક્રિકેટ બોર્ડ (PCB) એ 2026 ટી-20 વર્લ્ડ કપમાં બાંગ્લાદેશની મેચો પાકિસ્તાનમાં યોજવાની ઓફર ઇન્ટરનેશનલ ક્રિકેટ કાઉન્સિલ (ICC) સમક્ષ મૂકી છે.

પાકિસ્તાની મીડિયા રિપોર્ટ જિયો ન્યૂઝ અનુસાર, બાંગ્લાદેશ ક્રિકેટ બોર્ડ (BCB) એ સુરક્ષા કારણોનો હવાલો આપતા ભારતમાં રમવાનો ઇનકાર કર્યો છે અને પોતાની મેચો શ્રીલંકામાં કરાવવાની માગ કરી છે. આ પછી PCB એ ICC ને જાણ કરી કે જો શ્રીલંકામાં મેચ કરાવવી શક્ય ન હોય, તો પાકિસ્તાન પોતાના સ્ટેડિયમ બાંગ્લાદેશની મેચો માટે ઉપલબ્ધ કરાવી શકે છે.

જોકે, આ સમગ્ર મામલે અત્યાર સુધી ન તો PCB કે ન તો ICC તરફથી કોઈ સત્તાવાર નિવેદન બહાર પાડવામાં આવ્યું છે.

શું છે સમગ્ર વિવાદ?

16 ડિસેમ્બરે યોજાયેલી IPL મિની ઓક્શનમાં કોલકાતા નાઈટ રાઈડર્સ (KKR) એ બાંગ્લાદેશી ફાસ્ટ બોલર મુસ્તફિઝુર રહેમાનને 9.20 કરોડ રૂપિયામાં ખરીદ્યો હતો. આ પછી બાંગ્લાદેશમાં હિંદુઓની હત્યાની ઘટનાઓને લઈને ભારતમાં મુસ્તફિઝુર વિરુદ્ધ વિરોધ શરૂ થઈ ગયો. અત્યાર સુધી ત્યાં છ હિંદુઓની હત્યા કરવામાં આવી છે.

આ પછી ભારતીય ક્રિકેટ કંટ્રોલ બોર્ડ (BCCI) એ મુસ્તફિઝુરને IPL રમવાની મંજૂરી આપી ન હતી, જેના કારણે 3 જાન્યુઆરીએ KKR એ તેમને ટીમમાંથી રિલીઝ કરી દીધા.

બાંગ્લાદેશે IPL પ્રસારણ પર પ્રતિબંધ લગાવ્યો

KKR દ્વારા મુસ્તફિઝુરને રિલીઝ કર્યા પછી, બાંગ્લાદેશ ક્રિકેટ બોર્ડ અને ત્યાંની સરકારે IPLના પ્રસારણ પર પ્રતિબંધ મૂક્યો. આ સાથે જ બાંગ્લાદેશે ભારતમાં ટી-20 વર્લ્ડ કપની મેચો રમવાનો પણ ઇનકાર કર્યો અને સ્થળ બદલવાની માગ સાથે ICCને ઈ-મેલ મોકલ્યો.

T20 વર્લ્ડ કપમાં ગ્રુપ-Cમાં છે બાંગ્લાદેશ

ટી-20 વર્લ્ડ કપમાં બાંગ્લાદેશને ગ્રુપ-Cમાં રાખવામાં આવ્યું છે. ટીમ 7 ફેબ્રુઆરીએ વેસ્ટ ઈન્ડિઝ, 9 ફેબ્રુઆરીએ ઈટાલી અને 14 ફેબ્રુઆરીએ ઈંગ્લેન્ડ સામે મુકાબલો કરશે. આ ત્રણેય મેચ કોલકાતાના ઈડન ગાર્ડન્સ સ્ટેડિયમમાં રમાવાની છે.

આ ઉપરાંત, બાંગ્લાદેશની છેલ્લી ગ્રુપ સ્ટેજ મેચ 17 ફેબ્રુઆરીએ મુંબઈમાં નેપાળ સામે નિર્ધારિત છે.