ટેક જાયન્ટ ગૂગલે એન્ડ્રોઇડ વપરાશકર્તાઓની સુરક્ષા માટે અત્યાર સુધીનું સૌથી મોટું પગલું ભર્યું છે. તાજેતરના અહેવાલ મુજબ, ગૂગલે પ્લે સ્ટોર પરથી 1.75 મિલિયન (17.5 લાખ) થી વધુ નકલી અને જોખમી એપ્લિકેશન્સને હટાવી દીધી છે. આ એપ્સ ગૂગલની કડક ગોપનીયતા નીતિઓનું ઉલ્લંઘન કરી રહી હતી અને વપરાશકર્તાઓના ડેટા માટે ગંભીર ખતરો ઉભો કરી રહી હતી.

ગૂગલે માત્ર એપ્સને જ નથી હટાવી, પરંતુ આ કૌભાંડ પાછળ રહેલા 80,000 એપ ડેવલપર્સના એકાઉન્ટ્સ પણ કાયમી ધોરણે લોક કરી દીધા છે. આ એવા ડેવલપર્સ હતા જે વારંવાર નીતિઓનું ઉલ્લંઘન કરતા હતા અને છેતરપિંડીના હેતુથી એપ્સ બનાવતા હતા.

ગૂગલે આ સફળતા માટે AI (આર્ટિફિશિયલ ઇન્ટેલિજન્સ) ડિટેક્શન ટૂલ્સનો ઉપયોગ કર્યો છે.આ ટૂલની મદદથી મોટાભાગની એપ્સ વપરાશકર્તાઓ ડાઉનલોડ કરે તે પહેલાં જ બ્લોક કરી દેવામાં આવી હતી.AI ટૂલ્સે લગભગ 2.55 લાખ એપ્સને વપરાશકર્તાઓનો સંવેદનશીલ ડેટા ચોરતા અટકાવી હતી.ગૂગલે 160 મિલિયન (16 કરોડ) થી વધુ નકલી રેટિંગ્સ અને રિવ્યુઝને પણ દૂર કર્યા છે, જે લોકોને છેતરવા માટે કરવામાં આવ્યા હતા.

ગૂગલના જણાવ્યા અનુસાર, આ પ્રતિબંધિત એપ્સમાં ખતરનાક માલવેર અને સ્પાયવેર હતા. આ એપ્સ મુખ્યત્વે નીચે મુજબના જોખમો ઉભા કરતી હતી:

નાણાકીય છેતરપિંડી: બેંકિંગ વિગતો ચોરીને પૈસા ઉપાડી લેવા.

હિડન સબ્સ્ક્રિપ્શન્સ: વપરાશકર્તાની જાણ બહાર પેઇડ સેવાઓ શરૂ કરી દેવી.

ડેટા પ્રાઈવસી: અંગત ફોટા, કોન્ટેક્ટ્સ અને મેસેજની ચોરી કરવી.

ગૂગલે વપરાશકર્તાઓને સલાહ આપી છે કે કોઈપણ એપ ડાઉનલોડ કરતા પહેલા તેના ડેવલપરની વિગતો અને રિવ્યુ ચોક્કસ તપાસવા. કંપની 2025 સુધીમાં એન્ડ્રોઇડ ઇકોસિસ્ટમને સંપૂર્ણપણે ‘સ્કેમ-ફ્રી’ બનાવવાનું લક્ષ્ય રાખી રહી છે