કોકરોચ જનતા પાર્ટી (CJP)ના નેતૃત્વ હેઠળ વિદ્યાર્થીઓના વિરોધ પ્રદર્શન દરમિયાન વડાપ્રધાન નરેન્દ્ર મોદી વિરુદ્ધ ઉપયોગમાં લેવાયેલી અપમાનજનક ભાષા પર એક્ટ્રેસ ભૂમિ પેડનેકરે સખત વાંધો ઉઠાવ્યો છે. ભૂમિએ પોતાના ઇન્સ્ટાગ્રામ પર એક વીડિયો જાહેર કરીને કહ્યું કે દેશના સર્વોચ્ચ પદ પર બેઠેલા વ્યક્તિ વિરુદ્ધ આવી ભાષાનો ઉપયોગ બિલકુલ ખોટો છે. NEET પેપર લીક વિવાદને લઈને ચાલી રહેલા આ પ્રદર્શનમાં સૂત્રોચ્ચારનો વીડિયો સોશિયલ મીડિયા પર વાયરલ થયા બાદ ભૂમિ પેડનેકર, અભિનેતા મુકેશ ખન્ના અને સાંસદ કંગના રનૌત સહિત અનેક મોટી હસ્તીઓની પ્રતિક્રિયા સામે આવી છે. આપણી સંસ્કૃતિ નથી, યુવાનોને સંયમ રાખવાની જરૂર છે ભૂમિ પેડનેકરે પોતાના વીડિયો સંદેશમાં કહ્યું કે શિક્ષણ અને વ્યવસ્થા સાથે જોડાયેલા મુદ્દાઓ પર સવાલ ઉઠાવવાનો હક બધાને છે, પરંતુ પોતાની વાત રજૂ કરવાની રીત સાચી હોવી જોઈએ. તેમણે કહ્યું, “સોશિયલ મીડિયા પર સામે આવી રહેલા વીડિયોમાં જે પ્રકારની ભાષાનો ઉપયોગ આપણા દેશના યુવાનો કરી રહ્યા છે, તે ખૂબ જ ચિંતાજનક છે. આપણે આપણા દેશના સૌથી ઊંચા પદ પર બેઠેલા વ્યક્તિ વિશે વાત કરી રહ્યા છીએ. શું આપણે આપણા ઘરના વડીલો સાથે ક્યારેય આ રીતે વાત કરીએ છીએ?” ભૂમિએ જનરલ-ઝેડ (Gen Z) ને દેશની સંસ્કૃતિ અને સંવાદની પરંપરાનું સન્માન કરવા અપીલ કરી. મુકેશ ખન્નાએ પ્રદર્શનકારીઓને ‘કોકરોચ’ ગણાવ્યા એક્ટર મુકેશ ખન્નાએ પણ આ મુદ્દે ઇન્સ્ટાગ્રામ પર વીડિયો પોસ્ટ કરીને પ્રદર્શનકારીઓ પર આકરો હુમલો કર્યો હતો. તેમણે પ્રદર્શનનું સમર્થન કરનારાઓને ‘કોકરોચ’ ગણાવીને દેશમાંથી બહાર ફેંકી દેવાની વાત કરી હતી. મુકેશ ખન્નાએ આરોપ લગાવ્યો હતો કે આ પ્રદર્શન અસલી વિદ્યાર્થીઓનું નથી, પરંતુ સરકારને અસ્થિર કરવાના એજન્ડા હેઠળ વિદ્યાર્થીઓનો ઉપયોગ કરવામાં આવી રહ્યો છે. તેમણે વિદ્યાર્થીઓને ચેતવણી આપતા કહ્યું કે આવી પ્રવૃત્તિઓમાં સામેલ થવાથી ભવિષ્યમાં નોકરી અને વિઝા મેળવવામાં મુશ્કેલી પડી શકે છે, તેથી તેઓ સમયસર તેનાથી દૂર રહે. NEET પેપર લીકથી શરૂ થયેલો વિવાદ આખો મામલો NEET-UG 2026 પરીક્ષાના પેપર લીક થવાની ઘટના બાદ શરૂ થયો. તેના વિરોધમાં વિદ્યાર્થીઓ અને રાજકીય સંગઠનોએ પ્રદર્શનો શરૂ કર્યા હતા. જોકે, પ્રદર્શન દરમિયાન સુરક્ષાકર્મીઓ અને રાજકીય હસ્તીઓ વિરુદ્ધ કથિત રીતે ઉપયોગમાં લેવાયેલી અપમાનજનક ભાષા બાદ આ મામલો દેશભરમાં ચર્ચાનો વિષય બન્યો છે. જ્યાં એક તરફ વિદ્યાર્થીઓ નિષ્પક્ષ તપાસની માંગ કરી રહ્યા છે, ત્યાં બીજી તરફ બોલિવૂડ હસ્તીઓએ પ્રદર્શનની રીતો પર સવાલો ઉભા કર્યા છે.