PM Modi France President Macron Mumbai Meeting; India France 114 Rafale Jet Defense Deal PHOTOS VIDEOS
મુંબઈ4 કલાક પેહલા
- કૉપી લિંક
મંગળવારે ફ્રાન્સના રાષ્ટ્રપતિ ઇમેન્યુઅલ મેક્રોન ભારત પહોંચ્યા. તેમણે મુંબઈમાં વડાપ્રધાન મોદી સાથે મુલાકાત કરી. બંને નેતાઓએ સંયુક્ત રીતે ટાટા-એરબસ H-125 હેલિકોપ્ટર એસેમ્બલી લાઇનનું ઓનલાઇન ઉદ્ઘાટન કર્યું.
મુંબઈમાં એક સંયુક્ત પત્રકાર પરિષદ દરમિયાન, મોદીએ જણાવ્યું હતું કે ભારત અને ફ્રાન્સ ભારતમાં સંયુક્ત રીતે એવા હેલિકોપ્ટરનું ઉત્પાદન કરશે જે માઉન્ટ એવરેસ્ટ જેટલી ઊંચાઈએ ઉડી શકે.
મોદીએ ફ્રાન્સને ભારતનો ખાસ ભાગીદાર ગણાવ્યું અને કહ્યું કે બંને દેશોએ તેમના સંબંધોને “સ્પેશિયલ સ્ટ્રેટેજીક પાર્ટનરશિપ” સુધી અપગ્રેડ કરવાનો નિર્ણય લીધો છે.
“સ્પેશિયલ સ્ટ્રેટેજીક પાર્ટનરશિપ” નો અર્થ એ છે કે બંને દેશો ફક્ત વેપાર અથવા શસ્ત્રોના વેપાર સુધી મર્યાદિત રહેશે નહીં, પરંતુ સુરક્ષા, ટેકનોલોજી, અવકાશ, દરિયાઈ સુરક્ષા અને મુખ્ય વૈશ્વિક મુદ્દાઓ પર સાથે મળીને કામ કરશે.
મેક્રોને કહ્યું કે ભારત એક ભરોસાપાત્ર ભાગીદાર છે અને ફ્રાન્સ ભારત સાથે ટેકનોલોજી શેર કરવામાં માને છે.
ફ્રાન્સના રાષ્ટ્રપતિની ભારત મુલાકાતની 6 તસવીરો…
મોદી અને મેક્રોને કર્ણાટકના વેમગલમાં ટાટા-એરબસના H125 લાઇટ યુટિલિટી હેલિકોપ્ટરની ફાઈનલ એસેમ્બલી લાઇનનું ઓનલાઈન ઉદ્ઘાટન કર્યું.
પીએમ મોદી મુંબઈના લોકભવનમાં ફ્રાન્સના રાષ્ટ્રપતિ ઇમેન્યુઅલ મેક્રોનને મળ્યા.
ઇમેન્યુઅલ મેક્રોન મુંબઈમાં અનિલ કપૂર અને મનોજ બાજપેયી સહિત અનેક બોલિવૂડ સેલિબ્રિટીઓને પણ મળ્યા હતા.
બોલિવૂડ અભિનેતા અનિલ કપૂર સાથે વાત કરતા ફ્રાન્સના રાષ્ટ્રપતિ.
પીએમ મોદીના આમંત્રણ પર ફ્રાન્સના રાષ્ટ્રપતિ મેક્રોન તેમની પત્ની સાથે ત્રણ દિવસની ભારત મુલાકાતે આવ્યા છે.
મહારાષ્ટ્રના મુખ્યમંત્રી દેવેન્દ્ર ફડણવીસે મુંબઈ એરપોર્ટ પર મેક્રોનનું સ્વાગત કર્યું.
ફ્રાન્સના રાષ્ટ્રપતિ ઇમેન્યુઅલ મેક્રોનની ભારત મુલાકાત સંબંધિત મુખ્ય અપડેટ્સ વાંચવા માટે, નીચે આપેલા બ્લોગ પર જાઓ…
અપડેટ્સ
01:39 PM17 ફેબ્રુઆરી 2026
- કૉપી લિંક
મેક્રોને કહ્યું, ભારત હવે લીડરશિપ કરનારો દેશ બની ગયો
ભારત-ફ્રાન્સ ઇનોવેશન ફોરમમાં, ફ્રેન્ચ રાષ્ટ્રપતિ મેક્રોને ભારતની વૈશ્વિક ભૂમિકાની પ્રશંસા કરી. તેમણે કહ્યું કે આલ્ફાબેટના સીઈઓ ભારતીય છે, માઇક્રોસોફ્ટના સીઈઓ ભારતીય છે, આઈબીએમના સીઈઓ ભારતીય છે, એડોબના સીઈઓ ભારતીય છે અને પાલો અલ્ટો નેટવર્ક્સના સીઈઓ પણ ભારતીય છે.
મેક્રોને કહ્યું કે ભારત ફક્ત વૈશ્વિક સ્તરે થઈ રહેલા નવા સંશોધનો અને નવી ટેકનોલોજીમાં ભાગ લેનાર નથી, આગળ વધીને નેતૃત્વ કરનાર છે.
01:31 PM17 ફેબ્રુઆરી 2026
- કૉપી લિંક
મોદીએ કહ્યું, ભારત પાસે વિશ્વની ત્રીજી સૌથી મોટી ઇકોસિસ્ટમ
ઇન્ડિયા-ફ્રાન્સ ઇનોવેશન ફોરમને સંબોધતા પીએમ મોદીએ કહ્યું કે ભારત વિશ્વની ત્રીજી સૌથી મોટી સ્ટાર્ટઅપ ઇકોસિસ્ટમ બની ગયું છે.
01:06 PM17 ફેબ્રુઆરી 2026
- કૉપી લિંક
મનોજ બાજપેયીએ મેક્રોન સાથે તસવીર શેર કરી
બોલીવૂડ અભિનેતા મનોજ બાજપેયીએ મેક્રોન સાથેનો ફોટો શેર કર્યો હતો. તેમણે સોશિયલ મીડિયા પોસ્ટમાં લખ્યું છે કે આજે લંચમાં ફ્રાન્સના રાષ્ટ્રપતિ મેક્રોનને મળવું સન્માનની વાત છે. અન્ય ઘણા ખાસ મહેમાનો પણ હાજર હતા.
વાતચીત ફક્ત ઔપચારિક નહોતી, પરંતુ ખૂબ જ ખુલ્લી અને રસપ્રદ હતી. ખાસ કરીને, સિનેમા, સંસ્કૃતિ અને કહાનીઓ દ્વારા દેશોને એકબીજાની નજીક લાવવા વિશે સારી ચર્ચા થઈ.
ફિલ્મ અને સંસ્કૃતિના ક્ષેત્રમાં ભારત અને ફ્રાન્સ સાથે મળીને શું કરી શકે છે તેની ચર્ચા કરતી વખતે આજના સમયમાં સમજદાર નેતૃત્વ અને સાંસ્કૃતિક સંવાદ મહત્વપૂર્ણ લાગ્યો.
12:42 PM17 ફેબ્રુઆરી 2026
- કૉપી લિંક
મોદીએ કહ્યું, ભારત અને ફ્રાન્સ આતંકવાદ ખતમ કરવા સાથે છે
પીએમ મોદીએ કહ્યું કે ભારત અને ફ્રાન્સ બંને લોકશાહી, કાયદાના શાસન અને એવી દુનિયામાં માને છે જ્યાં બહુવિધ શક્તિઓ સંતુલન જાળવવા માટે સાથે મળીને કામ કરે છે. તેમણે કહ્યું કે બંને દેશો માને છે કે વૈશ્વિક સંસ્થાઓમાં સુધારો જરૂરી છે, કારણ કે ત્યારે જ વિશ્વની મુખ્ય સમસ્યાઓનો ઉકેલ આવી શકે છે.
તેમણે કહ્યું કે ભારત અને ફ્રાન્સ દરેક જગ્યાએ શાંતિ પ્રયાસોને સમર્થન આપતા રહેશે, પછી ભલે તે યુક્રેન હોય, પશ્ચિમ એશિયા હોય કે પછી ઈન્ડો-પેસિફિક ક્ષેત્ર હોય. બંને દેશો તમામ પ્રકારના આતંકવાદને નાબૂદ કરવા માટે એક છે.
12:27 PM17 ફેબ્રુઆરી 2026
- કૉપી લિંક
મેક્રોને કહ્યું, ભારત-ફ્રાન્સ સંબંધો ખાસ અને અનોખા
મેક્રોને કહ્યું કે ભારત અને ફ્રાન્સ વચ્ચેના દ્વિપક્ષીય સંબંધો ખરેખર ખાસ અને અનોખા છે. આ સંબંધ વિશ્વાસ, ખુલ્લાપણું અને મહત્વાકાંક્ષા પર આધારિત છે. મેક્રોને કહ્યું, “આજે અમે બંને દેશો વચ્ચેની આ ભાગીદારીને એક નવા સ્તરે વધારવાનો નિર્ણય લીધો છે. હવે તેને ‘સ્પેશિયલ સ્ટ્રેટેજીક પાર્ટનરશિપ’નો દરજ્જો આપવામાં આવશે.
12:24 PM17 ફેબ્રુઆરી 2026
- કૉપી લિંક
મોદી-મેક્રોને ટાટા-એરબસ હેલિકોપ્ટર એસેમ્બલી લાઇનનું ઉદ્ઘાટન કર્યું
વડાપ્રધાન મોદી અને ફ્રાન્સના રાષ્ટ્રપતિ ઇમેન્યુઅલ મેક્રોનએ કર્ણાટકના વેમગલમાં ટાટા એરબસના H125 લાઇટ યુટિલિટી હેલિકોપ્ટરની અંતિમ એસેમ્બલી લાઇનનું ઓનલાઈન ઉદ્ઘાટન કર્યું.
વડાપ્રધાન મોદી અને રાષ્ટ્રપતિ મેક્રોને આ પ્રોજેક્ટને ભારત-ફ્રાન્સ ભાગીદારીનું ઉદાહરણ ગણાવતા કહ્યું કે આ પગલું બંને દેશોના ટેકનોલોજીકલ સહયોગ અને સંરક્ષણ ઉદ્યોગ સહયોગને વધુ આગળ વધારશે.
12:23 PM17 ફેબ્રુઆરી 2026
- કૉપી લિંક
ભારત-ફ્રાન્સ ભાગીદારી વૈશ્વિક સ્થિરતા માટે મજબૂત તાકાત
પીએમ મોદીએ કહ્યું કે ભારત અને ફ્રાન્સ હવે મહત્વપૂર્ણ ખનિજો, બાયોટેકનોલોજી અને નવા પ્રકારના અદ્યતન સામગ્રીના ક્ષેત્રોમાં તેમના સહયોગને વધુ આગળ વધારી રહ્યા છે.
તેમણે માહિતી આપી કે આરોગ્ય ક્ષેત્રમાં ભારત-ફ્રાન્સ સેન્ટર ફોર એઆઈની સ્થાપના કરવામાં આવી રહી છે. ડિજિટલ સાયન્સ અને ટેકનોલોજી માટે એક જોઈન્ટ સેન્ટર પણ બનાવાશે. અને એવિએશન સ્કીલ ડેવલપમેન્ટ માટે રાષ્ટ્રીય ગઠબંધન કેન્દ્ર શરૂ કરવામાં આવી રહ્યું છે.
મોદીએ કહ્યું કે વિશ્વ હાલમાં અનિશ્ચિત સમયમાંથી પસાર થઈ રહ્યું છે. આવા સમયમાં, ભારત-ફ્રાન્સ ભાગીદારી વૈશ્વિક સ્થિરતા માટે એક મજબૂત બળ બની શકે છે. તેમણે કહ્યું કે ફ્રેન્ચ કુશળતા અને ભારતની વિશાળ ક્ષમતાઓને જોડીને વિશ્વસનીય ટેકનોલોજી વિકસાવવામાં આવી રહી છે.
12:20 PM17 ફેબ્રુઆરી 2026
- કૉપી લિંક
મોદીએ કહ્યું, બંને દેશો ઈન્ડસ્ટ્રીને જોડશે
પીએમ મોદીએ કહ્યું કે સંરક્ષણ હોય, સ્વચ્છ ઉર્જા હોય કે અવકાશ, બંને દેશો હવે તેમના ઉદ્યોગોને જોડશે. તેમણે એમ પણ કહ્યું કે જોઈન્ટ ઈનોવેશન માટે નવા કેન્દ્રો સ્થાપિત કરવામાં આવશે. વધુમાં, બંને દેશો મહત્વપૂર્ણ ખનીજો અને બાયોટેકનોલોજીના ક્ષેત્રોમાં તેમના સહયોગને મજબૂત બનાવી રહ્યા છે.
12:19 PM17 ફેબ્રુઆરી 2026
- કૉપી લિંક
મેક્રોને કહ્યું કે ભારત સાથે ટેકનોલોજી શેર કરવામાં ભરોસો છે
ફ્રાન્સના રાષ્ટ્રપતિ મેક્રોને જણાવ્યું હતું કે ફ્રાન્સ ભારત માટે વિશ્વસનીય ભાગીદાર બનવા માંગે છે. તેમણે કહ્યું હતું કે ફ્રાન્સ ભારત સાથે ટેકનોલોજી શેર કરવામાં માને છે. ભારત પર ભરોસો છે.
મેક્રોને એમ પણ કહ્યું હતું કે ફ્રાન્સ વ્યૂહાત્મક સ્વાયત્તતામાં માને છે, એટલે કે પોતાના નિર્ણયો લેવા અને સ્વતંત્ર નીતિઓ અપનાવવી.
12:18 PM17 ફેબ્રુઆરી 2026
- કૉપી લિંક
મોદીએ કહ્યું, ભારત-ફ્રાન્સ ભાગીદારી સામાન્ય લોકોની પાર્ટનરશિપમાં બદલાઈ
પીએમ મોદીએ કહ્યું કે ભારત-ફ્રાન્સ ઈનોવેશન યરની શરૂઆત સાથે, બંને દેશો વચ્ચેની રણનીતિક ભાગીદારી હવે સામાન્ય લોકોની ભાગીદારીમાં બદલાઈ રહી છે. એકલું ઈનોવેશન શક્ય નથી; સાથે મળીને કામ કરવું જરૂરી છે.
તેમણે કહ્યું કે આ ઈનોવેશન યર દરમિયાન, બંને દેશો લોકો-થી-લોકોના સંબંધોને વધુ મજબૂત બનાવવાનું લક્ષ્ય રાખે છે. પછી ભલે તે સંરક્ષણ હોય, સ્વચ્છ ઉર્જા હોય, સ્પેસ કે નવી ટેકનોલોજી હોય, બંને દેશો દરેક ક્ષેત્રમાં તેમના ઉદ્યોગો અને નવીનતાઓને જોડશે.
PMએ કહ્યું કે સ્ટાર્ટઅપ્સ અને નાના અને મધ્યમ કદના ઉદ્યોગો વચ્ચે એક મજબૂત નેટવર્ક બનાવવામાં આવશે. વિદ્યાર્થીઓ અને રિસર્ચર વચ્ચે આદાન-પ્રદાનને સરળ બનાવવામાં આવશે, અને જોઈન્ટ ઈનોવેશન માટે નવા સેન્ટર પણ ખુલશે.
12:14 PM17 ફેબ્રુઆરી 2026
- કૉપી લિંક
મેક્રોને કહ્યું, ભારત સાથેની ભાગીદારીને સ્પેશિયલ સ્ટ્રેટેજીક ભાગીદારીમાં બદલીશું
મેક્રોને કહ્યું, ભારતની મારી ચોથી મુલાકાત પર મારું સ્વાગત કરવા બદલ પીએમ મોદીનો આભાર. અમે આ ભાગીદારીને ખાસ સ્ટ્રેટેજીક ભાગીદારી સુધી પહોંચાડવાનો નિર્ણય લીધો છે. અમે છેલ્લા આઠ વર્ષથી આ જ કરી રહ્યા છીએ.”
12:11 PM17 ફેબ્રુઆરી 2026
- કૉપી લિંક
ફ્રાન્સમાં કલ્ચરલ સેન્ટર ખોલાશે
પીએમ મોદીએ જાહેરાત કરી કે ફ્રાન્સમાં સ્વામી વિવેકાનંદ કલ્ચરલ સેન્ટર ખોલવામાં આવશે. ભારત અને ફ્રાન્સ બંને પ્રાચીન અને સમૃદ્ધ સભ્યતાઓ ધરાવે છે.
12:08 PM17 ફેબ્રુઆરી 2026
- કૉપી લિંક
મોદીએ કહ્યું, ગયા વર્ષે મેક્રોને મને AI સમિટમાં આમંત્રણ આપ્યું હતું
પીએમ મોદીએ કહ્યું, “ગયા વર્ષે, તેમણે (મેક્રોને) મને ફ્રાન્સમાં AI સમિટમાં આમંત્રણ આપ્યું હતું. અમે ફ્રાન્સ અને યુરોપના મુખ્ય પ્રવેશદ્વાર, માર્સેલ્સની મુલાકાત લીધી. આ તે શહેર છે જ્યાં પ્રથમ વિશ્વયુદ્ધ દરમિયાન ભારતીય સૈનિકોએ પગ મૂક્યો હતો.”
ભારતીય સૈનિકોની ગાથા હજુ પણ યાદ છે. આ એ જ શહેર છે જ્યાં વીર સાવરકર અંગ્રેજોના ચુંગાલમાંથી બચવા માટે સમુદ્રમાં કૂદી પડ્યા હતા.
11:46 AM17 ફેબ્રુઆરી 2026
- કૉપી લિંક
પીએમ મોદી અને મેક્રોનની વાતચીતનો વીડિયો સામે આવ્યો
મહારાષ્ટ્રના લોકભવનમાં પીએમ મોદી અને ફ્રાન્સના રાષ્ટ્રપતિ મેક્રોન વચ્ચે પ્રતિનિધિમંડળ સ્તરની વાતચીતના વીડિયો સામે આવ્યા છે.
આજે બંને દેશો વચ્ચે હસ્તાક્ષર કરાયેલા અનેક સમજૂતી કરારો (MoU) ચર્ચાનું કેન્દ્રમાં હતા. આ બેઠકમાં ભારત-ફ્રાન્સ સંબંધોને વધુ મજબૂત બનાવવા પર ધ્યાન કેન્દ્રિત કરવામાં આવ્યું હતું. બંને નેતાઓએ ડિજિટલ ટેકનોલોજી, ઈનોવેશન, વિદ્યાર્થીઓની આવ-જા, સંસ્કૃતિ, ડિફેન્સ અને ગ્રીન પાથવે સંબંધિત મુદ્દાઓ પર ચર્ચા કરી હતી.
11:32 AM17 ફેબ્રુઆરી 2026
- કૉપી લિંક
કર્ણાટકમાં રાજનાથ સિંહને મળ્યા ફ્રાન્સનાં રક્ષામંત્રી
મંગળવારે કર્ણાટકના કોલારમાં ફ્રાન્સના રક્ષામંત્રી કેથરિન વોટ્રિન ભારતના રક્ષામંત્રી રાજનાથ સિંહને મળ્યા. સમાચાર એજન્સી ANI અનુસાર, બંને નેતાઓ આજે બેંગલુરુમાં છઠ્ઠા ભારત-ફ્રાન્સ વાર્ષિક ડિફેન્સ ડાયલોગની સંયુક્ત રીતે અધ્યક્ષતા કરશે.
આ બેઠકમાં આગામી 10 વર્ષ માટે ડિફેન્સ સહયોગ કરાર પર ચર્ચા થવાની અપેક્ષા છે. ભારતમાં હેમર મિસાઇલના ઉત્પાદન માટે સંયુક્ત સાહસ પર સમજૂતી કરાર (MoU) પર પણ હસ્તાક્ષર થવાની શક્યતા છે.
10:58 AM17 ફેબ્રુઆરી 2026
- કૉપી લિંક
ફ્રાન્સના રાષ્ટ્રપતિ બોલિવૂડ સેલિબ્રિટીઝને મળ્યા
ફ્રાન્સના રાષ્ટ્રપતિ ઇમેન્યુઅલ મેક્રોન આજે મુંબઈમાં અનેક બોલિવૂડ સેલિબ્રિટીઝને મળ્યા. જેમાં મનોજ બાજપેયી, અનિલ કપૂર, શબાના આઝમી અને રિચા ચઢ્ઢા જેવા કલાકારોનો સમાવેશ થાય છે.
10:50 AM17 ફેબ્રુઆરી 2026
- કૉપી લિંક
મોદીએ કહ્યું- મેક્રોનને મુંબઈ ખૂબ ગમ્યું
પીએમ મોદીએ ટ્વીટ કર્યું કે તેમને મુંબઈમાં તેમના મિત્ર, ફ્રાન્સના રાષ્ટ્રપતિ મેક્રોનને મળીને ખૂબ આનંદ થયો.
પ્રધાનમંત્રીએ કહ્યું કે રાષ્ટ્રપતિ મેક્રોને તેમને કહ્યું કે તેમને મુંબઈ બહુ ગમ્યું. તેમણે એ પણ ઉલ્લેખ કર્યો કે તેમને દિવસની શરૂઆતમાં જોગિંગ કરવાનો આનંદ આવ્યો.
10:37 AM17 ફેબ્રુઆરી 2026
- કૉપી લિંક
સાઉથ મુંબઈમાં કેટલીક જગ્યાએ ટ્રાફિક બંધ કરાયો
ભારત-ફ્રાન્સ ‘યર ઓફ ઈનોવેશન’ મુખ્ય કાર્યક્રમને કારણે આજે બપોરે 2 વાગ્યાથી રાત્રે 9 વાગ્યા સુધી સાઉથ મુંબઈમાં કેટલાક સ્થળોએ ટ્રાફિક બંધ કરી દેવામાં આવ્યો છે.
ટ્રાફિક વિભાગે જણાવ્યું હતું કે છત્રપતિ શિવાજી મહારાજ માર્ગનો ભાગ, જે શ્યામા પ્રસાદ મુખર્જી ચોક (રીગલ જંકશન) ને જોડે છે, તે બંને બાજુના તમામ વાહનો માટે બંધ કરાયો છે. ફક્ત ઈમરજન્સી વાહનોને જ પસાર થવાની મંજૂરી હતી.
આદમ સ્ટ્રીટ અને પી. રામચંદાની માર્ગ પર ટેક્સી અને બેસ્ટ બસ સ્ટેન્ડ પણ બંધ હતા.
10:26 AM17 ફેબ્રુઆરી 2026
- કૉપી લિંક
મોદી અને મેક્રોન ‘ભારત-ફ્રાન્સ ઇનોવેશન યર’નું ઉદ્ઘાટન કરશે
પીએમ મોદી અને રાષ્ટ્રપતિ મેક્રોન આજે સાંજે 5:15 વાગ્યે ભારત-ફ્રાન્સ ઇનોવેશન યર 2026નું ઉદ્ઘાટન કરશે. મોદી અને મેક્રોન ઉદ્યોગપતિઓ, સ્ટાર્ટઅપ ફાઉન્ડર્સ, સંશોધન નિષ્ણાતો અને ઇનોવેશન લીડર્સને સંબોધિત કરશે.
રાષ્ટ્રપતિ મેક્રોન 17 થી 19 ફેબ્રુઆરી દરમિયાન ભારતની મુલાકાતે છે. આ મુલાકાત દરમિયાન, તેઓ દિલ્હીમાં AI ઇમ્પેક્ટ સમિટમાં પણ ભાગ લેશે.
10:17 AM17 ફેબ્રુઆરી 2026
- કૉપી લિંક
પીએમ મોદી ફ્રાન્સના રાષ્ટ્રપતિ ભેટ્યા
પીએમ મોદી અને ફ્રાન્સના રાષ્ટ્રપતિ ઇમેન્યુઅલ મેક્રોન મુંબઈના લોકભવનમાં તેમની મુલાકાત દરમિયાન એકબીજાને ગળે મળ્યા હતા.
10:14 AM17 ફેબ્રુઆરી 2026
- કૉપી લિંક
પીએમ મોદી ફ્રાન્સના રાષ્ટ્રપતિને મળવા મહારાષ્ટ્ર પહોંચ્યા
પીએમ મોદી ફ્રાન્સના રાષ્ટ્રપતિ ઇમેન્યુઅલ મેક્રોન સાથે મુલાકાત માટે મહારાષ્ટ્ર લોકભવન પહોંચ્યા છે. સમાચાર એજન્સી ANI અનુસાર, મહારાષ્ટ્ર અને ગુજરાતના રાજ્યપાલ આચાર્ય દેવવ્રતે મુંબઈના મહારાષ્ટ્ર લોકભવનમાં પ્રધાનમંત્રી મોદીનું સ્વાગત કર્યું.
10:14 AM17 ફેબ્રુઆરી 2026
- કૉપી લિંક
મેક્રોને 26/11 મુંબઈ હુમલામાં માર્યા ગયેલાને શ્રદ્ધાંજલી આપી
ફ્રાન્સના રાષ્ટ્રપતિ ઈમેન્યુઅલ મેક્રોન આજે મુંબઈના તાજમહેલ પેલેસની મુલાકાત લઈને 26/11 ના હુમલાના પીડિતોને શ્રદ્ધાંજલિ આપી હતી. તેમણે કહ્યું કે આતંકવાદ સામેની લડાઈમાં ફ્રાન્સ ભારતની સાથે ઉભું છે. આતંકવાદનો સામનો એકતા અને દૃઢ નિશ્ચયથી કરવો જોઈએ.
10:08 AM17 ફેબ્રુઆરી 2026
- કૉપી લિંક
રાષ્ટ્રપતિ બન્યા પછી મેક્રોં ચોથી વખત ભારત પહોંચ્યા
રાષ્ટ્રપતિ બન્યા પછી મેક્રોંનો આ ચોથો ભારત પ્રવાસ છે. આ પહેલા તેઓ માર્ચ 2018માં પહેલીવાર ભારત આવ્યા હતા. ત્યારબાદ તેઓ સપ્ટેમ્બર 2023માં G20 સમિટ માટે અને જાન્યુઆરી 2024માં ગણતંત્ર દિવસ સમારોહમાં મુખ્ય અતિથિ તરીકે આવ્યા હતા.
ભારત અને ફ્રાન્સ વચ્ચે 1998થી વ્યૂહાત્મક ભાગીદારી છે અને બંને દેશો સંરક્ષણ, ટેકનોલોજી, અવકાશ અને ઊર્જા જેવા ક્ષેત્રોમાં સાથે કામ કરે છે. આ પ્રવાસ પણ આ સહયોગને આગળ વધારવાની દ્રષ્ટિએ મહત્વપૂર્ણ માનવામાં આવે છે.
10:08 AM17 ફેબ્રુઆરી 2026
- કૉપી લિંક
ભારતને 24 સુપર રાફેલ ફાઇટર જેટ મળશે
ભારત અને ફ્રાન્સ વચ્ચેની રાફેલ ડીલની સૌથી ખાસ વાત એ છે કે તેમાંથી 24 વિમાન ‘સુપર રાફેલ’ હશે. આ એડવાન્સ્ડ જેટને F-5 વર્ઝન કહેવામાં આવી રહ્યું છે, જેને ફ્રાન્સની કંપની દસોલ્ટ એવિએશન બનાવી રહી છે.
હાલમાં ભારતીય વાયુસેના પાસે જે રાફેલ છે, તે F-3 વેરિઅન્ટ છે અને 4.5 જનરેશન ફાઇટર માનવામાં આવે છે. તેમાં સ્ટેલ્થ ફીચર્સ અને પરમાણુ હથિયારો લઈ જવાની ક્ષમતા પણ છે. નવી ડીલમાં મળનારા મોટાભાગના જેટ F-4 વર્ઝનના હશે, જે વધુ એડવાન્સ સિસ્ટમ અને અપગ્રેડ ટેકનોલોજી સાથે આવશે.
જણાવવામાં આવી રહ્યું છે કે યુરોપિયન સ્ટાન્ડર્ડ મુજબ F-5 રાફેલને વધુ એડવાન્સ કેટેગરીમાં રાખવામાં આવી રહ્યા છે. આ હાલમાં ડેવલપમેન્ટ ફેઝમાં છે. પ્લાન મુજબ F-4 જેટની ડિલિવરી 2028-29 થી શરૂ થશે, જ્યારે 2030 પછી મળનારા જેટ F-5 એટલે કે સુપર રાફેલ હશે.
આ ડીલ પછી ફ્રાન્સ ઉપરાંત ભારત તે પસંદગીના દેશોમાં સામેલ થઈ જશે, જેમની પાસે આટલી એડવાન્સ ક્ષમતાવાળા રાફેલ ફાઇટર જેટ હશે. આનાથી વાયુસેનાની તાકાત અને ટેકનોલોજી લેવલ બંનેમાં મોટો વધારો માનવામાં આવી રહ્યો છે.
10:08 AM17 ફેબ્રુઆરી 2026
- કૉપી લિંક
મુંબઈકરો સાથે ફ્રાન્સના રાષ્ટ્રપતિનું જોગિંગ, VIDEO
ફ્રાન્સના રાષ્ટ્રપતિ ઇમેન્યુઅલ મેક્રોન ભારતની ત્રણ દિવસીય મુલાકાતે છે. મેક્રોન મંગળવારે સવારે મુંબઈના મરીન ડ્રાઇવ પર એક અલગ અંદાજમાં જોવા મળ્યા. પોતાની ફિટનેસ પ્રત્યે અત્યંત જાગૃત મનાતા મેક્રોન સવારે દરિયા કિનારે જોગિંગ કરતા દેખાયા. મરીન ડ્રાઇવ પર ફરતા લોકોએ તેમને ઓળખ્યા અને પછી શું, જોતજોતામાં લોકો તેમને પોતાના મોબાઇલ કેમેરામાં રેકોર્ડ કરતા લાગ્યા. રાષ્ટ્રપતિ મેક્રોનની આ અનૌપચારિક અને સહજ શૈલી સોશિયલ મીડિયા પર પણ ચર્ચાનો વિષય બની ગઈ છે. મેક્રોન 17 થી 19 ફેબ્રુઆરી સુધી ભારતની સત્તાવાર યાત્રા પર છે.
10:07 AM17 ફેબ્રુઆરી 2026
- કૉપી લિંક
ભારતમાં બનશે 96 રાફેલ ફાઇટર જેટ
ફ્રાન્સની કંપની દસોલ્ટ એવિએશન સાથે થનારી આ ડીલમાં મહત્વની વાત એ છે કે 114માંથી 96 વિમાન ભારતમાં જ બનાવવામાં આવશે.
માત્ર 18 જેટ ઉડાન માટે તૈયાર સ્થિતિમાં (ફ્લાય-અવે કન્ડિશન) સીધા ફ્રાન્સથી મળશે. બાકીના વિમાનોનું ઉત્પાદન ભારતમાં થશે અને તેમાં લગભગ 60% સુધી સ્વદેશી પાર્ટ્સનો ઉપયોગ કરવામાં આવશે.
રાફેલ જેટનું નિર્માણ મેક ઇન ઇન્ડિયા કાર્યક્રમ હેઠળ થશે. દસોલ્ટ એવિએશન એક ભારતીય કંપની સાથે મળીને ઉત્પાદન કરશે.
તાજેતરમાં દસોલ્ટે તેના જોઈન્ટ વેન્ચર દસોલ્ટ રિલાયન્સ એરોસ્પેસ લિમિટેડ (DRAL) માં હિસ્સેદારી 49% થી વધારીને 51% કરી દીધી છે. આ ભાગીદારીમાં અનિલ અંબાણીની રિલાયન્સ ઇન્ફ્રાસ્ટ્રક્ચર પણ સામેલ છે.
ડીલ હેઠળ તમામ 114 જેટમાં ભારતીય હથિયારો, મિસાઈલો અને દારૂગોળો એકીકૃત કરવામાં આવશે અને સુરક્ષિત ડેટા લિંક સિસ્ટમ પણ આપવામાં આવશે, જેથી આ વિમાનો ભારતીય રડાર અને સેન્સર નેટવર્ક સાથે સીધા જોડાઈ શકે.
દસો એરફ્રેમ બનાવવાની ટેકનોલોજી ટ્રાન્સફર પણ આપશે, જ્યારે એન્જિન કંપની સાફ્રાન અને એવિયોનિક્સ કંપની થેલ્સ આ પ્રોજેક્ટમાં સહયોગ કરશે.
ટેકનોલોજી ટ્રાન્સફર પૂર્ણ થયા પછી વિમાનોમાં સ્વદેશી ભાગીદારી 55-60% સુધી પહોંચવાની અપેક્ષા છે. (ફાઇલ ફૂટેજ-રાફેલ)
10:06 AM17 ફેબ્રુઆરી 2026
- કૉપી લિંક
ભારત પહેલાથી જ 36 રાફેલ જેટ ખરીદી ચૂક્યું છે
ભારત પહેલાથી જ ફ્રાન્સ પાસેથી 36 રાફેલ ફાઇટર જેટ ખરીદી ચૂક્યું છે. ભારત અને ફ્રાન્સ વચ્ચે આ વિમાનોની ખરીદીનો કરાર સપ્ટેમ્બર 2016માં થયો હતો. તેની કિંમત તે સમયે લગભગ 7.8 અબજ યુરો એટલે કે આશરે ₹59 હજાર કરોડ હતી.
આ રાફેલ વિમાનોની ડિલિવરી તબક્કાવાર રીતે શરૂ થઈ હતી. પ્રથમ વિમાન 2019માં ફ્રાન્સમાં ભારતને સોંપવામાં આવ્યું હતું, જ્યારે 2020થી જેટ ભારતમાં પહોંચવા લાગ્યા. તમામ 36 વિમાનો 2022 સુધીમાં ભારતીય વાયુસેનાને મળી ચૂક્યા હતા.
ભારતીય વાયુસેનાએ આ વિમાનોને બે સ્ક્વોડ્રન અંબાલા એરબેઝ (હરિયાણા) અને હાસીમારા એરબેઝ (પશ્ચિમ બંગાળ)માં તૈનાત કર્યા છે.
રાફેલ જેટ આધુનિક રડાર, ઇલેક્ટ્રોનિક વોરફેર સિસ્ટમ અને લાંબા અંતરની મિસાઇલોથી સજ્જ છે. તેમાં મીટિયોર એર-ટુ-એર મિસાઈલ, SCALP ક્રુઝ મિસાઈલ અને MICA મિસાઈલ સિસ્ટમ જેવા અદ્યતન હથિયારોનો સમાવેશ થાય છે, જે વાયુસેનાની હુમલા કરવાની ક્ષમતામાં નોંધપાત્ર વધારો કરે છે.
નિષ્ણાતોના મતે, 36 રાફેલની પ્રથમ ખેપ ભારતીય વાયુસેના માટે ટેકનિકલ અપગ્રેડ સાબિત થઈ હતી અને આ જ અનુભવના આધારે હવે મોટા પાયે રાફેલ ડીલ કરવામાં આવી રહી છે.
10:06 AM17 ફેબ્રુઆરી 2026
- કૉપી લિંક
ભારત-ફ્રાન્સ આ વર્ષે ઇનોવેશન યર ઉજવી રહ્યા છે
ભારત અને ફ્રાન્સે વર્ષ 2026ને ‘ભારત-ફ્રાન્સ ઇનોવેશન યર’ તરીકે ઉજવી રહ્યા છે. આ એક વર્ષ સુધી ચાલતી સંયુક્ત પહેલ છે, જેનો ઉદ્દેશ્ય બંને દેશો વચ્ચે નવી ટેકનોલોજી, સંશોધન અને ઔદ્યોગિક નવીનતામાં સહયોગને વેગ આપવાનો છે.
આ પહેલ માત્ર સરકારો પૂરતી મર્યાદિત નથી. તેમાં બંને દેશોના સ્ટાર્ટઅપ્સ, વૈજ્ઞાનિકો, કંપનીઓ અને ઇન્ડસ્ટ્રી લીડર્સ પણ સામેલ છે, જેથી સંશોધનથી લઈને બજાર સુધી ટેકનોલોજીને ઝડપથી પહોંચાડી શકાય.
આ ઇનોવેશન યરનું સૌથી મોટું ફોકસ આર્ટિફિશિયલ ઇન્ટેલિજન્સ (AI) પર છે. ભારત અને ફ્રાન્સ મળીને એક સામાન્ય AI રોડમેપ પર કામ કરી રહ્યા છે, જેનો લક્ષ્ય જવાબદાર અને નૈતિક AI સિસ્ટમ્સ વિકસાવવાનો છે.
આ ઉપરાંત ડીપટેક અને સ્ટાર્ટઅપ સહયોગ, અવકાશ અને સંરક્ષણ ટેકનોલોજીમાં સંયુક્ત વિકાસ, તથા જળવાયુ પરિવર્તનનો સામનો કરવા માટે ગ્રીન એનર્જી સોલ્યુશન્સ પર પણ કામ થશે.
મેક્રોંની ભારત યાત્રા દરમિયાન ફ્રાન્સથી 110થી વધુ કંપનીઓનું મોટું બિઝનેસ ડેલિગેશન પણ આવ્યું છે, જે મુંબઈ અને બેંગલુરુ જેવા શહેરોમાં ભારતીય કંપનીઓ સાથે ભાગીદારી પર ચર્ચા કરશે.
હાલમાં ભારતમાં 1,100થી વધુ ફ્રેન્ચ કંપનીઓ કાર્યરત છે અને લગભગ 3.5 લાખ લોકોને રોજગારી આપી રહી છે. ઇનોવેશન યરનો ઉદ્દેશ્ય રોકાણ અને ટેકનોલોજી સહયોગને વધુ વધારવાનો છે.
latest video
news via inbox
Subscribe for the latest updates, promotions, and ads.
