બોલિવૂડ ક્રાઈમ ફાઈલ્સના પ્રત્યુષા બેનર્જી ડેથ કેસમાં અત્યાર સુધી તમે વાંચ્યું કે, કેવી રીતે 1 એપ્રિલે પ્રત્યુષાના મૃત્યુ પછી તેના બોયફ્રેન્ડ રાહુલ રાજ તેની ડેડબોડી હૉસ્પિટલમાં છોડીને ચાલ્યો ગયો. રાહુલ વિરુદ્ધ કેસ દાખલ થયો, જેના પછી પ્રત્યુષાના ઘણા મિત્રોએ રાહુલ વિરુદ્ધ ગંભીર આરોપો લગાવતા નિવેદનો આપ્યા. આ દરમિયાન મૃત્યુ સમયે પ્રત્યુષાના માથે લગાવેલું સિંદૂર, લગ્નના સમાચાર અને રાહુલના વકીલના કેસ છોડવાથી પણ કેસ ગૂંચવાયો. રાહુલની ધરપકડ થવાની હતી, પરંતુ પછી તેણે એક કોલ રેકોર્ડિંગ કોર્ટમાં રજૂ કરી, જેનાથી પ્રત્યુષાના માતા-પિતા પણ શંકાના ઘેરામાં આવી ગયા.

હવે પ્રત્યુષા બેનર્જી ડેથ કેસના પાર્ટ-2માં જાણો આગળની કહાણી-

‘પ્રત્યુષા મારી અને રાહુલની વચ્ચે આવી હતી’

પ્રત્યુષા સાથે મારપીટ કરવાના આરોપમાં રાહુલ રાજની એક્સ ગર્લફ્રેન્ડ સલોની શર્માને પણ પૂછપરછ માટે બોલાવવામાં આવી. તેણે પોતાના નિવેદનમાં જણાવ્યું કે, તેણે રાહુલ સાથે 2 કંપનીઓ શરૂ કરી હતી. સાથે કામ કરતા તે બંને રિલેશનશિપમાં પણ આવી ગયા. 2015ના ઓગસ્ટમાં તેને ખબર પડી કે રાહુલ તેને દગો આપીને પ્રત્યુષા બેનર્જીને પણ ડેટ કરી રહ્યો છે. જ્યારે તે આ વિશે વાત કરવા રાહુલના ઘરે પહોંચી, તો પ્રત્યુષાએ તેને ઘરમાંથી કાઢી મૂકી. બીજા દિવસે રાહુલે તેને ફોન કરીને સ્પષ્ટતા કરી કે, તે અને પ્રત્યુષા ફક્ત મિત્રો છે.

સલોની શર્મા સાથે રાહુલની જૂની તસવીર.

સલોનીએ પૂછપરછમાં આગળ કહ્યું, ‘હું પ્રત્યુષા અને રાહુલની વચ્ચે નહોતી આવી, જ્યારે તે પ્રત્યુષા હતી, જે અમારી વચ્ચે આવી હતી. તે જાણતી હતી કે હું અને રાહુલ રિલેશનશિપમાં છીએ, તેમ છતાં તેણે રાહુલને લલચાવીને મને છોડવા મજબૂર કર્યો.’

સનોલીએ પ્રત્યુષાને લાફો ઝિંકી દીધો હતો

જ્યારે ઓગસ્ટ 2015માં સલોનીએ રાહુલને પ્રત્યુષાનો જન્મદિવસ ઉજવતા જોયો, ત્યારે તે ગુસ્સામાં તેના ઘરે પહોંચી હતી. ત્યારે બિલ્ડિંગના વોચમેને તેને અંદર જવાથી રોકી. રાહુલે તેના પિતાને ફોન કરીને કહ્યું કે, તેઓ તેને અહીંથી લઈ જાય. જ્યારે સલોની પિતા સાથે એપાર્ટમેન્ટમાં પહોંચી, ત્યારે પ્રત્યુષાના માતા-પિતા પણ ત્યાં હતાં. ત્યાં સલોનીને ખબર પડી કે, પ્રત્યુષા અને રાહુલ લગ્ન કરવાના છે.

સલોનીએ કહ્યું કે, આ પછી તેણે રાહુલ સાથે બિઝનેસ ટર્મ્સ પણ પૂરા કરી દીધા. બંને કંપનીઓને ઘણું નુકસાન થયું, જેની ભરપાઈ રાહુલ પણ કરતો હતો. તે સમયાંતરે સલોનીને થોડા હજાર રૂપિયા આપતો હતો.

ફેબ્રુઆરી 2016માં રાહુલે પૈસા આપવાનું બંધ કરી દીધું, તો સલોની ફરી તેના ઘરે પહોંચી હતી. ત્યાં તેની પ્રત્યુષા સાથે ઘણી દલીલ થઈ. પ્રત્યુષાએ પૈસા આપવાનો સ્પષ્ટ ઇનકાર કરી દીધો અને તેનું પર્સ, ગ્લાસ અને દુપટ્ટો લઈને તેને ઘરમાંથી ભગાડી દીધી. આવા સંજોગોમાં સલોનીએ એપાર્ટમેન્ટની બહાર હોબાળો કર્યો અને તેના પડોશીઓ પાસેથી પણ મદદ માંગી. ત્યારે જઈને પ્રત્યુષાએ તેને સામાન પાછો આપ્યો.

જ્યારે સલોની જવા લાગી ત્યારે રાહુલ તેની પાછળ-પાછળ બિલ્ડિંગની નીચે સુધી આવી ગયો. ગુસ્સામાં સલોનીએ રાહુલ પર હાથ ઉઠાવ્યો અને જ્યારે પ્રત્યુષા પહોંચી, તો સલોનીએ તેને પણ થપ્પડ મારી. આ બધું તેની બિલ્ડિંગની લોબીમાં થયું હતું. પોલીસ સ્ટેટમેન્ટમાં સલોનીએ કહ્યું કે, એપાર્ટમેન્ટની બહાર સીસીટીવી નહોતા, જેના કારણે ઘટના રેકોર્ડ થઈ શકી નહીં, પરંતુ જ્યારે લોબીમાં તેણે પ્રત્યુષા પર હાથ ઉઠાવ્યો, તો તે ત્યાં હાજર સીસીટીવીમાં કેદ થઈ ગયો.

ધરપકડ પહેલા રાહુલ રાજને મળ્યા જામીન

સલોની શર્માને છોડી દેવામાં આવી. તપાસના આધારે રાહુલ રાજની ધરપકડ થવાની હતી. જોકે તેના હોસ્પિટલાઇઝ થવાને કારણે તેની ધરપકડ સતત ટળતી રહી. બે અઠવાડિયા પછી જ્યારે તે ડિસ્ચાર્જ થયો, ત્યાં સુધી તેને આ શરત પર આગોતરા જામીન મળી ચૂક્યા હતા કે, તે તપાસમાં સંપૂર્ણ સહયોગ આપશે. રાહુલને આ જામીન તેની અને પ્રત્યુષાની છેલ્લી કૉલ રેકોર્ડિંગના આધારે મળ્યા.

કોલ રેકોર્ડિંગમાં પ્રત્યુષાએ રાહુલને કહ્યું હતું કે, તેના પિતા તેને પ્રોસ્ટિટ્યુડ કહે છે. તે તેને સતત ગાળો આપી રહી હતી અને એ પણ કહી રહી હતી કે, ‘ગેરંટી આ મારા માતા-પિતા નથી.’

ચાર્જશીટમાં નોંધાયેલી પ્રત્યુષા અને રાહુલની છેલ્લી કૉલ રેકોર્ડિંગની ટ્રાન્સક્રિપ્ટ.

પ્રત્યુષા અને રાહુલની છેલ્લી કોલ રેકોર્ડિંગ…

પ્રત્યુષાઃ મને પ્રોસ્ટિટ્યુટ કહી…

રાહુલઃ તો વિચાર…

પ્રત્યુષાઃ મારા વિશે ગંદુ ગંદુ…

રાહુલઃ આ હસવાની વાત છે,,

પ્રત્યુષાઃ માતા-પિતા છે તે મારા…

રાહુલઃ તારો બાપ #$%&@ છે

પ્રત્યુષાઃ મને ખબર છે…#$%^&& @ $%^&…

રાહુલઃ હા, વિચાર…

પ્રત્યુષાઃ ખરેખર હું એમનું લોહી નથી, એટલે જ આટલી ગાળો આપે છે

રાહુલઃ સ્વાભાવિક રીતે

પ્રત્યુષાઃ ગેરંટી હું એમનું લોહી નથી…

રાહુલઃ પણ જે પણ હોય તું સારી છે…

રાહુલ રાજને જામીન મળવા પર ઘણા લોકોએ વાંધો ઉઠાવ્યો. પ્રત્યુષાના માતા-પિતા વતી કેસ લડનાર પબ્લિક પ્રોસિક્યુટર નીલેશ પાવસકરે દિવ્ય ભાસ્કર સાથે આ અંગે વાત કરતા કહ્યું, ‘પ્રત્યુષા બેનર્જી ઇન્ડસ્ટ્રીમાં પોતાનું નામ બનાવી ચૂકી હતી, સાથે જ તે સંઘર્ષ પણ કરી રહી હતી. અચાનક તેનું આત્મહત્યા કરી લેવું સ્વાભાવિક રીતે એક કુદરતી ઘટના નહોતી, ચોક્કસ કંઈક વાત રહી હશે. હું આ કેસમાં પોલીસ તપાસથી સંતુષ્ટ નહોતો. મેં કેટલાક જરૂરી દસ્તાવેજો માંગ્યા હતા, પરંતુ મને આપવામાં આવ્યા નહોતા. પછી કેટલાક પેપર આવ્યા. કેસનો અભ્યાસ કર્યા પછી હું આ નિષ્કર્ષ પર પહોંચ્યો કે, આ કેસમાં કસ્ટોડિયલ ઇન્વેસ્ટિગેશન ખૂબ જ જરૂરી હતું, જે આ કેસમાં થયું નહોતું. અમે કોર્ટમાં દલીલ કરી કે રાહુલ રાજની આગોતરા જામીન અરજી રદ કરવામાં આવે, પરંતુ તેની અરજી સ્વીકારી લેવામાં આવી હતી.’

આગળ એડવોકેટ નીલેશ પાવસકર કહે છે, ‘જ્યારે કોર્ટમાં સુનાવણી શરૂ થઈ, ત્યારે અમારા તરફથી વિનંતી કરવામાં આવી કે, આત્મહત્યા પહેલાં પ્રત્યુષા અને રાહુલ રાજ વચ્ચે થયેલી છેલ્લી ફોન કૉલ રેકોર્ડિંગ સાંભળવામાં આવે. જસ્ટિસ મૃદુલા ભાટકરે આ વિનંતી સ્વીકારી અને ચેમ્બરમાં કૉલ રેકોર્ડિંગ સાંભળવામાં આવ્યું. તે ઓડિયોમાં પ્રત્યુષાનો અવાજ ખૂબ જ ડિસ્ટર્બ હતો, તે પરેશાન લાગી રહી હતી અને રાહુલ રાજને અપશબ્દો બોલી રહી હતી.’

‘ઓડિયો સાંભળ્યા પછી, અમે કોર્ટમાં દલીલ કરવા પહોંચ્યા કે તરત જ, જજે રાહુલ રાજની અરજી સ્વીકારી લીધી અને તેને જામીન મળી ગયા. જજે કહ્યું, “I am allowing the application.” હું આ જોઈને આશ્ચર્યચકિત હતો. આ પછી મેં કોર્ટ અને સરકાર બંનેને રિપોર્ટ મોકલ્યો કે આ મામલો સુપ્રીમ કોર્ટમાં જવો જોઈએ, પરંતુ મારી નિમણૂક હાઈકોર્ટ સુધી મર્યાદિત હતી.’

પોસ્ટમોર્ટમ રિપોર્ટ, દારૂ અને પ્રેગ્નેન્સીનું અનુમાન

પ્રત્યુષાના પોસ્ટમોર્ટમ રિપોર્ટ અનુસાર, તેનું મૃત્યુ એપેક્સિયા એટલે કે ગૂંગળામણથી થયું હતું. પ્રારંભિક રિપોર્ટમાં સ્પષ્ટ હતું કે, આ આત્મહત્યાનો મામલો છે. તેમાં હત્યા થવાની કોઈ આશંકા નહોતી. જોકે, જ્યારે પ્રત્યુષાનો વિસેરા રિપોર્ટ આવ્યો, ત્યારે સ્પષ્ટ હતું કે તેણે મૃત્યુના થોડા સમય પહેલા જ ગર્ભપાત (અબોર્શન) કરાવ્યો હતો.

રાહુલ રાજે આ અંગે સ્પષ્ટતા કરતા કહ્યું કે, પ્રત્યુષાએ તેને પ્રેગ્નેન્સીની જાણકારી આપી હતી. બંનેએ મળીને અબોર્શનનો નિર્ણય લીધો હતો, ત્યારબાદ રાહુલ તેને પ્રક્રિયા માટે સાથે લઈ ગયો હતો.

પ્રત્યુષા અને રાહુલ વર્ષ 2015થી રિલેશનશિપમાં હતા.

લગ્ન માટે રાહુલના માતા-પિતાને મળી હતી પ્રત્યુષા, માતાથી નારાજ હતી

રાહુલની માતાએ મીડિયાને આપેલા ઇન્ટરવ્યુમાં કહ્યું કે, જાન્યુઆરી 2016માં પ્રત્યુષા તેમને મળવા રાંચી આવી હતી. ત્યારે પરિવારે પ્રત્યુષાની કુંડળી પણ બનાવી હતી. પ્રત્યુષાએ રાહુલની માતાને કહ્યું હતું કે, તેની માતાએ તેના બધા પૈસા છેતરપિંડીથી રાખી લીધા છે. તેની પાસે પૈસા નથી.

રાહુલ રાજે પણ પોલીસ સ્ટેટમેન્ટમાં કહ્યું કે, પ્રત્યુષા 24 વર્ષની હતી. આમ છતાં તેનું માતા-પિતા સાથે જોઈન્ટ એકાઉન્ટ હતું. પ્રત્યુષાના માતા-પિતાએ તેના નામે લાખોની લોન લીધી હતી, જેના કારણે પ્રત્યુષા ઘણી પરેશાન રહેતી હતી. આ વાત પર તેનો અવારનવાર માતા-પિતા સાથે ઝઘડો થતો હતો.

પ્રત્યુષા બેનર્જી જમશેદપુરની રહેવાસી હતી.

પ્રત્યુષાના માતા-પિતાએ પણ ફરિયાદમાં કહ્યું હતું કે, રાહુલ પ્રત્યુષાના પૈસાનો ખોટી રીતે ઉપયોગ કરતો હતો. આના પર રાહુલ કહે છે, ‘મેં પ્રત્યુષાનો એક પણ પૈસો લીધો ન હતો, ઊલટું મેં તેને આપ્યા હતા. પ્રત્યુષાનું એકાઉન્ટ તેની માતા જ સંભાળતી હતી. પ્રત્યુષાના મૃત્યુ પછી મને ફસાવવા માટે નિવેદનબાજી કરવામાં આવી. મારા પર જે પણ કલમો લગાવવામાં આવી હતી, તે પણ આ લોકો સાબિત કરી શક્યા નહીં. તે એટલી બધી આર્થિક સંકટમાં હતી કે, જ્યારે અમે સાથે ‘પાવર કપલ શો’ જીત્યા, ત્યારે જે વિજેતા રકમ આવી, તે મેં તેને આપી દીધી હતી.’

પ્રત્યુષા દારૂના નશામાં ધૂત રહેતી, મૃત્યુના દિવસે પણ વ્હિસ્કી પીધી હતી

પોસ્ટમોર્ટમ રિપોર્ટ અનુસાર, પ્રત્યુષા બેનર્જીએ મૃત્યુ પહેલાં 100ml દારૂ પીધો હતો, જેના કારણે તે ખૂબ નશામાં હતી. પ્રત્યુષાના માતા-પિતાએ આરોપ લગાવ્યો કે, રાહુલે તેને નશાની આદત પાડી હતી. આના પર રાહુલ કહે છે, ‘હું વ્યસન કરાવતો નહોતો, પરંતુ છોડાવતો હતો. તે દિવસ દરમિયાન પણ દારૂ પીતી હતી, જે ટેવ તેના પિતા પાસેથી તેનામાં આવી હતી અને તે જ તેના મૃત્યુનું કારણ પણ બની. તે દિવસે ચોક્કસ તે દારૂ પીને ભાવુક થઈ ગઈ હતી અને ગુસ્સામાં તેણે આ પગલું ભર્યું હતું. પ્રત્યુષાના વિસેરા રિપોર્ટમાં પણ 100 મિલી આલ્કોહોલ મળી આવ્યો હતો. હવે કોઈ પીને બિલ્ડિંગ પરથી કૂદી પડે કે આત્મહત્યા કરી લે, તેમાં મારી શું ભૂલ છે. તે દિવસે લગભગ તેણે બે બોટલ વ્હિસ્કી પીધી હતી.’

પબ્લિક પ્રોસિક્યુટરે કહ્યું- ‘તપાસમાં ખામી રહી ગઈ’

નીલેશ પાવસકર કેસની તપાસથી નારાજ થઈને કહે છે, ‘મને લાગે છે કે ક્યાંક ને ક્યાંક આ કેસની તપાસમાં ખામી રહી છે. જેમ કે ચાવીવાળાનું નિવેદન, તેને પૂછી શકાયું હોત કે, તે વારંવાર ત્યાં શા માટે આવતો હતો. પછી જે વ્યક્તિ પાછળની બાલ્કનીમાંથી ઘૂસ્યો હતો, તેનું નિવેદન ખૂબ જ મહત્ત્વનું હતું. જો તે ઘરની અંદરથી સરળતાથી અવરજવર કરી શકતો હતો, તો એવી પણ સંભાવના બને છે કે, આ આત્મહત્યા નહોતી પરંતુ કંઈક બીજું હતું, કદાચ કોઈએ કંઈક ખોટું કરીને લટકાવી દીધી હોય. જો આ એંગલ પર તપાસ થઈ હોત, તો કેસને સમર્થન મળત. પંચનામામાં પણ ઘણી વિસંગતતાઓ જોવા મળી. જેમ કે, તે દુપટ્ટો જેનાથી પ્રત્યુષા લટકી હતી, તે પહેલા કોઈ બીજી જગ્યાએ મળ્યો હતો અને પછી ક્યાંક બીજે. આવા ઘણા એંગલ હતા જેના પર તપાસ જરૂરી હતી.’

આજસુધી કેસ પરિણામ સુધી પહોંચ્યો નથી

વર્ષોથી રાહુલ રાજ અને પ્રત્યુષાના માતા-પિતા એકબીજા પર ગંભીર આરોપો લગાવતા આવ્યા છે. આજે પ્રત્યુષાના મૃત્યુને 9 વર્ષ વીતી ગયા, પરંતુ આ કેસ કોઈ પરિણામ સુધી પહોંચ્યો નથી. રાહુલે આ કેસમાંથી રાહતની માંગ કરી હતી, પરંતુ કોર્ટે તેની આ અરજી ફગાવી દીધી.

આ અંગે પબ્લિક પ્રોસિક્યુટર નીલેશ પાવસકર કહે છે, ‘આરોપી તરફથી ડિસ્ચાર્જ એપ્લિકેશન ફાઇલ કરવામાં આવી હતી, પરંતુ કોર્ટે પ્રાઇમા ફેસી મુદ્દાઓને ધ્યાનમાં રાખીને તે એપ્લિકેશન રિજેક્ટ કરી દીધી. એનો અર્થ એ છે કે, આ કેસમાં આરોપી વિરુદ્ધ હજુ પણ એવા પુરાવા છે, જેના આધારે હાલ તેને છોડી શકાય નહીં.’

‘મને ક્લીનચીટ નથી મળી, પરંતુ હું કેસ ચોક્કસ જીતીશ’- રાહુલ રાજ

દિવ્ય ભાસ્કર સાથેની વાતચીતમાં રાહુલ રાજે કહ્યું, ‘મારા પર લાગેલા બધા આરોપો ખોટા છે, નહીંતર મને એન્ટિસિપેટરી જામીન ન મળત. ભલે મને હાલમાં ક્લીનચીટ નથી મળી, પણ એટલું ચોક્કસ જાણું છું કે, હું આ કેસ જરૂર જીતીશ. જુઓ, તે સમયે પોતાનો સ્વાર્થ સાધવા માટે ઘણા લોકોએ મીડિયા સામે મારા વિરુદ્ધ ઘણું બધું બકવાસ બોલ્યું અને તેનાથી પોલીસ પર દબાણ આવ્યું.’

‘એજાઝ ખાને કહ્યું કે આ મર્ડર છે, સુસાઈડ નહીં. તે વ્યક્તિ જેના પર પોતે 75 કેસ નોંધાયેલા છે, તે આ બોલી રહ્યો છે. તે સમયે તો તે ફક્ત પબ્લિસિટીનો ભૂખ્યો હતો. કામ્યા પંજાબી અને નીરુશા શર્મા પર તો મેં બદનક્ષીનો કેસ કરી જ રાખ્યો છે, જે હું જ જીતીશ.

પ્રત્યુષાના મૃત્યુના 15 દિવસ પછી જ વિકાસ ગુપ્તાનો જન્મદિવસ હતો. મુંબઈમાં એક જગ્યા છે ટેમ્પ, ત્યાં તેમણે પાર્ટી કરી છે. કેવો મિત્ર છે વિકાસ ગુપ્તા. મતલબ તમે જુઓ કે તમારી એક મિત્ર કે દીકરી હવે આ દુનિયામાં નથી અને આ લોકો પ્રેસ કોન્ફરન્સ કરી રહ્યા છે. બકવાસ બોલી રહ્યા છે. આ બધાને શરમ આવવી જોઈએ.

કામ્યા પંજાબી વિરુદ્ધ રાહુલ રાજે કર્યો માનહાનિનો દાવો

કામ્યા પંજાબી, વિકાસ ગુપ્તા સહિત ફિલ્મ ઇન્ડસ્ટ્રીના ઘણા લોકોએ રાહુલ પર હત્યાના આરોપો લગાવ્યા હતા. 2016ના અંતમાં કામ્યા પંજાબીએ પ્રત્યુષા બેનર્જી પર એક શોર્ટ ફિલ્મ બનાવી, જેમાં તેણે રાહુલને આરોપી તરીકે રજૂ કર્યો. શોર્ટ ફિલ્મ વિવાદોમાં રહી, જેના પછી રાહુલે કામ્યા પંજાબી વિરુદ્ધ ઓક્ટોબર 2016માં 1 કરોડ રૂપિયાનો માનહાનિનો કેસ કર્યો.

એક્સ ગર્લફ્રેન્ડ સલોની સાથે લગ્ન કરી ચૂક્યો છે રાહુલ રાજ

પ્રત્યુષાના મૃત્યુના 2 વર્ષ પછી, 2018માં રાહુલ રાજ સિંહે તેની ભૂતપૂર્વ ગર્લફ્રેન્ડ સલોની શર્મા સાથે લગ્ન કર્યા. આ લગ્નથી તેને એક દીકરી પણ છે. આ અંગે રાહુલ કહે છે કે, ‘સલોની સાથે લગ્ન કરવા એટલા સરળ નહોતા, તેના માતા-પિતાએ તેને ઘરમાંથી કાઢી મૂકી હતી. પ્રત્યુષા પછી હું જ્યાં ભટકી ગયો હતો, ત્યાં સલોનીએ મારું જીવન પાછું પાટા પર લાવ્યું, પરંતુ પ્રત્યુષા હંમેશા મારો અધૂરો પ્રેમ રહેશે.’

રાહુલ રાજ સિંહ અને સલોની શર્માના લગ્નની તસવીર.

(નોંધ: આ સમાચાર પ્રત્યુષાનો કેસ લડનાર પબ્લિક પ્રોસિક્યુટર, પ્રત્યુષાના બોયફ્રેન્ડ રાહુલ રાજના ઇન્ટરવ્યુ અને કેસના સંશોધનના આધારે લખવામાં આવ્યા છે.)

લેખક- ઇફત કુરેશી

રિપોર્ટર- વર્ષા રાય

…………………………………………………

પાર્ટ-1, ‘હું અહિંયા પોતાને વેચવા નથી આવી’:’બાલિકા વધૂ’ ફેમ પ્રત્યુષા બેનર્જીએ માતા-પિતાને ગાળો આપી, બોયફ્રેન્ડ સાથે ઝઘડો કરી ફાંસો ખાઈ લીધો

1 એપ્રિલ 2016, બપોરે લગભગ 12 વાગ્યે…

પ્રત્યુષા બેનર્જી, બોયફ્રેન્ડ અને એક્ટર-પ્રોડ્યુસર રાહુલ રાજ સાથે મુંબઈના ગોરેગાંવની હાર્મની બિલ્ડિંગના સાતમા માળે આવેલા ફ્લેટ નંબર 703માં રહેતી હતી.

બપોરે રાહુલ પોતાના કામથી લોખંડવાલા ગયો હતો. થોડીવાર પછી જ તેણે પ્રત્યુષાને ફોન કર્યો, તો તે જોર જોરથી રડી રહી હતી.

થોડી બોલાચાલી થયા પછી પ્રત્યુષાએ કહ્યું- ‘ઓહ, રાહુલ રાજ, અહંકાર પોતાની પાસે રાખ, કારણ કે થોડા જ કલાકોમાં, કદાચ મિનિટોમાં, કોઈને અહંકાર બતાવવા માટે નહીં બચે.’

રાહુલે જવાબ આપ્યો- ‘જો, હું તને બસ એટલું જ કહી રહ્યો છું, ખાલી સાંભળ.’

પ્રત્યુષાએ વાત કાપતા કહ્યું- ‘હું તને એટલું કહી રહી છું…. મેં તને ખૂબ પ્રેમ કર્યો છે.’ સંપૂર્ણ સમાચાર વાંચો…

બોલિવૂડ ક્રાઈમ ફાઈલ્સના કેસ 4માં આવતા ગુરુવાર-શુક્રવારે વાંચો પ્રખ્યાત એક્ટર અનુજ ટિક્કુના પિતા અરુણ ટિક્કુના હત્યાકાંડની, જેમની એક્ટ્રેસે ગેંગસ્ટર સાથે મળીને હત્યા કરાવી. એક્ટર અનુજ ટિક્કુની હત્યાનું પણ કાવતરું ઘડવામાં આવ્યું હતું, પરંતુ તેને સમયસર બચાવી લેવામાં આવ્યો.

………………………

બાથરૂમમાં મળી એક્ટર અનુજ ટિક્કુના પિતાની લાશ: રસ્તા પરથી પસાર થતા એક વ્યક્તિએ બારીમાંથી આખી ઘટના જોઈ, એક્ટ્રેસ અને ગેંગસ્ટરે ષડયંત્ર રચ્યું

7 એપ્રિલ 2012 ની વાત છે…

મુંબઈના લોખંડવાલાના સમર્થ આંગણ એપાર્ટમેન્ટમાં ફરતા એક વ્યક્તિની નજર પહેલા માળે પડી. એક વૃદ્ધ વ્યક્તિ લોહીલુહાણ હાલતમાં બારી સાથે અથડાયા અને તરત જ ગભરામણમાં પડદો તૂટીને નીચે પડ્યો. પહેલા માળના તે ઘરમાં બીજા કેટલાક લોકો પણ હતા. તે ઘર ‘નો વન કિલ્ડ જેસિકા’, ‘રબ ને બના દી જોડી’ જેવી ફિલ્મોમાં કામ કરી ચૂકેલા અનુજ ટિક્કુનું હતું.

ઘરમાં રિનોવેશનનું કામ ચાલુ હતું. એક વિદેશી મહિલા તે ઘર ભાડે લેવાની હતી. અનુજના પિતા અરુણ ટિક્કુ દિલ્હીથી ભાડા કરાર જોવા મુંબઈ આવ્યા હતા.

અનુજ તે સવારે તેને મળ્યો. પિતા ઘરમાં જ રોકાયા અને અનુજ તેના એક ખૂબ જ નજીકના મિત્ર સાથે ગોવા નીકળ્યો હતો. આખી વાર્તા આવતા ગુરુવારે, બોલિવૂડ ક્રાઈમ ફાઈલ્સના આગલા કેસમાં વાંચો.

……………………………………………….

ભાસ્કરની નવી સિરીઝ બોલિવૂડ ક્રાઈમ ફાઈલ્સની આ વાર્તાઓ પણ વાંચો-

ભાગ-1, કાસ્ટિંગ ડિરેક્ટર નીરજ ગ્રોવર હિરોઇનના ફલેટમાંથી ગુમ:એક્ટ્રેસે વાર્તા ઘડતાં પોલીસને શંકા જાગી; પૂછપરછમાં કહ્યું- બોયફ્રેન્ડે હત્યા કરી, લાશ સામે જ મારો રેપ કર્યો

મે 2008ની વાત છે

એે સમયની સૌથી પ્રખ્યાત ક્રાઈમ રિપોર્ટર જિજ્ઞા વોરા પાસે અમરનાથ ગ્રોવરનો ફોન આવ્યો. તેમણે ગભરાયેલા અવાજે કહ્યું, ‘જિજ્ઞાજી, હું અમરનાથ બોલું છું, મારું બાળક ગુમ થઈ ગયું છે, શું તમે આના પર સ્ટોરી કરશો?’

જિજ્ઞા જે મોટા-મોટા કેસની રિપોર્ટિંગ કરતી હતી તેમના માટે આ કોઈ મોટી વાત નહોતી. તેમણે જવાબ આપ્યો- ‘સર, આવાં ઘણાં બાળકો ગુમ થઈ જાય છે, પણ અમે બધા પર સ્ટોરી થોડી કરી શકીએ.’ સંપૂર્ણ સમાચાર વાંચો…

…………………………………..

પાર્ટ-2, ‘નીરજની હત્યા કરી, છરીના જોરે લાશ સામે મારો રેપ કર્યો’:બોયફ્રેન્ડથી હિરોઇનની બેવફાઈ સહન ન થઈ, કાસ્ટિંગ ડિરેક્ટરના 300 ટુકડા કરી જંગલમાં સળગાવ્યા

મારિયાના બિલ્ડિંગના ગાર્ડે પૂછપરછમાં જણાવ્યું હતું કે ‘મારિયા 7 મે 2008ની સાંજે કેટલીક ભારે બેગ્સ લઈ જતી દેખાઈ હતી, એ સમયે તેના બોયફ્રેન્ડ જેરોમ મેથ્યુ પણ સાથે હતો.’ જ્યારે પૂછપરછમાં જેરોમે કહ્યું હતું કે ‘તે મારિયાના બિલ્ડિંગમાં ગયો જ નહોતો.’

નીરજના ગુમ થયાનાં લગભગ 2 અઠવાડિયાં પછી કડકાઈ કરવા પર મારિયાએ કહ્યું હતું કે ‘નીરજની હત્યા થઈ ચૂકી છે. જેરોમે નીરજની હત્યા કરી, પછી તેણે લાશની સામે મારો રેપ કર્યો. આ પછી બંનેએ મળીને લાશના 300 ટુકડા કર્યાં અને તેને ઠેકાણે લગાવ્યો.’ સંપૂર્ણ સમાચાર વાંચો…

…………………………………………………………….

પાર્ટ-1, રાજેશ ખન્નાની હિરોઇન પરિવાર સાથે અચાનક ગુમ થઈ:એક વર્ષ પછી જમીનમાંથી મળ્યાં 6 હાડપિંજર, આતંકી બ્લાસ્ટને લીધે ખૂલ્યું કાળજું કંપાવનારું રહસ્ય

રાજેશ ખન્નાની ફિલ્મ ‘વફાઃ અ ડેડલી લવસ્ટોરી’ ફેમ એક્ટ્રેસ લૈલા ખાન પોતાના પરિવાર સાથે રજાઓ ગાળવા ઇગતપુરી ફાર્મહાઉસ ગઈ હતી, પરંતુ પછી અચાનક તે અને તેનો આખો પરિવાર ગુમ થઈ ગયો. એક વર્ષની શોધખોળ બાદ ખોદકામ થયું, તો તેમનાં હાડપિંજર બરાબર એે જ જગ્યાએ મળ્યાં, જ્યાંથી તેઓ ગુમ થયા હતા. સંપૂર્ણ સમાચાર વાંચો…

ભાગ-2, લોખંડના સળિયાથી એક બાદ એક છનો આત્મા ખેંચી લીધો!:લૈલાના ત્રીજા પિતાએ જ આખા પરિવારને પતાવી હાથ લોહિયાળ કર્યા, સ્વિમિંગ પૂલમાં દફનાવ્યો રાઝ

લૈલા ખાન રજાઓ ગાળવા ફાર્મહાઉસ ગઈ અને અચાનક ગુમ થઈ ગઈ. તપાસમાં સામે આવ્યું કે માત્ર લૈલા જ નહીં, તેના પરિવારના અન્ય 6 લોકો પણ ગુમ છે. એક વર્ષ સુધી લૈલાના કોઈ સમાચાર મળ્યા નહીં અને પછી કાશ્મીરમાં એક બોમ્બ બ્લાસ્ટ થયો, તે જગ્યાની નજીક જ લૈલાની માતાના નામે રજિસ્ટર્ડ કાર મળી. તપાસમાં એક્ટ્રેસ લૈલા ખાનના સાવકા પિતા પરવેઝ ટાકની ધરપકડ થઈ. પરવેઝ તપાસ ટીમને ફાર્મહાઉસ લઈ ગયો, જ્યાં એક પછી એક 6 હાડપિંજર મળી આવ્યા. તેમાં પરિવારના પાલતુ શ્વાનનું પણ હાડપિંજર હતું.

10 જુલાઈ 2012 ના રોજ પરવેઝ ટાકને સધર્ન મુંબઈ કિલા કોર્ટમાં રજૂ કરીને ક્રાઈમ બ્રાન્ચે કસ્ટડી લીધી. મામલો ગંભીર હતો, તો તપાસ ટીમે સખ્તાઈ કરવામાં કચાસ રાખી નહીં. હાથ-પગ બાંધીને પરવેઝ ટાકને ખૂબ માર મારવામાં આવ્યો, જેના પછી તેની નિશાનદેહી પર ફાર્મહાઉસમાંથી હાડપિંજર કાઢવામાં આવ્યા. આ પહેલા જ તેણે ફેબ્રુઆરી 2011 ની રાતની આખી કહાણી કહી દીધી હતી. સંપૂર્ણ સમાચાર વાંચો…