મહેમાનો ઘરે આવે ત્યારે આપણે સ્વાદિષ્ટ વાનગીઓ બનાવીએ છીએ. મહેમાનો વાનગીની મોજ લે છે પરંતુ કયારેક રાઈસ એટલે કે ભાત બાકી રહી જાય છે. આ વધેલા ભાતને ઘણા લોકો કચરામાં ફેંકી દે છે. વધેલા ભાતમાંથી લગભગ ફ્રાઇડ રાઇસ બનાવવામાં આવે છે. પરંતુ વારંવાર ફ્રાઈડ રાઈસ ખાવાનો કંટાળો આવે છે. વધેલા ભાતનો ઉપયોગ કરીને કંઈક સ્વાદિષ્ટ અને અનોખું બનાવવા ઇચ્છો છો તો આ રેસીપી શ્રેષ્ઠ વિકલ્પ છે. તમે વધેલા ભાતમાંથી દહીં ભાત કટલેટની વાનગી બનાવી શકો છો. નોંધી લો આ ટેસ્ટી વાનગી બનાવવાની સ્ટેપ-બાય-સ્ટેપ રેસીપી.

દહીં ભાત કટલેટ માટે સામગ્રી:

• ગરમ મસાલો, લાલ મરચું પાવડર, લીલા મરચાં, આદુ, કોથમીર, મીઠું – સ્વાદ મુજબ
• 2 થી 3 ચમચી ચણાનો લોટ અથવા બ્રેડના ટુકડા
•  1કપ – વધેલા ભાત
• અડધો કપ- દહીં
• 1 બાફેલું બટાકું
• 1 ડુંગળી

વધેલા ભાતની કટલેટ બનાવવાની રીત :

દહીં ભાતના કટલેટ બનાવવા માટે એક મોટા બાઉલમાં વધેલા ભાત લઈ મેશ કરી તેમાં ઘટ્ટ દહીં ઉમેરો અને સારી રીતે મિક્સ કરો. પછી તેમાં છૂંદેલા બટાકા, ડુંગળી, લીલા મરચાં, આદુ અને ધાણાના પાન ઉમેરો. પછી, લાલ મરચું પાવડર, ગરમ મસાલો અને મીઠું ઉમેરો અને સારી રીતે મિક્સ કરો. મિશ્રણને બાંધવા માટે ચણાનો લોટ અથવા બ્રેડક્રમ્સ ઉમેરો. જો મિશ્રણ ખૂબ ભીનું લાગે, તો થોડો વધુ ચણાનો લોટ ઉમેરો. આ પછી, મિશ્રણને નાના કટલેટમાં આકાર આપો. એક પેનમાં થોડું તેલ ગરમ કરો અને કટલેટને મધ્યમ તાપ પર શેલો ફ્રાય કરો. કટલેટને પલટાવીને સોનેરી અને ક્રિસ્પી થાય ત્યાં સુધી રાંધો. ગરમાગરમ દહીં ભાતના કટલેટને લીલી ચટણી, ટામેટાની ચટણી અથવા આમલીની ચટણી સાથે પીરસો. જો તમે ઈચ્છો તો, થોડો વધારાનો સ્વાદ મેળવવા માટે ઉપર ચાટ મસાલો પણ છાંટી શકો છો.

આ પણ વાંચો : Nutmeg Health Benefit : મીઠાઈ સ્વાદિષ્ટ બનાવનાર આ મસાલો શરીર માટે ગુણકારી, જાણો ફાયદા