સલમાન ખાન પછી, સોશિયલ મીડિયા પર દાવો કરવામાં આવી રહ્યો છે કે શાહરૂખ ખાને પણ NEET વિવાદ પર જંતર-મંતર પર ચાલી રહેલા વિદ્યાર્થી આંદોલનને સમર્થન આપ્યું છે. ઇન્ટરનેટ પર શાહરુખના નામનો એક સ્ક્રીનશોટ ઝડપથી વાઈરલ થઈ રહ્યો છે, જેમાં વિદ્યાર્થીઓના સમર્થનમાં મેસેજ લખેલો છે.

આ પોસ્ટમાં પેપર લીક ઉપરાંત પારદર્શક સિસ્ટમ માટે અવાજ ઉઠાવવામાં આવ્યો છે. જોકે, તપાસમાં આ સ્ક્રીનશોટ સંપૂર્ણપણે નકલી નીકળ્યો છે. શાહરુખ ખાને પોતાના સત્તાવાર સોશિયલ મીડિયા એકાઉન્ટ્સ પર આવી કોઈ પોસ્ટ શેર કરી નથી અને ન તો આ મુદ્દે અત્યાર સુધી કોઈ પ્રતિક્રિયા આપી છે.

વાઈરલ સ્ક્રીનશોટમાં શું દાવો કરવામાં આવી રહ્યો છે?

સોશિયલ મીડિયા પર વાયરલ થઈ રહેલા સ્ક્રીનશોટમાં શાહરુખ ખાનના હવાલાથી લખવામાં આવ્યું હતું કે વિદ્યાર્થીઓએ બતાવ્યું છે કે સાચી તાકાત પુસ્તકો, પેન અને અવાજમાં હોય છે. નકલી પોસ્ટમાં લખ્યું હતું, “આ લડાઈ માત્ર એક પરીક્ષા વિરુદ્ધ નથી, પરંતુ એક નિષ્પક્ષ અને પારદર્શી સિસ્ટમ માટે છે. દરેક વિદ્યાર્થી પોતાની મહેનતનો હિસાબ માંગે છે, ન કે પેપર લીક કે કૌભાંડ. હું ભાવનાત્મક અને નૈતિક રીતે તમારા બધાની સાથે છું.” આ મેસેજ સામે આવ્યા પછી ઘણા લોકોને લાગ્યું કે શાહરુખ ખાને પણ આ મુદ્દે પોતાની વાત રાખી છે.

સત્ય સામે આવ્યું, ચાહકોએ નારાજગી વ્યક્ત કરી

જ્યારે શાહરુખ ખાનના સત્તાવાર ઇન્સ્ટાગ્રામ અને X (ટ્વિટર) એકાઉન્ટ્સની તપાસ કરવામાં આવી, ત્યારે ત્યાં આવું કોઈ નિવેદન કે પોસ્ટ મળ્યું નહીં. આ પછી સ્પષ્ટ થઈ ગયું કે ઇન્ટરનેટ પર વાઈરલ થઈ રહેલો સ્ક્રીનશોટ સંપૂર્ણપણે નકલી અને એડિટ કરેલો છે. શાહરુખના ચાહકોએ પણ સોશિયલ મીડિયા પર નકલી સ્ક્રીનશોટ શેર કરનારા યુઝર્સને આડે હાથ લીધા અને ખોટી માહિતી ફેલાવવા બદલ નારાજગી વ્યક્ત કરી.

દિવ્ય ભાસ્કરને Google પર મનપસંદ સોર્સ બનાવો