સેરેના વિલિયમ્સને વિમ્બલ્ડન માટે વાઇલ્ડ કાર્ડ મળ્યો, બે કેટેગરીમાં ઉતરશે

લંડન | ટેનિસની મહાન ખેલાડી સેરેના વિલિયમ્સ લગભગ ચાર વર્ષ પછી પ્રોફેશનલ ટેનિસમાં કમબેક માટે તૈયાર છે. 44 વર્ષીય સેરેનાને વિમ્બલ્ડનના સિંગલ્સ અને ડબલ્સ બંને વર્ગોમાં વાઇલ્ડ કાર્ડ મળ્યો છે. તે ડબલ્સમાં તેની મોટી બહેન વીનસ વિલિયમ્સ સાથે કોર્ટ પર ઉતરશે.

સેરેનાએ કહ્યું કે તેના કમબેક પાછળ સૌથી મોટી પ્રેરણા તેની દીકરીઓ ઓલિમ્પિયા (8 વર્ષ) અને અદીરા (લગભગ 3 વર્ષ) છે. બંનેએ તેની તૈયારી અને સખત મહેનતને ખૂબ નજીકથી જોઈ છે. તાજેતરમાં સેરેનાએ સોશિયલ મીડિયા પર એક વીડિયો પણ શેર કર્યો હતો, જેમાં અદીરા ટ્રેનિંગ દરમિયાન રેઝિસ્ટન્સ બેન્ડ પકડીને તેની મદદ કરતી જોવા મળી હતી.

હર્ષિતે એશિયન જુનિયર જિમ્નાસ્ટિક્સમાં ગોલ્ડ જીત્યો, અક્ષત બજાજને સિલ્વર

ભારતીય જિમ્નાસ્ટિક્સને એશિયન સ્તરે મોટી સફળતા મળી છે. હર્ષિત દામોદરને એશિયન આર્ટિસ્ટિક જિમ્નાસ્ટિક્સ ચેમ્પિયનશિપની જુનિયર મેન્સ વૉલ્ટ ઇવેન્ટમાં ગોલ્ડ મેડલ જીતીને ઇતિહાસ રચ્યો. અક્ષત બજાજે સિલ્વર મેડલ જીત્યો. ભારતને પહેલીવાર આ ઇવેન્ટમાં ગોલ્ડ અને સિલ્વર બંને મેડલ મળ્યા છે.

આ સિદ્ધિ ભારત માટે એટલા માટે પણ ખાસ છે, કારણ કે આ પહેલા ભારતીય ટીમે જુનિયર મેન્સ ટીમ ઇવેન્ટમાં બ્રોન્ઝ મેડલ જીત્યો હતો. સતત બે મેડલે ભારતીય જુનિયર જિમ્નાસ્ટિક્સની વધતી તાકાતનો સંકેત આપ્યો છે.

હર્ષિતે ફાઇનલમાં 13.649 અંક મેળવ્યા. પહેલા વોલ્ટ હેન્ડસ્પ્રિંગ ફ્રન્ટ ડબલ ટ્વિસ્ટ પર તેને 13.866 પોઇન્ટ મળ્યા, જ્યારે બીજા પ્રયાસમાં ત્સુકાહારા 720ના દમ પર તેણે ગોલ્ડ મેડલ જીત્યો. અક્ષત બજાજે ત્સુકાહારા 720 અને યુર્ચેન્કો 720 વોલ્ટ સાથે 13.433નો સરેરાશ સ્કોર બનાવીને બીજું સ્થાન મેળવ્યું. ઉઝબેકિસ્તાનના બેકઝાદ બખ્તિયારોવને બ્રોન્ઝ મેડલ મળ્યો.

દિવ્ય ભાસ્કરને Google પર મનપસંદ સોર્સ બનાવો