ટીબા અલ-અલીનો જન્મ વર્ષ 2000માં ઇરાકમાં થયો હતો. તેના પિતાનું નામ તૈયબ અલી હતું. ટીબા ભણવામાં ઠીક-ઠાક હતી પરંતુ રમતગમત, સામાજિક પ્રવૃત્તિઓ અને વધારાના અભ્યાસક્રમની પ્રવૃત્તિઓમાં વધુ રસ ધરાવતી હતી. નાની ઉંમરથી જ ટીબાએ પોતાની અલગ ઓળખ બનાવવાનો પ્રયાસ શરૂ કરી દીધો હતો. પરંતુ ટીબાના પિતા હંમેશા ઇચ્છતા હતા કે, તે ઘરે જ રહે અને ભણવા પર વધુ ધ્યાન આપે.

2017માં ટીબા પોતાના પરિવાર સાથે આગળના અભ્યાસ માટે તુર્કી ગઈ હતી. ત્યાં તેણે નવી જિંદગીની શરૂઆત કરી અને પોતાને સ્વતંત્ર અનુભવી. જોકે, તેના પરિવારે પાછા ઇરાક ફરવાનો નિર્ણય લીધો, પરંતુ ટીબાને તુર્કીમાં રહેવું ગમવા લાગ્યું. તેણે પોતાનો અભ્યાસ અને જીવન ત્યાં જ આગળ વધારવાનો નિર્ણય કર્યો.

બાળપણથી જ ટીબાએ નક્કી કરી લીધું હતું કે, તે પોતાની એક અલગ ઓળખ બનાવશે. આ જ વિચાર સાથે તેણે સોશિયલ મીડિયાની દુનિયામાં પગ મૂક્યો. સૌથી પહેલા તેણે પોતાની યુટ્યુબ ચેનલ બનાવી, જ્યાં તે મેકઅપ, ફિટનેસ, ફેશન અને પોતાના અંગત જીવન સાથે જોડાયેલી વાતો શેર કરવા લાગી. પરંતુ જેવી તેના પિતાને આ વિશે જાણ થઈ કે તરત જ બાપ-દીકરી વચ્ચે રોજ ઝઘડા થવા લાગ્યા.

ટીબાના પિતા તેના પર પાબંદી લગાવવા માંગતા હતા, આ જ ડરને કારણે ટીબા ક્યારેય ઇરાક પરિવારને મળવા જતી નહોતી. જોકે, ધીમે ધીમે સોશિયલ મીડિયા પર ટીબાના ફોલોઅર્સ વધવા લાગ્યા અને તેના વીડિયો લોકોને ખૂબ પસંદ આવવા લાગ્યા.

તેની પર્સનાલિટી, ખુલ્લા વિચારો અને આત્મનિર્ભર અંદાજે તેને સોશિયલ મીડિયાની દુનિયામાં ખાસ બનાવી દીધી. તેની લોકપ્રિયતા ઇરાકથી નીકળીને તુર્કી અને અન્ય દેશો સુધી ફેલાઈ ગઈ. ટીબાએ ન માત્ર પોતાના અંગત જીવનને બતાવવાનું શરૂ કર્યું, પરંતુ સમાજમાં મહિલાઓની આઝાદી અને સ્વતંત્રતાના મુદ્દાઓ પર પણ પોતાના વિચારો રજૂ કર્યા.

તેણે તેના એક વ્લોગમાં કહ્યું હતું કે, તે તુર્કીમાં અભ્યાસ કરવા આવી હતી, પરંતુ અહીંનું જીવન તેને એટલું ગમ્યું કે તે અહીં જ રહેવા લાગી. આ દરમિયાન ટીબાની મુલાકાત મોહમ્મદ અલ-શામી સાથે થઈ, જે સીરિયન મૂળનો હતો. મિત્રતા ધીમે ધીમે પ્રેમમાં બદલાઈ અને બંનેએ લગ્ન કરવાનો નિર્ણય કર્યો. તુર્કીમાં રહેતા સમયે બંનેએ સાથે મળીને વ્લોગ્સ અને સોશિયલ મીડિયા દ્વારા પોતાનું જીવન બતાવવાનું શરૂ કર્યું.

ટીબાની આ આઝાદી અને મોહમ્મદ અલ-શામી સાથેનો તેનો સંબંધ તેના પિતાને ક્યારેય મંજૂર નહોતો, જે આગળ જતાં એક ભયાનક અંજામ સુધી પણ પહોંચ્યો. તે નહોતા ઈચ્છતા કે, બંને સાથે રહે અને લગ્ન કરે. પરંતુ ટીબાએ મોહમ્મદ અલ-શામી સાથે લગ્ન કરવાનો નિર્ણય કરી લીધો. આ દરમિયાન જાન્યુઆરી 2023માં ટીબા 25મા અરેબિયન ગલ્ફ કપમાં પોતાની રાષ્ટ્રીય ફૂટબોલ ટીમને સપોર્ટ કરવા માટે ઇરાક પાછી ફરી.

ટીબા તેના બોયફ્રેન્ડ મોહમ્મદ અલ-શામી સાથે વ્લોગ બનાવતી હતી.

જ્યારે ટીબા ઇરાક પાછી ફરી, ત્યારે તેને પોતાની કોમ્યુનિટી તરફથી જાનથી મારી નાખવાની ધમકીઓ મળવા લાગી. તેણે પોતાની સુરક્ષા માટે પોલીસનો સંપર્ક કર્યો. જેમ તેમ કરીને તે ક્યાંક છુપાઈ ગઈ. ફક્ત તેની માતા જાણતી હતી કે, ટીબા ક્યાં રોકાઈ હતી. માતા-દીકરી વચ્ચે સતત વાતચીત થતી હતી. માતા ટીબાને ખૂબ યાદ કરતી હતી અને તેને મળવા પણ માંગતી હતી.

આખરે ટીબા પોતાની માતાને એક મિત્રના ઘરે મળવા માટે તૈયાર થઈ ગઈ, પરંતુ તેણે સ્પષ્ટ કહ્યું કે, તે ક્યારેય પોતાના પિતાના ઘરે નહીં જાય. આ નિર્ણય પાછળથી તેના જીવનની સૌથી મોટી ભૂલ સાબિત થયો, કારણ કે જેવી માતા તે જગ્યાએ પહોંચી કે તરત જ આખો પરિવાર ત્યાં આવી ગયો.

ટીબાનું અપહરણ કરીને તેને દક્ષિણ ઇરાકના અલ-દીવાનિયા લઈ જવામાં આવી, જ્યાં તેનો પરિવાર અને તેની કમ્યુનિટી રહેતી હતી. ત્યાં ટીબા અને તેના પિતા વચ્ચે ઉગ્ર દલીલ થઈ, જે જોતજોતામાં મારામારીમાં ફેરવાઈ ગઈ. દલીલ દરમિયાન ટીબાએ આરોપ લગાવ્યો કે, 2015માં માત્ર 15 વર્ષની ઉંમરે તેના ભાઈએ તેની સાથે દુષ્કર્મ કર્યું અને પિતાએ તેને બચાવવાનો કોઈ પ્રયાસ પણ ન કર્યો.

બસ આ જ ડરને કારણે તે પરિવાર સાથે તુર્કી ગયા પછી ઇરાક પાછા ફરવા માંગતી ન હતી, કારણ કે તેને લાગતું હતું કે શોષણ ચાલુ રહેશે અને પિતા ફરીથી અવગણના કરશે. તુર્કી જતા પહેલા ટીબાએ આ વાત તેની માતાને પણ કહી હતી, પરંતુ ઇરાકમાં મહિલાઓના અધિકારો ન હોવાને કારણે માતા કંઈ કરી શકી નહીં. લગભગ બધા લોકોએ, ખાસ કરીને તેના પિતાએ ટીબાને કહ્યું કે, તે આને અવગણી દે.

જ્યારે પિતાએ દીકરીની વાત સમજવાને બદલે તેને જ દોષી ઠેરવી અને કહ્યું કે, ‘એક પુરુષ સાથેનો તેનો સંબંધ અને તેને સોશિયલ મીડિયા પર બતાવ્યો, જેનાથી પરિવારની સાથે તેની આખી જનજાતિ શરમજનક બની.’ કહેવાય છે કે આ દરમિયાન પરિવારે ટીબાને કંઈક પીવા આપ્યું, જે પીતા જ ટીબાને ઊંઘ આવી ગઈ અને પછી 31 જાન્યુઆરી 2023ના રોજ તેના પિતાએ ગળું દબાવીને તેની હત્યા કરી નાખી.

જેવી જ એક યુવા યુટ્યુબ સ્ટારની હત્યાના સમાચાર ઇરાકમાં ફેલાયા, ત્યાં દરેક જગ્યાએ વિરોધ પ્રદર્શનો શરૂ થઈ ગયા. જોતજોતામાં ઇરાકમાં પ્રદર્શનકારીઓએ ટીબાની હત્યા વિરુદ્ધ ન્યાયની માંગણી કરવાનું શરૂ કરી દીધું. બીજી તરફ મહિલા અધિકાર કાર્યકર્તાઓએ ટીબાની હત્યા અને મહિલાઓ વિરુદ્ધ હિંસાને મંજૂરી આપતા કાયદાઓના વિરોધમાં પણ જોરદાર પ્રદર્શનો કર્યા.

3 ફેબ્રુઆરીના રોજ સંયુક્ત રાષ્ટ્ર મિશને આ હત્યાની નિંદા કરી અને ઇરાક સરકાર પાસે લિંગ-આધારિત હિંસાને અપરાધ જાહેર કરવાની માંગ કરી. એમ્નેસ્ટી ઇન્ટરનેશનલે પણ હત્યાની સખત નિંદા કરી.

પોલીસ પર દબાણ બનાવવામાં આવી રહ્યું હતું કે, વહેલી તકે આ મામલાનો ખુલાસો કરે કે આખરે ટીબાની હત્યા શા માટે અને કોણે કરી. એવું પણ કહેવાય છે કે પારિવારિક વિવાદ 2015થી ચાલ્યો આવતો હતો.

પોલીસ અને પરિવાર વચ્ચે પહેલા એક સમજૂતી પણ થઈ હતી, જેના કારણે પોલીસ જઈને વિવાદ ઉકેલવાની હતી. પરંતુ આ દરમિયાન પોલીસ ત્યારે આશ્ચર્યચકિત થઈ ગઈ, જ્યારે પિતા પોતે પોલીસ સ્ટેશને આવીને કબૂલ કર્યું કે, તેણે જ પોતાની દીકરીની હત્યા કરી હતી.

ટીબાના પિતા તૈયબ અલીએ પોલીસ સમક્ષ કહ્યું કે, તેની દીકરીએ પરિવારની આબરૂ ખરાબ કરી દીધી હતી. દીકરીની હત્યાનો તેને કોઈ પસ્તાવો નહોતો અને કહ્યું કે, ‘હા- મેં જ દીકરીની હત્યા કરી. ટીબા અલ-અલીના પિતા તૈયબ અલીને પોતાની દીકરીની હત્યા માટે આજીવન કેદની સજા સંભળાવવામાં આવી હતી.