અંડર-19 વર્લ્ડકપમાં વિજય મેળવીને દેશનું નામ રોશન કરનાર ગુજરાતના બે તેજસ્વી ખેલાડીઓ વેદાંત ત્રિવેદી અને ખિલાન પટેલ, આજે 8 ફેબ્રુઆરીએ સાંજે 5 વાગ્યે અમદાવાદ એરપોર્ટ પર આવી પહોંચશે. આ બંને વિજેતાને આવકારવા માટે તેમના પરિવારજનો અને રમતપ્રેમીઓ દ્વારા એરપોર્ટ પર ભવ્ય સ્વાગતની ખાસ તૈયારીઓ કરવામાં આવી છે. ખાસ કરીને વેદાંત ત્રિવેદીના ઘરે અત્યારથી જ ઉત્સવનો માહોલ જોવા મળી રહ્યો છે અને સેલિબ્રેશનની તડામાર તૈયારીઓ શરૂ કરી દેવામાં આવી છે, કારણ કે આ સફળતાએ સમગ્ર ગુજરાત અને પરિવાર માટે ગૌરવની ક્ષણ લાવી છે. ખિલન પટેલના સ્વાગતમાં મોડાસામાં કાર્યક્રમ
અરવલ્લી જિલ્લાના મોડાસાના ગૌરવ એવા ખિલન અનિલભાઈ પટેલ તાજેતરમાં અંડર-19 ક્રિકેટ વર્લ્ડ કપ જીતીને પરત ફરી રહ્યા છે. ભારતીય ટીમમાં પસંદગી પામીને તેમણે મોડાસા અને સમગ્ર અરવલ્લી જિલ્લાનું નામ રોશન કર્યું છે. તેમના સન્માનમાં સોમવારે, 9 ફેબ્રુઆરીના રોજ સવારે 8:30 કલાકે ભવ્ય સ્વાગત સમારોહનું આયોજન કરવામાં આવ્યું છે. આ સ્વાગત યાત્રા મોડાસાના APMC સર્કલથી શરૂ થઈને શ્રી ઉમિયા માતાજી મંદિર સુધી ડીજે સાથે વરઘોડા સ્વરૂપે આગળ વધશે.