ભારતીય ઓલરાઉન્ડર વોશિંગ્ટન સુંદર ન્યુઝીલેન્ડ સામેની વનડે શ્રેણીમાંથી બહાર થઈ ગયા છે. તેમને રવિવારે વડોદરામાં રમાયેલી પ્રથમ મેચ દરમિયાન પાંસળીમાં ઈજા થઈ હતી. બીસીસીઆઈના એક અધિકારીએ પીટીઆઈને જણાવ્યું કે વોશિંગ્ટનને ડાબી બાજુની નીચેની પાંસળીમાં દુખાવો થવા લાગ્યો હતો.

આ પહેલા, રવિવારે મેચ પછી ટીમના કેપ્ટન શુભમન ગિલે પ્રેસ કોન્ફરન્સમાં કહ્યું હતું કે સુંદરને ઈજા થઈ હતી. તેઓ 5 ઓવર બોલિંગ કરી શક્યા અને પછી મેદાનમાંથી બહાર નીકળી ગયા હતા.

26 વર્ષીય સુંદરે આ મેચમાં બોલિંગ કરતા 5 ઓવરમાં 27 રન આપ્યા હતા. ન્યુઝીલેન્ડની ઇનિંગ્સ દરમિયાન તેમને પાંસળીઓમાં ખેંચ અનુભવાઇ, ત્યારબાદ તેઓ મેદાન છોડીને બહાર નીકળી ગયા અને ફિલ્ડિંગ માટે પાછા ફર્યા નહીં. જોકે, ઈજા હોવા છતાં તેઓ બેટિંગ કરવા આવ્યા હતા.

રાહુલ બોલ્યા- ઈજાની ગંભીરતાનો અંદાજ નહોતો

કેએલ રાહુલે પણ વોશિંગ્ટનની ઈજા અંગે વાત કરી. તેણે કહ્યું, ‘મને ખબર નહોતી કે તેઓ બરાબર દોડી પણ નથી શકતા. મને બસ એટલું જ ખબર હતું કે પહેલી ઇનિંગ્સમાં તેમને થોડી તકલીફ થઈ હતી, પણ ઈજાની ગંભીરતાનો અંદાજ નહોતો. તે બોલને સારી રીતે હિટ કરી રહ્યા હતા.’

રાહુલે આગળ કહ્યું કે જ્યારે વોશિંગ્ટન બેટિંગ કરવા આવ્યા, ત્યારે ટીમ પહેલાથી જ સારા રન રેટથી રમી રહી હતી, તેથી તેમના પર વધુ દબાણ નહોતું. તેમણે સ્ટ્રાઈક રોટેટ કરી અને પોતાનું કામ સારી રીતે નિભાવ્યું.

ઈજા હોવા છતાં બેટિંગ કરી

ભારતના રન ચેઝ દરમિયાન વોશિંગ્ટન સુંદર નંબર-8 પર બેટિંગ કરવા ઉતર્યા. તેમણે અણનમ 7 રન બનાવ્યા અને કેએલ રાહુલ સાથે મળીને 16 બોલમાં 27 રનની મહત્વપૂર્ણ ભાગીદારી કરી. કેએલ રાહુલ 29 રન બનાવીને અણનમ રહ્યા. ભારતે 49 ઓવરમાં 6 વિકેટ ગુમાવીને 306 રન બનાવીને ચાર વિકેટે મેચ જીતી લીધી.

વોશિંગ્ટન સુંદરે અણનમ 7 રન બનાવ્યા અને કેએલ રાહુલ સાથે મળીને 16 બોલમાં 27 રનની મહત્વપૂર્ણ ભાગીદારી કરી.

સુંદર આ સિરીઝમાં ઈજાગ્રસ્ત થનાર ત્રીજા ભારતીય ખેલાડી

વોશિંગ્ટન આ સિરીઝમાં ઈજાગ્રસ્ત થનાર ત્રીજા ભારતીય ખેલાડી છે. આ પહેલા વિકેટકીપર બેટ્સમેન રિષભ પંત પણ શનિવારે પ્રેક્ટિસ દરમિયાન ઈજાગ્રસ્ત થયા હતા. તે ન્યુઝીલેન્ડ સામેની 3 મેચની વનડે સિરીઝમાંથી બહાર થઈ ગયા. તેમની જગ્યાએ ધ્રુવ જુરેલને ટીમમાં સામેલ કરવામાં આવ્યા. પંતને પણ પાંસળીઓમાં ખેંચાણ આવ્યું હતું. જ્યારે, સિરીઝ શરૂ થતા પહેલા તિલક વર્મા પણ ઈજાગ્રસ્ત થયા હતા.