.

વિરાટ કોહલી-રોહિત શર્મા જેવા સ્ટાર્સની હાજરીને કારણે ‘હાઉસફુલ’ થવાની શક્યતાને ધ્યાનમાં રાખીને ટ્રાફિકજામ ટળે અને મેચરસિકો શાંતિથી-આનંદપૂર્વક મેચની મજા માણીને ઘરે પરત ફરી શકે, એ પ્રકારનું આયોજન કરવામાં આવ્યું છે.

જાણો વડોદરાથી કોટંબી સ્ટેડિયમ કેવી રીતે પહોંચી શકાશે? ગોલ્ડન ચોકડીથી ગોલ્ડન ટોલનાકા અને ત્યાંથી કોટંબી સ્ટેડિયમ પહોંચ્યા બાદ સૌથી પહેલા જમણી સાઇડ જનરલ પાર્કિંગ આવશે, મુખ્ય રોડ પર આગળ વધતાં જમણી બાજુ VIP પાર્કિંગ આવશે. જનરલ અને VIP બંને પાર્કિંગમાંથી સ્ટેડિયમમાં જઈ શકાશે.

જાણો કોટંબી સ્ટેડિયમથી વડોદરા કેવી રીતે પહોંચી શકાશે? મેચ પૂરી થયા બાદ સ્ટેડિયમમાંથી બહાર નીકળીને ગોલ્ડન ચોકડી તરફ જઈ શકાશે, ગોલ્ડન ચોકડીથી વડોદરા જઈ શકાશે, જોકે ગોલ્ડન ચોકડી પહેલાં ડાબી બાજુ કુમેઠા ગામ તરફ જવાનો રસ્તો જાય છે. ત્યાંથી પણ આજે ચોકડીથી વડોદરા પહોંચી શકાશે. ગોલ્ડન ચોકડી પહેલાં ડાબી બાજુ વળીએ એટલે આગળ જતાં ડાબી બાજુ કુમેઠા ગામ તરફ જવાનો રસ્તો જશે. આગળ જઈને સિકોતર માતાનું મંદિર આવશે, ત્યાંથી જમણી બાજુ વળી જવાનું અને સીધા આગળ જતા આજવા ચોકડી આવી જશે. ત્યાંથી પણ વડોદરા જઈ શકાશે.

15 વર્ષ પછી વડોદરામાં ઇન્ટરનેશનલ મેચનું આયોજન થયું છે વડોદરા રેન્જ IG સંદીપ સિંહે જણાવ્યું હતું કે 11 જાન્યુઆરીએ ભારત અને ન્યૂઝીલેન્ડ વચ્ચે જે ઇન્ટરનેશનલ મેચ રમાવાની છે એ વડોદરામાં 15 વર્ષ પછી યોજાઈ રહી છે, જેથી એ પડકારરૂપ છે. અમે અપેક્ષા રાખીએ છીએ કે સ્ટેડિયમ ‘હાઉસફુલ’ રહેશે, જેના કારણે પબ્લિક અને ટ્રાફિકની અવરજવર ઘણી વધારે હશે. એને પગલે અમે વડોદરા શહેર પોલીસ સાથે સંકલન સાધ્યું છે. ટ્રાફિકની ગૂંચવણ ટાળવા માટે અમુક રૂટ્સ ડાઇવર્ટ કરવામાં આવ્યા છે. આ સાથે જ પાર્કિંગ માટે પૂરતી જગ્યાની વ્યવસ્થા કરી છે, જેથી રસ્તા પર કોઈ વાહન ઊભું ન રહે અને ટ્રાફિકની અવરજવર સરળતાથી થઈ શકે.

સ્ટેડિયમનો લે-આઉટ સમજીને જ પોલીસ-બંદોબસ્તની ગોઠવણી તેમણે વધુમાં જણાવ્યું હતું હતું કે અમે સ્ટેડિયમનો સંપૂર્ણ લે-આઉટનો અભ્યાસ કર્યો છે અને સેક્ટર મુજબ પોલીસ-બંદોબસ્ત ગોઠવ્યો છે. કઈ વસ્તુઓ અંદર લઈ જઈ શકાશે અને કઈ નહીં, એની જાહેરાત પાર્કિંગ એરિયામાં જ કરવામાં આવશે, જેથી બિનજરૂરી સામાન સાથે કોઈ અંદર ન આવે. અમારો હેતુ પબ્લિકને સુરક્ષિત અને આનંદદાયક વાતાવરણ પૂરું પાડવાનો છે.

અમે રૂટ A અને B એમ ડાયવર્ઝન આપ્યાં છે તેમણે ઉમેર્યું હતું કે વિરાટ કોહલી અને રોહિત શર્મા જેવા સેલિબ્રિટી ક્રિકેટર્સ આવતા હોવાથી અમારી જવાબદારી વધી જાય છે. એ માટે અમે તમામ પાસાંને ધ્યાનમાં રાખીને અગાઉથી જ ચોક્કસ પ્લાનિંગ કરી લીધું છે. ટ્રાફિક સમસ્યા અંગે તેમણે કહ્યું હતું કે અગાઉની મેચો વખતે અમારા અનુભવ મુજબ લોકો રસ્તા પર જ વાહનો પાર્ક કરીને જતા રહેતા હતા, જેના કારણે રસ્તો સાંકડો થઈ જતો હતો. આ વખતે અમે પાર્કિંગ સ્પેસ વધારી છે. અમે રૂટ A અને B એમ ડાયવર્ઝન આપ્યાં છે.

મેચને ધ્યાનમાં રાખીને ટ્રાફિક ડાયવર્ઝન જાહેર વડોદરા અધિક જિલ્લા મેજિસ્ટ્રેટ બી.એસ. પટેલે હાલોલ-વડોદરા રોડ પર ટ્રાફિક ડાયવર્ઝનને લઈને જાહેરનામું બહાર પાડ્યું છે. એ મુજબ, 11 જાન્યુઆરીના સવારે 10 વાગ્યાથી મેચ પૂર્ણ થાય ત્યાં સુધી હાલોલ તરફથી વડોદરા તરફ આવતાં તમામ વાહનોને મુખ્ય રોડનો ઉપયોગ કરવા પર પ્રતિબંધ મૂકવામાં આવ્યો છે. આ વાહનોએ વૈકલ્પિક માર્ગ તરીકે નીચે મુજબનો ડાયવર્ઝન રૂટ અપનાવવો ફરજિયાત રહેશે.

ડાયવર્ઝન રૂટ: જરોદ રેફરલ ચોકડીથી રાહકુઈ, રસુલાબાદ, રવાલ, જમણી બાજુએ વળાંક લઈ જેસંગપુરા પાટીયા, નિમેટા પાટિયા, સિકંદરપુરા પાટિયા, આજવા ચોકડી થઈને વડોદરા આવવાનું રહેશે.

આ સમાચાર પણ વાંચોઃ વડોદરાના ચાહકોમાં વિરાટ-રોહિતનો જબરો ક્રેઝ:ચાહકો હોટલ હયાત પેલેસની બહાર ઉમટી પડ્યા, ન્યૂઝીલેન્ડની ટીમ નેટ પ્રેક્ટિસ માટે સ્ટેડિયમ જવા રવાના

11 જાન્યુઆરીના રોજ વડોદરા શહેરના કોટંબી ઇન્ટરનેશનલ સ્ટેડિયમ ખાતે ભારત અને ન્યૂઝીલેન્ડ વચ્ચે સિરીઝની પ્રથમ વન-ડે ઇન્ટરનેશનલ મેચ રમાવવાની છે. જેને લઈને ભારત અને ન્યૂઝીલેન્ડની ટીમો વડોદરા આવી પહોંચી છે. ટીમ ઇન્ડિયા વડોદરાની હયાત પેલેસ હોટલમાં રોકાઈ છે. જ્યાં વિરાટ કોહલી અને રોહિત શર્મા સહિત ટીમ ઈન્ડિયાની એક ઝલક મેળવવા માટે ચાહકોનો જમાવડો થયો છે. એક ચાહક તો ગઈકાલે સાંજે 7 વાગ્યાથી રાત્રે એક વાગ્યા સુધી હોટલની બહાર વિરાટ કોહલીનો ફોટા સાથે ઓટોગ્રાફ મેળવવા માટે ઉભા રહ્યો હતો અને સવારે 8 વાગે ફરી તે હોટેલની બહાર આવી ગયો હતો. ઘણા ચાહકો પોતાની નોકરીમાં રજા મૂકીને વિરાટ કોહલીની ઝલક મેળવવા માટે પહોંચ્યા હતા અને જ્યાં સુધી વિરાટ કોહલી અને રોહિત શર્મા ની એક ઝલક જોવા નહીં મળે ત્યાં સુધી હોટેલ બહારથી હટશે નહીં તેમ જણાવ્યું હતું.

તો બીજી તરફ હોટલ વેલકમમાં રોકાયેલી ન્યૂઝીલેન્ડની ટીમ આજે સવારે કોટંબી સ્ટેડિયમ પર પ્રેક્ટિસ માટે રવાના થઈ હતી. કિવિઝ ખેલાડીઓ સાથે ફોટો પડાવવા ચાહકો પડાપડી કરતા જોવા મળ્યા હતા. (સંપૂર્ણ સમાચાર વાંચો)