એક્ટ્રેસ અવનીત કૌરે પ્લાસ્ટિક સર્જરી અને બોટોક્સ કરાવ્યું હોવાની ચર્ચા સોશિયલ મીડિયા પર ખૂબ થઈ રહી છે. આ અંગે અવનીતે પ્રતિક્રિયા આપી છે. તેણે સ્પષ્ટ કર્યું કે તેના દેખાવમાં ફેરફાર ઉંમર સાથે કુદરતી રીતે થયો છે. નોંધનીય છે કે અવનીત કૌર સોશિયલ મીડિયા પર ઘણી સક્રિય રહે છે અને અવારનવાર પોતાના ફોટો શેર કરતી રહે છે. સમય જતાં તેના દેખાવમાં આવેલા ફેરફારને લઈને સોશિયલ મીડિયા પર કેટલાક લોકો દ્વારા બોટોક્સ અથવા પ્લાસ્ટિક સર્જરી કરાવવાના દાવા કરવામાં આવે છે. બાળપણ અને અત્યારના ફોટાની સરખામણી કરવાની સલાહ આપી તાજેતરમાં ‘પિંકવિલા’ (એન્ટરટેઇનમેન્ટ વેબસાઇટ)ને આપેલા એક ઇન્ટરવ્યુમાં અવનીતે આ દાવાઓ વિશે કહ્યું કે, તે આવી કમેન્ટ્સ પર ધ્યાન આપતી નથી, પરંતુ જો લોકો આવું વિચારી રહ્યા છે, તો તેમણે પોતાના બાળપણ અને વર્તમાનની તસવીરોની સરખામણી કરવી જોઈએ.’ તેણે કહ્યું કે, ‘જેમ જેમ વ્યક્તિની ઉંમર વધે છે, તેના ફીચર્સમાં ફેરફાર થવો એ એક સામાન્ય પ્રક્રિયા છે. દરેક વ્યક્તિ ઉંમર સાથે બદલાય છે અને આ સંપૂર્ણપણે કુદરતી છે.’ સુંદરતાનો શ્રેય માતાને આપ્યો એક્ટ્રેસે એમ પણ કહ્યું કે તેના નાક, આંખો અને બાકીના ફીચર્સ પહેલા જેવા જ છે. તેણે પોતાના બ્યુટી મોલ (તિલ)નો ઉલ્લેખ કરતા કહ્યું કે, તે આજે પણ તેવો જ છે. અવનીતે પોતાની સુંદરતાનો શ્રેય પોતાની માતાને આપ્યો અને કહ્યું કે, જે કંઈ પણ છે, તે તેને કુદરતી રીતે મળ્યું છે. વર્ક ફ્રન્ટની વાત કરીએ તો, અવનીત છેલ્લે શાંતનુ મહેશ્વરી સાથે ફિલ્મ ‘લવ ઇન વિયેતનામ’માં જોવા મળી હતી. રાહત શાહ કાઝમીના ડિરેક્શનમાં બનેલી આ ફિલ્મ 12 સપ્ટેમ્બર 2025ના રોજ સિનેમાઘરોમાં રિલીઝ થઈ હતી, જેમાં અવનીતે સિમીની ભૂમિકા ભજવી હતી.