આફ્રિકન દેશ જિબૂતી પાસે દરિયામાં પ્રવાસીઓથી ભરેલી બોટ ડૂબી જતાં 109 લોકોનાં મોત થયા છે, જ્યારે 116 લોકો લાપતા છે. બોટમાં લગભગ 350 લોકો સવાર હતા. અકસ્માતમાં 80થી વધુ લોકોને બચાવી લેવામાં આવ્યા છે. સંયુક્ત રાષ્ટ્રની આંતરરાષ્ટ્રીય સ્થળાંતર સંસ્થા (IOM) અનુસાર, તમામ જીવિત બચેલા લોકો ઇથિયોપિયાના નાગરિકો છે. અકસ્માત 8 અને 9 ઑક્ટોબરની મધરાત દરમિયાન જિબૂતીના ઓબોક શહેરની ઉત્તરે થયો હતો. IOM અનુસાર, અકસ્માત બાદ અત્યાર સુધીમાં 109 મૃતદેહો મળી આવ્યા છે. તેમાં 52 પુરુષો, 42 મહિલાઓ અને 15 બાળકોનો સમાવેશ થાય છે. બાળકોમાં 9 છોકરીઓ અને 6 છોકરાઓ છે. જિબૂતીથી યમન જઈ રહી હતી બોટ દુર્ઘટનામાં બચી ગયેલા લોકોએ જણાવ્યું કે નાવ જિબૂતીથી યમન જઈ રહી હતી. આ દરમિયાન તે દરિયામાં પલટી ગઈ. ગુમ થયેલા લોકોની શોધ અને અસરગ્રસ્ત પરિવારોની મદદ માટે IOMની ટીમો જિબૂતીના અધિકારીઓ સાથે મળીને કામ કરી રહી છે. જિબૂતીમાં IOMના મિશન પ્રમુખ એલેક્ઝાન્ડર કોઈસાકે કહ્યું કે આ જાનમાલનું અત્યંત દુઃખદ નુકસાન છે. તેમણે કહ્યું કે તેમની સંવેદનાઓ એવા પરિવારો સાથે છે, જેમણે પોતાના સ્વજનો ગુમાવ્યા છે અથવા હજુ પણ તેમની ખબરની રાહ જોઈ રહ્યા છે. સારા જીવનની શોધમાં લોકો જોખમી દરિયાઈ માર્ગ અપનાવે છે IOM મુજબ, ગરીબી, અસુરક્ષા અને જળવાયુ પરિવર્તનની વધતી અસરને કારણે ઘણા લોકો રોજગાર અને સારા જીવનની શોધમાં આ જોખમી દરિયાઈ માર્ગ અપનાવે છે. પ્રવાસીઓ જિબૂતીથી બાબ-અલ-મંદેબ જળમાર્ગ પાર કરીને યમન પહોંચવાનો પ્રયાસ કરે છે. ત્યારબાદ તેમનું લક્ષ્ય ખાડી દેશો સુધી પહોંચવાનું હોય છે. આ માર્ગ પર દરિયામાં બોટ ડૂબી જવાનો અને જાનહાનિનું જોખમ સતત રહે છે. IOMએ કહ્યું કે મિડલ ઈસ્ટમાં અસ્થિરતા હોવા છતાં લોકો વધુ સારા આર્થિક અવસરોની શોધમાં આ જોખમી મુસાફરી કરી રહ્યા છે.