ભારતીય ગ્રાન્ડમાસ્ટર આર પ્રજ્ઞાનંદાએ 2026 ગ્રાન્ડ ચેસ ટૂર (GCT)નું ટાઇટલ જીતીને ઇતિહાસ રચ્યો છે. તે GCTનો ખિતાબ જીતનારા પ્રથમ ભારતીય બન્યો છે. સેન્ટ લુઇસમાં રમાયેલી ફાઇનલમાં પ્રજ્ઞાનંદાએ અમેરિકાના ગ્રાન્ડમાસ્ટર ફેબિયાનો કારુઆનાને 15-13થી હરાવ્યો. આ જીત સાથે પ્રજ્ઞાનંદાએ 2 લાખ ડોલર (લગભગ ₹1.91 કરોડ)ની પ્રાઇઝ મની પોતાના નામે કરી. 6 પોઈન્ટ પાછળ રહ્યા બાદ પ્રજ્ઞાનંદાએ કમબેક કર્યું ફાઇનલ મુકાબલાના છેલ્લા દિવસની શરૂઆતમાં પ્રજ્ઞાનંદા કારુઆનાથી 6 પોઈન્ટ પાછળ ચાલી રહ્યો હતો. જોકે, તેણે દિવસની શરૂઆતમાં જ બંને રેપિડ ગેમ્સ જીતીને પોતાની સ્થિતિ મજબૂત કરી અને સ્કોરમાં લીડ મેળવી લીધી. ત્યારબાદ રમાયેલી બ્લિટ્ઝ મેચમાં બંને ખેલાડીઓનું પ્રદર્શન બરાબરીનું રહ્યું, જેનાથી પ્રજ્ઞાનંદાએ 2 પોઈન્ટની લીડ જાળવી રાખી અને 15-13ના અંતિમ સ્કોર સાથે પ્રથમ વખત ગ્રાન્ડ ચેસ ટૂરનો ખિતાબ પોતાના નામે કર્યો.
ત્રીજા નંબરના મેચમાં વેસ્લી સોની જીત ત્રીજા સ્થાન માટે રમાયેલા મેચમાં અમેરિકાના ગ્રાન્ડમાસ્ટર વેસ્લી સોએ જર્મનીના વિન્સેન્ટ કીમરને 18-12ના અંતરથી હરાવ્યો. રેપિડ સેક્શનમાં બંને ખેલાડીઓ વચ્ચે બરાબરીનો મુકાબલો રહ્યો, પરંતુ વેસ્લી સોએ સતત ચારેય બ્લિટ્ઝ ગેમ્સ જીતીને એક મેચ બાકી રહેતા જ જીત સુનિશ્ચિત કરી લીધી. 2027 ગ્રાન્ડ ચેસ ટૂર માટે ટૉપ 3 ખેલાડીઓ ક્વોલિફાય આ ટુર્નામેન્ટના ફાઇનલ પરિણામો સાથે જ આગામી સિઝન એટલે કે 2027 ગ્રાન્ડ ચેસ ટૂર માટે ટોપ 3 ખેલાડીઓએ ડાયરેક્ટ ક્વોલિફાય કરી લીધું છે. આ 3 ખેલાડીઓમાં ચેમ્પિયન પ્રજ્ઞાનંદા, રનર-અપ ફેબિયાનો કારુઆના અને ત્રીજા સ્થાને રહેલા વેસ્લી સોનો સમાવેશ થાય છે. ટુર્નામેન્ટ સિંગલ-એલિમિનેશન નોકઆઉટ ફોર્મેટમાં રમાઈ હતી, જેમાં ચાર ખેલાડીઓ ફેબિયાનો કારુઆના, વેસ્લી સો, વિન્સેન્ટ કીમર અને પ્રજ્ઞાનંદે ભાગ લીધો હતો. 2015માં થઈ હતી શરૂઆત ગ્રાન્ડ ચેસ ટૂર વિશ્વની મોટી શતરંજ ટુર્નામેન્ટની એક કેટેગરી છે. તેની શરૂઆત 2015માં થઈ હતી. તેમાં વર્ષભર અલગ-અલગ શહેરોમાં ક્લાસિકલ, રેપિડ અને બ્લિટ્ઝ ફોર્મેટમાં મુકાબલા રમાય છે. ખેલાડીઓને તેમના પ્રદર્શનના આધારે પોઈન્ટ્સ મળે છે અને સીઝનના અંતે આ જ પોઈન્ટ્સના આધારે ગ્રાન્ડ ચેસ ટૂર ફાઇનલ માટે ખેલાડીઓની પસંદગી થાય છે.