દિગ્ગજ ક્રિકેટર સુનીલ ગાવસ્કરે વેસ્ટ ઇન્ડીઝ સામેની બીજી T20Iમાં મયંક યાદવને 17મી ઓવર ન આપવાના નિર્ણય પર સવાલ ઉઠાવ્યા છે. તેમણે કહ્યું કે આ ઓવર માટે કુલદીપ યાદવની જગ્યાએ મયંક યાદવ અથવા અર્શદીપ સિંહને પસંદ કરી શકાયો હોત. શુક્રવારે રાંચીમાં રમાયેલી મેચમાં ભારતે 250 રનનો ટાર્ગેટ આપ્યો હતો. વેસ્ટ ઇન્ડીઝે 18.3 ઓવરમાં ચાર વિકેટ ગુમાવીને આ ટાર્ગેટ ચેઝ કરી લીધો અને પાંચ મેચની સિરીઝ 1-1થી બરાબર કરી. કેપ્ટન શાઈ હોપને પ્લેયર ઑફ ધ મેચ પસંદ કરવામાં આવ્યો. કુલદીપની ઓવરમાં 3 છગ્ગા અને એક ચોગ્ગો લાગ્યો કુલદીપે 17મી ઓવરમાં 24 રન આપ્યા. તેમાં ત્રણ છગ્ગા, એક ચોગ્ગો અને એક વાઈડનો સમાવેશ થાય છે. આ ઓવર બાદ વેસ્ટ ઇન્ડીઝે ટાર્ગેટને ચેઝ કરવામાં સરસાઈ મેળવી લીધી. 18મી ઓવરમાં વેસ્ટ ઇન્ડીઝના કેપ્ટન શાઈ હોપ અને રોમારિયો શેફર્ડે અર્શદીપ સામે 17 રન બનાવ્યા. અક્ષર પટેલની ઓવરમાં બે છગ્ગા ફટકારીને વેસ્ટ ઇન્ડીઝે મેચ જીતી લીધી. ગાવસ્કરે કહ્યું- હું મયંક અથવા અર્શદીપમાંથી કોઈ એકને પસંદ કરત ગાવસ્કરે જિયોસ્ટારને કહ્યું, ‘હું 17મી ઓવરમાં અર્શદીપ અથવા મયંકમાંથી કોઈ એકને બોલિંગ આપત. અર્શદીપે પોતાની છેલ્લી ઓવરમાં ઘણા રન આપ્યા હતા, પરંતુ મયંકે શરૂઆતના ઝટકા આપ્યા હતા.’ તેમણે કહ્યું, ‘પડેલી વિકેટોમાંથી ત્રણ મયંકે લીધી હતી. તેની ઇકોનોમી લગભગ 12 રન પ્રતિ ઓવર હતી. તે સમયે વેસ્ટ ઇન્ડીઝને આનાથી વધુ રનરેટની જરૂર હતી.’ ગાવસ્કરે કહ્યું, ‘જો મયંક એક વિકેટ લઈ લેત, તો વેસ્ટ ઇન્ડીઝ દબાણમાં આવી જાત. ક્યારેક જ્યારે મેચ તમારા પક્ષમાં જઈ રહી હોય છે, ત્યારે સારી બોલિંગ ન થઈ રહી હોય છતાં પણ વિકેટ મળી જાય છે.’ મયંકે વિન્ડીઝના ટોચના ક્રમને પરેશાન કર્યો જ્યારે કુલદીપને બોલ સોંપવામાં આવ્યો, ત્યારે મયંકની એક ઓવર બાકી હતી. તેણે વેસ્ટ ઇન્ડીઝના ટોચના ક્રમને પરેશાન કરતાં કામિલ પૂરનને 0, શિમરોન હેટમાયરને 4 અને રોવમેન પોવેલને 24 રન પર આઉટ કર્યા હતા. મયંકની આ વિકેટોના કારણે વેસ્ટ ઇન્ડીઝની ટીમ છઠ્ઠી ઓવર સુધીમાં 58 રનમાં ત્રણ વિકેટ ગુમાવી ચૂકી હતી. ગાવસ્કરના મતે, તે સમયે મયંકની વધુ એક વિકેટ ભારતને મજબૂત સ્થિતિમાં લાવી શકી હોત. નવમી ઓવર શિવમ દુબેને આપવી ભૂલ હતી- ગાવસ્કર ગાવસ્કરે ભારતના વધુ એક બોલિંગ ફેરફાર પર પણ સવાલ ઉઠાવ્યો. તેમણે કહ્યું કે નવમી ઓવરમાં શિવમ દુબેને બોલિંગ આપવાનો નિર્ણય યોગ્ય નહોતો. તેમણે કહ્યું, ‘જ્યારે બેટર પોતાની નજર સ્થિર કરવાનો પ્રયાસ કરી રહ્યા હતા, ત્યારે કદાચ કુલદીપને બોલિંગ આપવી વધુ સારી પસંદગી હોત.’ ચહલે સપાટ પીચ પર બોલરોની મુશ્કેલી જણાવી ભારતના સ્પિનર યુઝવેન્દ્ર ચહલે પણ સપાટ પીચ પર બોલરોને મળતી મદદના અભાવ અંગે ચિંતા વ્યક્ત કરી. તેણે કહ્યું, ‘આવી પીચ પર બોલરો માટે કંઈ જ હોતું નથી. બોલ જૂનો થાય ત્યારે ઝાકળ પડે છે અને બોલ બેટ પર સારી રીતે આવે છે. મેદાનો પણ નાના થતા જાય છે.’ તેણે કહ્યું, ‘અમે IPLમાં પણ આવું જોયું છે, જ્યારે 260 રનનો ટાર્ગેટ 19 ઓવરમાં ચેઝ કરવામાં આવ્યો હતો. આ મેચમાં પણ 250 રનનો ટાર્ગેટ 18.3 ઓવરમાં સરળતાથી ચેઝ કરી લેવામાં આવ્યો.’ ચહલે સવાલ કર્યો, ‘તો બોલરો શું કરે? તેમની કુશળતાનો શું ફાયદો છે? મને તેમના માટે ખરાબ લાગે છે, કારણ કે હું પણ બોલર છું.’