આજ 30 માર્ચ છે. તમારી પાસે તમારા નાણાકીય કાર્યો પતાવવા માટે હવે ફક્ત 2 દિવસ બાકી છે. 31 માર્ચની રાત્રે 12 વાગ્યા પછી દેશમાં ટેક્સ અને બેંકિંગ સંબંધિત 3 મોટા કાર્યોની ડેડલાઇન સમાપ્ત થઈ રહી છે. 31 માર્ચની રાત સુધીમાં આ 3 કામ પતાવો… 1. સરકારી યોજનાઓ સક્રિય રાખો: PPF, NPS અને સુકન્યામાં ન્યૂનતમ બેલેન્સ જમા કરો પબ્લિક પ્રોવિડન્ટ ફંડ (PPF), નેશનલ પેન્શન સ્કીમ (NPS) અથવા સુકન્યા સમૃદ્ધિ યોજના (SSY) ને ચાલુ રાખવા માટે દર વર્ષે ₹250 થી ₹500 સુધીની ન્યૂનતમ રકમ જમા કરવી ફરજિયાત છે. જો ખાતું બંધ થઈ ગયું હોય તો તેને ફરીથી ચાલુ કરાવવા માટે પેનલ્ટી લાગશે અને બેંકના ધક્કા ખાવા પડશે. 2. જૂની ટેક્સ રિજીમમાં બચતનો મોકો: 80C અને 80D હેઠળ રોકાણ કરો જૂની ટેક્સ રિજીમમાં ટેક્સ બચાવવા માટે રોકાણ કરવાનો આવતીકાલે છેલ્લો દિવસ છે. સેક્શન 80C હેઠળ ₹1.5 લાખ સુધીની છૂટ મેળવવા માટે તમે PPF, લાઇફ ઇન્શ્યોરન્સમાં રોકાણ કરી શકો છો. આ ઉપરાંત, 80D હેઠળ હેલ્થ ઇન્શ્યોરન્સ પ્રીમિયમ અને મેડિકલ ખર્ચાઓ પર 1 લાખ સુધીની છૂટ મળે છે. 1 એપ્રિલ કે તે પછી કરવામાં આવેલું રોકાણ આવતા વર્ષના ખાતામાં ગણવામાં આવશે. 3. સેલરી ક્લાસ માટે જરૂરી: ઓફિસમાં જમા કરો ઇન્વેસ્ટમેન્ટ પ્રૂફ જો તમે નોકરીયાત છો, તો તમારે તમારી ઓફિસમાં રોકાણના પુરાવા જમા કરાવવા પડશે. આમાં ઘરના ભાડાની રસીદો, વીમા પ્રીમિયમની રસીદ, હોમ લોનના વ્યાજનું પ્રમાણપત્ર શામેલ છે. જો તમે આ દસ્તાવેજો સમયસર જમા નહીં કરાવો, તો કંપની તમારા છેલ્લા પગારમાંથી વધુ TDS કાપી લેશે. તેને પાછું મેળવવા માટે ઇન્કમ ટેક્સ રિટર્ન ભરવા સુધી રાહ જોવી પડશે.