દુલીપ ટ્રોફીની સેમિફાઇનલમાં મંગળવારે ઇસ્ટ ઝોને ડિફેન્ડિંગ ચેમ્પિયન સેન્ટ્રલ ઝોનને 4 વિકેટે હરાવ્યું. આ સાથે જ ટીમે ફાઇનલમાં સ્થાન મેળવી લીધું, જ્યાં તેનો મુકાબલો બીજી સેમિફાઇનલની વિજેતા ટીમ સાથે થશે. ઇસ્ટ ઝોનને જીતવા માટે 159 રનનો ટાર્ગેટ મળ્યો હતો, જેને ટીમે ટેસ્ટ મેચના ત્રીજા દિવસે 80.1 ઓવરમાં ચેઝ કરી લીધો. કેપ્ટન ઇશાન કિશન 39 અને મોહમ્મદ શમી 8 રન બનાવીને અણનમ પરત ફર્યા. ટીમના વાઇસ-કેપ્ટન વૈભવ સૂર્યવંશીએ 40 રનની ઇનિંગ રમી. વૈભવે પ્રથમ ઇનિંગમાં 7 ચોગ્ગા અને 7 છગ્ગા સાથે 92 રન બનાવ્યા હતા. સેન્ટ્રલ ઝોને 37 રન પર 3 વિકેટ ગુમાવી દીધી હતી સેન્ટ્રલ ઝોનની શરૂઆત ખરાબ રહી અને 37 રન સુધીમાં ટીમના ત્રણ વિકેટ પડી ગયા. કેપ્ટન રજત પાટીદાર 5 અને રિંકુ સિંહ 20 રન જ બનાવી શક્યા. 95 રન સુધીમાં 7 વિકેટ ગુમાવ્યા પછી અરશદ ખાને લોઅર ઓર્ડરના બેટર્સ સાથે મળીને ટીમને 150 રન પાર પહોંચાડી. જોકે, ટીમ 158 રન પર જ ઓલઆઉટ થઈ ગઈ. અમન મોખાડેએ ટીમ માટે સૌથી વધુ 41 રન બનાવ્યા. અરશદ ખાને 25 અને હર્ષ દુબેએ 24 રનની ઇનિંગ રમી. મુકેશ કુમારને 4, શમીને 3 વિકેટ ઈસ્ટ ઝોન તરફથી મુકેશ કુમાર સૌથી સફળ બોલર રહ્યો. તેણે 12 ઓવરમાં 44 રન આપીને 4 વિકેટ લીધી. મોહમ્મદ શમીએ 3, જ્યારે અભિજીત સરકાર, અનુકૂલ રોય અને કુનૈન કુરેશીએ 1-1 વિકેટ લીધી. શમીએ કુલ 900 વિકેટ પૂરી કરી મોહમ્મદ શમીએ દુલીપ ટ્રોફી સેમિફાઇનલના પ્રથમ દિવસે એક મોટો રેકોર્ડ પોતાના નામે કર્યો. ઈસ્ટ ઝોન તરફથી રમી રહેલા શમીએ સેન્ટ્રલ ઝોન સામે 3 વિકેટ લઈને પ્રોફેશનલ ક્રિકેટમાં પોતાની 900 વિકેટ પૂરી કરી. તે આ સિદ્ધિ હાંસલ કરનાર માત્ર છઠ્ઠા ભારતીય બોલર બન્યા. શમીએ 36 વર્ષની ઉંમરે આ મુકામ હાંસલ કર્યો. ઈસ્ટ ઝોન તરફથી પહેલી ઇનિંગમાં વૈભવ સૂર્યવંશીની તોફાની ફિફ્ટી સેન્ટ્રલ ઝોન અને ઈસ્ટ ઝોનનો પ્રથમ દાવ બરાબરી પર રહ્યો. બંને ટીમે 266 રન બનાવ્યા. ઈસ્ટ ઝોન માટે વૈભવ સૂર્યવંશીએ 92 અને અભિમન્યુ ઈશ્વરને 69 રન બનાવ્યા. બંનેએ પ્રથમ વિકેટ માટે 161 રન જોડ્યા. જોકે, આ પછી ઈસ્ટ ઝોને આગામી 104 રનમાં પોતાની તમામ વિકેટ ગુમાવી દીધી. સેન્ટ્રલ ઝોન તરફથી હર્ષ દુબેએ 4, જ્યારે આર્યન પાંડે અને યશ ઠાકુરે 3-3 વિકેટ લીધી. 6,6,6,6,6,6,6…વૈભવની સેમિફાઇનલમાં આક્રમક બેટિંગ વૈભવ સૂર્યવંશીએ એકવાર ફરી પોતાની બેટિંગથી શાનદાર પ્રદર્શન કર્યું છે. તેણે દુલીપ ટ્રોફી 2026ની પહેલી સેમીફાઇનલમાં તોફાની ઇનિંગ રમી છે. આ ઇનિંગ દરમિયાન તેણે ચાહકોનું ભરપૂર મનોરંજન કર્યું. જોકે, ઈસ્ટ ઝોન અને સેન્ટ્રલ ઝોન વચ્ચે રમાઇ રહેલી દુલીપ ટ્રોફીની સેમિફાઇનલ મેચમાં વૈભવ સદી ફટકારવાથી માત્ર થોડા રનથી ચૂકી ગયો, પરંતુ તેણે પોતાની ઇનિંગમાં ચોગ્ગા અને છગ્ગાનો વરસાદ કરી દીધો. આ તોફાની ઇનિંગ સાથે તેણે એક મોટો રેકોર્ડ પણ પોતાના નામે કરી લીધો છે. સંપૂર્ણ સમાચાર વાંચો… સાઉથ ઝોન 312 રન પર ઓલઆઉટ બીજી સેમિફાઇનલમાં સાઉથ ઝોન અને નોર્થ ઝોન આમને-સામને છે. ત્રીજા દિવસે સાઉથ ઝોનની ટીમ પ્રથમ ઇનિંગ્સમાં 312 રન પર ઓલઆઉટ થઈ ગઈ. કેપ્ટન તિલક વર્માએ 116 રનની અણનમ ઇનિંગ્સ રમી. તેણે 250 બોલનો સામનો કરતા 9 ચોગ્ગા ફટકાર્યા. શ્રેયસ ગોપાલે 87 અને નારાયણ જગદીશને 36 રન બનાવ્યા. સાઉથ ઝોનની શરૂઆત ખરાબ રહી. રિકી ભુઈ 5 અને શેખ રશીદ ખાતું ખોલ્યા વગર આઉટ થયા. આ પછી નારાયણ જગદીશન અને તિલક વર્માએ ઇનિંગ્સ સંભાળી. જગદીશન 36 રન બનાવીને આઉટ થયો, જ્યારે તિલકે શ્રેયસ ગોપાલ સાથે મળીને ઇનિંગ્સને આગળ વધારી. તિલક-ગોપાલે 176 રન જોડ્યા તિલક વર્મા અને શ્રેયસ ગોપાલે છઠ્ઠી વિકેટ માટે 176 રનની ભાગીદારી કરી. ગોપાલ 87 રન બનાવીને આઉટ થયો. ત્યારબાદ સાઉથ ઝોનની વિકેટો સતત પડતી રહી અને ટીમ 100.3 ઓવરમાં 312 રન બનાવીને ઓલઆઉટ થઈ ગઈ. ગુરનૂર બરારે 4 વિકેટ લીધી નોર્થ ઝોન તરફથી ગુરનૂર બરાર સૌથી સફળ બોલર રહ્યો. તેણે 23 ઓવરમાં 88 રન આપીને 4 વિકેટ લીધી. અર્શદીપ સિંહ અને અંશુલ કંબોજે 2-2 વિકેટ ઝડપી, જ્યારે આબિદ મુશ્તાકને 1 સફળતા મળી.