આર્જેન્ટિનાના ફૂટબોલર લિયોનેલ મેસ્સીના પિતા જ્યોર્જ મેસ્સીનું 68 વર્ષની વયે નિધન થયું. તેઓ લાંબા સમયથી બીમાર હતા. છેલ્લા કેટલાક મહિનાઓથી તેમની સારવાર ચાલી રહી હતી. મેસ્સીના બાળપણના ક્લબ ન્યુવેલ્સ ઓલ્ડ બોયઝે શનિવારે તેમના નિધનની પુષ્ટિ કરી. ક્લબે શોક વ્યક્ત કરતા તેમને મેસ્સીના કરિયરની સૌથી મજબૂત તાકાત ગણાવ્યા. જ્યોર્જ માત્ર મેસ્સીના પિતા જ નહોતા. તેઓ બે દાયકાથી વધુ સમય સુધી તેમના એજન્ટ અને સલાહકાર પણ રહ્યા. બાર્સેલોના, PSG અને ઇન્ટર મિયામી જેવા મોટા ક્લબ ટ્રાન્સફરમાં તેમની મહત્વની ભૂમિકા રહી. ક્લબે અડધો ધ્વજ ઝુકાવ્યો ન્યુવેલ્સ ઓલ્ડ બોયઝે શ્રદ્ધાંજલિમાં ક્લબનો ધ્વજ અડધો ઝુકાવ્યો. ક્લબે કહ્યું, જ્યોર્જ અને તેમની પત્ની સેલિયાએ મેસ્સીની દરેક સફરમાં સાથ આપ્યો. બાળપણની તાલીમથી લઈને વર્લ્ડ ફૂટબોલના ટોચ સુધી પહોંચવામાં જ્યોર્જનું યોગદાન રહ્યું. જૂનમાં પરિવારે પ્રાઈવસી માગી હતી જૂનમાં મેસ્સી પરિવારે જણાવ્યું હતું કે જ્યોર્જ સ્વાસ્થ્ય સંબંધિત સમસ્યાઓથી ઝઝૂમી રહ્યા છે. તેઓ ડોકટરોની દેખરેખ હેઠળ હતા. પરિવારે મીડિયાને અફવાઓ ન ફેલાવવા અને પ્રાઈવસીનું સન્માન કરવા અપીલ પણ કરી હતી. 13 વર્ષની ઉંમરે મેસ્સીને બાર્સેલોના લઈ ગયા જ્યોર્જ આર્જેન્ટિનાના રોસારિયોમાં સ્ટીલ ફેક્ટરીમાં કામ કરતા હતા. શરૂઆતના દિવસોમાં તેમણે મેસ્સીને સ્થાનિક ક્લબમાં તાલીમ પણ આપી હતી. જ્યારે મેસ્સીમાં ગ્રોથ હોર્મોન ડેફિશિયન્સી હોવાનું જાણવા મળ્યું, ત્યારે સારવારનો ખર્ચ ઉઠાવવો મુશ્કેલ હતો. આવા સમયે જ્યોર્જ 13 વર્ષના મેસ્સીને લઈને બાર્સેલોના પહોંચ્યા. બાર્સેલોનાએ લા માસિયા એકેડમીમાં દાખલ કર્યા. સારવારનો ખર્ચ પણ ક્લબે ઉઠાવ્યો. આ પછી જ્યોર્જ દરેક પગલે પુત્ર સાથે રહ્યા. બે દાયકા સુધી વ્યાવસાયિક નિર્ણયો સંભાળ્યા મેસ્સીના વ્યાવસાયિક કારકિર્દીની શરૂઆતથી જ જ્યોર્જ તેમના એજન્ટ રહ્યા. તેમણે બાર્સેલોનાના મોટા કરારો, 2021માં ક્લબ છોડવાની પ્રક્રિયા, PSG અને પછી ઇન્ટર મિયામી ટ્રાન્સફર સુધી તમામ મહત્વપૂર્ણ વાટાઘાટો સંભાળી. 2023માં બાર્સેલોનાના અધ્યક્ષ જોઆન લાપોર્ટાને પણ જ્યોર્જે જ મેસ્સીના ઇન્ટર મિયામી જવાનો નિર્ણય જણાવ્યો હતો. વર્લ્ડ કપ દરમિયાન પણ ચર્ચામાં રહ્યા 2026 FIFA વર્લ્ડ કપ દરમિયાન પણ જ્યોર્જની તબિયત ચર્ચામાં રહી. અલ્જીરિયા સામે ગોલ કર્યા પછી ભાવુક થયેલા મેસ્સીએ કહ્યું હતું કે છેલ્લા કેટલાક દિવસો તેમના માટે ખૂબ મુશ્કેલ રહ્યા છે. બાદમાં પરિવારે નિવેદન જારી કરીને બીમારીની પુષ્ટિ કરી. 2016માં ટેક્સ કેસમાં દોષિત ઠર્યા 2016માં સ્પેનની કોર્ટે લિયોનેલ મેસ્સી અને જ્યોર્જ મેસ્સીને ટેક્સ ચોરીના કેસમાં દોષિત ઠેરવ્યા હતા. જોકે, બંનેને બે વર્ષથી ઓછી સજા મળી. તેથી તેમને જેલમાં જવું પડ્યું ન હતું.