સાઉથ આફ્રિકાએ વિન્ડહોકમાં રમાયેલી T-20 ટ્રાઈ સિરીઝની બીજી મેચમાં ઝિમ્બાબ્વેને 7 વિકેટે હરાવ્યું. ઝિમ્બાબ્વેએ પહેલા બેટિંગ કરતા 20 ઓવરમાં 8 વિકેટે 144 રન બનાવ્યા. જવાબમાં સાઉથ આફ્રિકાએ 13.4 ઓવરમાં 3 વિકેટ ગુમાવીને 146 રન બનાવી મેચ જીતી લીધી. ડેવોલ્ડ બ્રેવિસે 32 બોલમાં અણનમ 75 રનની ઇનિંગ રમી. તેણે 7 ચોગ્ગા અને 6 છગ્ગા ફટકાર્યા. આ ટ્રાઈ સિરીઝમાં તેની સતત બીજી 75 રનની ઇનિંગ હતી. સાઉથ આફ્રિકાને પ્રથમ મેચમાં નામિબિયા સામે 18 રનથી હાર મળી હતી. ઝિમ્બાબ્વેએ ઝડપી શરૂઆત કરી, પછી વિકેટો પડતી ગઈ ટૉસ જીતીને બેટિંગ કરી રહેલા ઝિમ્બાબ્વેની શરૂઆત સારી રહી. બેન કરને 12 બોલમાં 24 રન બનાવ્યા. તેણે ડુઆન યાન્સેનના એક ઓવરમાં 14 રન પણ ફટકાર્યા. તેની સાથે બ્રાયન બેનેટે ઇનિંગ્સને આગળ વધારી. કરન 24 રન બનાવીને મિડઓફ પર કેચ આઉટ થયો. તાડિવાનાશે મારુમાનીએ પણ ઝડપથી રન બનાવ્યા. તેણે 13 બોલમાં 30 રનની ઇનિંગ્સ રમી. બેનેટે 35 બોલમાં 34 રન બનાવ્યા. જોકે, પાવરપ્લે પછી ઝિમ્બાબ્વેની રન ગતિ ધીમી પડી ગઈ. 9 ઓવર પછી ઝિમ્બાબ્વેનો સ્કોર 74/1 હતો. ત્યારબાદ ટીમ આગામી 6.1 ઓવરમાં માત્ર 20 રન ઉમેરી શકી અને ચાર વિકેટ ગુમાવી દીધી. પ્રેનાલન સુબ્રાયને મધ્ય ઓવરોમાં રન બનાવવા પર અંકુશ લગાવ્યો. ત્યારબાદ ઇથન બૉશ અને ક્વેના મફાકાએ પણ ધીમી ગતિની બોલિંગથી બેટર્સને પરેશાન કર્યા. સિકંદર રઝા 10 રન બનાવીને બોશની બોલિંગ પર કેચ આઉટ થયો. રયાન બર્લને સુબ્રાયને બોલ્ડ કર્યો. ત્યારબાદ વેસ્લી મધેવેરે અને મારુમાનીએ છઠ્ઠી વિકેટ માટે 23 બોલમાં 43 રન જોડ્યા. મારુમાની આઉટ થયા પછી ઝિમ્બાબ્વે છેલ્લી બે ઓવરમાં માત્ર 14 રન જ ઉમેરી શક્યું અને 144/8 સુધી પહોંચ્યું. યાન્સેનને 3 વિકેટ સાઉથ આફ્રિકા તરફથી ડુઆન યાન્સેન સૌથી સફળ બોલર રહ્યો. તેણે 4 ઓવરમાં 45 રન આપીને 3 વિકેટ લીધી. પ્રેનાલન સુબ્રાયને 2 વિકેટ ઝડપી. એથન બૉશે ડેબ્યૂ મેચમાં 1 વિકેટ લીધી. તેણે 4 ઓવરમાં માત્ર 20 રન આપ્યા. ક્વેના મફાકાએ પણ એક વિકેટ મેળવી. બ્રેવિસે 6 સિક્સર ફટકારી 145 રનને ચેઝ કરતા સાઉથ આફ્રિકાએ ઝડપી શરૂઆત કરી. જોર્ડન હરમન અને લુઆન-ડ્રે પ્રિટોરિયસે પહેલી વિકેટ માટે 20 બોલમાં 32 રન જોડ્યા. હરમન 13 બોલમાં 20 રન બનાવીને આઉટ થયો. પ્રિટોરિયસે 13 બોલમાં 22 રન બનાવ્યા. તેના આઉટ થયા બાદ બ્રેવિસ ક્રિઝ પર આવ્યો અને પહેલા જ બોલ પર છગ્ગો ફટકાર્યો. તેણે 24 બોલમાં પોતાની અડધી સદી પૂરી કરી. પાવરપ્લે બાદ સાઉથ આફ્રિકા 61/2ના સ્કોર સુધી પહોંચી ગયું હતું. બ્રેવિસે ગ્રેમ ક્રીમરને ખાસ નિશાન બનાવ્યો. તેની બે ઓવરમાં 32 રન લૂંટ્યા. બ્રેવિસે ક્રીમર સામે ચાર છગ્ગા ફટકાર્યા. 10 ઓવર બાદ સાઉથ આફ્રિકાનો સ્કોર 103/2 હતો. બ્રેવિસે 32 બોલમાં 75 રન બનાવ્યા. તેની ઇનિંગ્સમાં 7 ચોગ્ગા અને 6 છગ્ગા સામેલ હતા. રુબિન હરમન 7 બોલમાં અણનમ 11 રન બનાવ્યા. બંનેએ 39 રનની અણનમ ભાગીદારી કરીને ટીમને જીત સુધી પહોંચાડી. ડી જ્યોર્જીની ખરાબ ફોર્મ યથાવત સાઉથ આફ્રિકાના ટોની ડી જ્યોર્જી સતત બીજી મેચમાં 20 રન પહેલા આઉટ થયા. તેણે ઝિમ્બાબ્વે સામે 15 રન બનાવ્યા. આ પહેલા તે નામિબિયા સામે 9 રન પર આઉટ થયો હતો. સાઉથ આફ્રિકાના 2 પોઇન્ટ, ઝિમ્બાબ્વેનું ખાતું ખુલ્યું નથી આ જીત પછી સાઉથ આફ્રિકાના 2 પોઇન્ટ થઈ ગયા છે. નામિબિયાના પણ 2 પોઇન્ટ છે. ઝિમ્બાબ્વે પોતાની પહેલી મેચમાં હાર પછી પોઇન્ટ વગર છે. સોમવારે નામિબિયા અને ઝિમ્બાબ્વે આમને-સામને હશે.