ભારત અને શ્રીલંકા વચ્ચે કોલંબો ટેસ્ટમાં યશસ્વી જયસ્વાલ અને અસિથા ફર્નાન્ડો વચ્ચે બોડી કોન્ટેક્ટ થયો હતો. હવે આખો વિવાદ મેદાનથી સોશિયલ મીડિયા સુધી પહોંચી ગયો છે. ભારતીય ઓપનરે દિગ્ગજ કોમેન્ટેટર હર્ષા ભોગલેની આલોચના પર પોતે જવાબ આપ્યો છે. જયસ્વાલે ભોગલેને કહ્યું કે જ્યારે તેમને એ નથી ખબર કે ફર્નાન્ડોએ મેદાન પર શું કહ્યું હતું તો તેમણે કોઈ તારણ પર ન પહોંચવું જોઈએ. સાથે જ તેણે સ્પષ્ટ શબ્દોમાં કહ્યું કે જો કોઈ હદ પાર કરશે તો ભારત ચૂપ નહીં રહે, પણ લડીને જવાબ આપશે. આ આખો મામલો કોલંબો ટેસ્ટ મેચના પહેલા દિવસે થયો. યશસ્વી જયસ્વાલને શ્રીલંકન ફાસ્ટ બોલર ફર્નાન્ડોએ 45 રનના અંગત સ્કોર પર બોલ્ડ કર્યો. વિકેટ લીધા પછી ફર્નાન્ડોએ આક્રમક અંદાજમાં સેલિબ્રેશન કર્યું અને આ પછી બંને વચ્ચે બોલાચાલી થઈ. બંને વચ્ચે બોડી કોન્ટેક્ટ પણ થયો. જયસ્વાલ-ફર્નાન્ડો વચ્ચેના ઝઘડાનો વીડિયો જુઓ… હર્ષા ભોગલેએ પોતાની વાત રજૂ કરી હર્ષા ભોગલે આ વાતથી ખુશ ન હતા કે જયસ્વાલે સામો જવાબ આપ્યો. તેમનું માનવું હતું કે આઉટ થયા પછી ભારતીય બેટરે ફર્નાન્ડો સાથે બોડી કોન્ટેક્ટ કરવાના બદલે પેવેલિયન તરફ આગળ વધતા રહેવું જોઈતું હતું. ક્રિકબઝે ભોગલેની કોમેન્ટનો વીડિયો પોતાના ઈન્સ્ટાગ્રામ પર પોસ્ટ કર્યો અને કેપ્શનમાં પૂછ્યું, ‘શું જયસ્વાલે હદ પાર કરી?’ જયસ્વાલે આખા મામલે શું કહ્યું? અહીંથી જ આ મામલામાં નવી વાત સામે આવી. બેટર જયસ્વાલે પોસ્ટના કોમેન્ટ સેક્શનમાં પોતે ભોગલેના અભિપ્રાયનો જવાબ આપ્યો. જયસ્વાલે લખ્યું, ‘જો તમને નથી ખબર કે તેણે શું કહ્યું હતું તો કૃપા કરીને તમારો ચુકાદો આપશો નહીં. જો કોઈ હદ પાર કરે છે તો અમારે તેને જણાવવું પડશે. આ ભારત છે, અમે લડીશું અને જવાબ આપીશું.’ જયસ્વાલનું આ રિએક્શન મેદાન પર થયેલી ઘટનાને લઈને એક નવો સવાલ જરૂર ઊભો કરી દીધો છે. તેના નિવેદનથી સંકેત મળે છે કે વિવાદ ફક્ત અસિથા ફર્નાન્ડોની આક્રમક ઉજવણી સુધી સીમિત ન હતો. ભારતીય બેટરના મુજબ શ્રીલંકન પેસર તરફથી કંઈક કહેવામાં પણ આવ્યું હતું, જેના પછી તેણે વળતી પ્રતિક્રિયા આપી. જોકે જયસ્વાલે એ ન કહ્યું કે ફર્નાન્ડોએ તેને વાસ્તવમાં શું કહ્યું હતું. બંને ખેલાડીઓ વચ્ચે થયેલી વાતચીતની પૂરી વિગત પણ ઑફિશિયલી સામે નથી આવી. એવામાં વિવાદની શરૂઆત કયા શબ્દોથી થઈ, તેને લઈને નિશ્ચિત દાવો ન કરી શકાય. કોલંબોમાં માથા અથડાવા પર જયસ્વાલ-ફર્નાન્ડો સામે કાર્યવાહી ભારત અને શ્રીલંકા વચ્ચે કોલંબોમાં રમાઈ રહેલી બીજી ટેસ્ટના પહેલા દિવસે યશસ્વી જયસ્વાલ અને અસિથા ફર્નાન્ડો વચ્ચે બનેલી ઘટના પર ICCએ કાર્યવાહી કરી છે. બંને ખેલાડીઓ પર મેચ ફીનો 25-25% દંડ ફટકાર્યો છે. આ સાથે બંનેના ખાતામાં 1-1 ડિમેરિટ પોઇન્ટ ઉમેર્યો છે. સંપૂર્ણ સમાચાર વાંચો…