ઈરાન સમર્થિત હુતી ઉગ્રવાદીઓએ ગુરુવારે યમન અને સાઉદી અરેબિયામાં એકસાથે મોટા હુમલા કર્યા. યમનમાં સૈન્ય ઠેકાણાઓ પર બેલેસ્ટિક મિસાઈલ અને ડ્રોનથી હુમલો થયો છે. આમાં 58 સૈનિકોનાં મોત થયા અને ડઝનબંધ અન્ય ઘાયલ થયા. યમનના રક્ષા મંત્રાલયે કહ્યું કે આ હુમલાનો જવાબ યોગ્ય સમયે અને યોગ્ય જગ્યાએ આપવામાં આવશે. બીજી તરફ સાઉદીના નજરનમાં થયેલા હુમલામાં 11 નાગરિકો ઘાયલ થયા. આમાં 7 સાઉદી નાગરિકો, એક યમની, બે મિસ્રી, એક પાકિસ્તાની નાગરિક અને 4 વર્ષનો એક બાળક સામેલ છે. હુમલાઓ બાદ નજરનના ઘણા વિસ્તારોમાં આગ લાગી ગઈ, જેને બુઝાવવા માટે ફાયર બ્રિગેડ અને રાહત ટીમો તૈનાત કરવામાં આવી. છેલ્લા 24 કલાકના 5 મોટા અપડેટ્સ… 1. અમેરિકા-ઈરાન વચ્ચે હોર્મુઝ ડીલ જલ્દી શક્ય: APના રિપોર્ટ મુજબ, હોર્મુઝ સ્ટ્રેટને લઈને અમેરિકા અને ઈરાન વચ્ચે સમજૂતી જલ્દી થઈ શકે છે. ઈરાન-ઓમાન વચ્ચેનો મુસદ્દો અંતિમ તબક્કામાં છે. 2. ટ્રમ્પે કહ્યું- ઈરાન પોતે વાતચીત કરવા માગે છે: ટ્રમ્પે દાવો કર્યો કે ઈરાને પોતે વાતચીતની પહેલ કરી છે અને બંને દેશો વચ્ચેની વાટાઘાટોમાં સારી પ્રગતિ થઈ છે. તેમના મતે, કરાર ઈરાન માટે શ્રેષ્ઠ વિકલ્પ હશે. 3. હોર્મુઝ અને બાબ-અલ-મંદેબમાં જહાજોની અવરજવર ઘટી: દરિયાઈ ટ્રેકિંગ ડેટા અનુસાર, હોર્મુઝ સ્ટ્રેટમાંથી બુધવારે માત્ર 2 જહાજ પસાર થયા, જ્યારે તણાવ પહેલા અહીં દરરોજ 130-140 જહાજ પસાર થતા હતા. બાબ-અલ-મંદેબમાં પણ શિપિંગ ટ્રાફિક સતત ઘટી રહ્યો છે. 4. હોર્મુઝમાં ટોલ લાગશે તો દુનિયામાં મોંઘવારી વધશે: દુનિયાના આઠ મોટા શિપિંગ સંગઠનોએ UN અને IMO ને અપીલ કરી છે કે હોર્મુઝ સ્ટ્રેટમાંથી પસાર થતા જહાજો પર કોઈપણ પ્રકારનો ટોલ કે સર્વિસ ચાર્જ ન લગાવવામાં આવે. તેમનું કહેવું છે કે તેનાથી શિપિંગ મોંઘું થશે અને વૈશ્વિક મોંઘવારી વધશે. 5. લેબનોનમાં 2 ઇઝરાયલી સૈનિકોનાં મોત: દક્ષિણ લેબનોનમાં એક ઇમારતમાં થયેલા વિસ્ફોટમાં બે ઇઝરાયલી સૈનિકો માર્યા ગયા અને ચાર ઘાયલ થયા. આ પછી ઇઝરાયલે ઘણા વિસ્તારોમાં હવાઈ હુમલા કર્યા. ઈરાન યુદ્ધ સંબંધિત અપડેટ્સ માટે, નીચેનો બ્લોગ જુઓ…