ભારતમાં કુકિંગ ગેસ (LPG)ની માગમાં એપ્રિલમાં ઘટાડો થયો છે. અમેરિકા-ઇઝરાયલ અને ઇરાન વચ્ચે ચાલી રહેલા સંઘર્ષ અને તણાવને કારણે સપ્લાય ખોરવાઈ છે, જેની સીધી અસર ભારતીય રસોડા અને કોમર્શિયલ સેક્ટર પર પડી છે. સરકારી આંકડાઓ અનુસાર, એપ્રિલમાં LPG નો વપરાશ 16.16% ઘટીને 2.2 મિલિયન ટન રહ્યો છે, જ્યારે ગયા વર્ષે આ જ મહિનામાં તે 2.62 મિલિયન ટન હતો. પેટ્રોલિયમ પ્લાનિંગ એન્ડ એનાલિસિસ સેલ (PPAC) ના ડેટા અનુસાર, માર્ચ મહિના (2.379 મિલિયન ટન)ની સરખામણીમાં પણ એપ્રિલમાં ગેસના વેચાણમાં ઘટાડો થયો છે. સપ્લાય ઓછી થવાને કારણે સરકારે હોટલો અને ઇન્ડસ્ટ્રીઝને આપવામાં આવતી કોમર્શિયલ સપ્લાયમાં કાપ મૂકવો પડ્યો છે જેથી ઘરોમાં રસોઈ ગેસની અછત ન થાય. હોર્મુઝ સ્ટ્રેટ બંધ થવાથી સપ્લાય અટકી ભારત તેની જરૂરિયાતનો લગભગ 60% LPG આયાત કરે છે. તેનો મોટો હિસ્સો હોર્મુઝ સ્ટ્રેટના માર્ગે ભારત આવે છે. ઈરાન અને ઈઝરાયલ વચ્ચે વધતા તણાવ અને અમેરિકી હુમલાઓ બાદ આ દરિયાઈ માર્ગ લગભગ બંધ થઈ ગયો છે. ઘરમાં બે રિફિલ વચ્ચેનો સમય વધારવામાં આવ્યો આ પહેલા સરકારે ઘરેલુ સિલિન્ડરની બુકિંગ માટે 25 દિવસનો લોક-ઇન પિરિયડ કર્યો હતો (એટલે કે એક સિલિન્ડર મળ્યાના 21 દિવસ પછી જ બીજો બુક થશે). જ્યારે ગ્રામીણ વિસ્તારો માટે સિલિન્ડર બુકિંગનો ગેપ વધારીને 45 દિવસ કરવામાં આવ્યો. 1 મેના રોજ કોમર્શિયલ સિલિન્ડર 994 રૂપિયા સુધી મોંઘો થયો આ પહેલા 1 મેના રોજ કોમર્શિયલ સિલિન્ડર 994 રૂપિયા સુધી મોંઘો થઈ ગયો હતો. દિલ્હીમાં તે 3071.50 રૂપિયામાં મળી રહ્યો છે. 5 કિલોવાળા ફ્રી ટ્રેડ એલપીજી (FTL) સિલિન્ડરની કિંમતોમાં 261 રૂપિયાનો વધારો કરવામાં આવ્યો હતો. આ વધારા પછી હવે ‘છોટુ’ સિલિન્ડરની રિફિલ કિંમત 813.50 રૂપિયા થઈ ગઈ છે. હવાઈ ​​ઇંધણ (ATF)ની માગમાં પણ ઘટાડો ખાડી દેશોમાં યુદ્ધ જેવી પરિસ્થિતિને કારણે ઘણા દેશોએ તેમનો એરસ્પેસ (હવાઈ ક્ષેત્ર) બંધ કરી દીધો હતો. આને કારણે ઘણી આંતરરાષ્ટ્રીય ફ્લાઇટ્સ રદ થઈ અથવા તેમના રૂટ બદલવામાં આવ્યા. આની સીધી અસર એર ટર્બાઇન ફ્યુઅલ (ATF) એટલે કે જેટ ફ્યુઅલના વપરાશ પર પડી. એપ્રિલમાં જેટ ફ્યુઅલની માગ 1.37% ઘટીને 761,000 ટન રહી ગઈ, જે માર્ચમાં 807,000 ટન હતી. ડીઝલ-પેટ્રોલની માગ પણ વધી એપ્રિલમાં ડીઝલના વેચાણમાં નજીવો 0.25% નો જ વધારો થયો અને તે 8.282 મિલિયન ટન રહ્યું. માર્ચમાં ડીઝલની માંગ 8.1% ના દરે વધી હતી. જ્યારે, પેટ્રોલના વેચાણમાં એપ્રિલમાં 6.36% નો વધારો જોવા મળ્યો, જે માર્ચના 7.6% ના વધારા કરતાં ઓછો છે.