દક્ષિણ કોરિયાની રાજધાની સિઓલનો હોંગડે વિસ્તાર કેફેના ગાઢ જંગલો માટે પ્રખ્યાત છે. પરંતુ આ દિવસોમાં અહીંની હવામાં માત્ર કોફીની સુગંધ જ નહીં, પરંતુ અબજો ડોલરની કે-પોપ ઇન્ડસ્ટ્રીની આર્થિક તાકાત પણ જોવા મળે છે. અહીં કેફેની બહાર કોઈને કોઈ સુંદર સ્ટારના મોટા-મોટા બેનરો અને પોસ્ટરો જોવા મળશે. મોબાઈલ પકડેલા યુવાનોની ભારે ભીડ આ દુકાનોના ચક્કર લગાવી રહી છે. આ દક્ષિણ કોરિયાનો ઝડપથી વિકસતો ‘બર્થડે કેફે’ કલ્ચર છે, જે હવે એક અત્યંત સફળ અને સંગઠિત બિઝનેસ મોડેલનું રૂપ લઈ ચૂક્યો છે. બર્થડે કેફેનું આખું માળખું ‘ફેન-ક્રિએટેડ અને ફેન-ફંડેડ’ ઇકોનોમી પર છે. સ્ટાર્સના જન્મદિવસના મહિનાઓ પહેલાં, ફેન ક્લબ પોતે જ પૈસા ભેગા કરે છે અને ઇવેન્ટ પ્લાનરની ભૂમિકામાં આવી જાય છે. તેઓ કેફે માલિકોનો સંપર્ક કરીને કેટલાક દિવસો માટે આખું કેફે ભાડે લે છે અથવા તેમની સાથે ભાગીદારી કરે છે. આ પછી કેફેને સંપૂર્ણપણે તે સ્ટારના ફોટા, ફુગ્ગા અને થીમ આધારિત મર્ચન્ડાઇઝથી સજાવવામાં આવે છે. સીએનએનના રિપોર્ટ મુજબ કેફે માલિકો માટે આ ‘ઝીરો-ઇન્વેસ્ટમેન્ટ અને હાઈ-પ્રોફિટ’ એટલે કે શૂન્ય રોકાણ અને જબરદસ્ત નફાનો સોદો છે. સજાવટ અને મર્ચન્ડાઇઝનો પૂરો ખર્ચ ચાહકો ઉઠાવે છે, જ્યારે કેફે માલિકો માત્ર કોફી અને ડેઝર્ટ વેચે છે. સામાન્ય દિવસોની સરખામણીમાં આ ઇવેન્ટ્સ દરમિયાન કેફેનું વેચાણ અનેક ગણું વધી જાય છે. ‘કેફે ઇયુ’ના માલિક યુ જી-હ્યે જણાવે છે કે પીક સિઝનમાં અહીં પગ મૂકવાની જગ્યા નથી હોતી. ગ્રાહકોને આકર્ષવા માટે એક અનોખું માર્કેટિંગ ટૂલ ‘કપ સ્લીવ્સ’ અને “ફોટો કાર્ડ્સ’ અપનાવવામાં આવે છે. જ્યારે કોઈ ચાહક ડ્રિંક ખરીદે છે, તો તેને સ્ટારની તસવીરવાળો કસ્ટમાઇઝ્ડ કપ હોલ્ડર અને સ્ટીકર્સ મફત મળે છે. આ બિઝનેસ મોડેલની સફળતાને જોતાં હવે તેનો વ્યાપ કે-પોપથી બહાર નીકળીને કોરિયન એક્ટર્સ, ફૂટબોલ-બેઝબોલ ખેલાડીઓ સુધી ફેલાઈ ગયો છે. અહીં સુધી કે ધાર્મિક સંસ્થાઓ પણ તેને અપનાવી રહી છે. સોલના યોનહ્વાસા મંદિર પાસે બુદ્ધ પૂર્ણિમા પર ‘હેપ્પી બુદ્ધા ડે’ થીમવાળો બર્થડે કેફે ખોલવામાં આવ્યો, જ્યાં યુવાનોને બુદ્ધના ફોટો કાર્ડ્સ આપવામાં આવ્યા. ગ્લોબલ ફેન્સ આવીને 8 થી 10 અલગ-અલગ કાફેમાં જઈ રહ્યા છે, હોટેલ-પરિવહનને પણ બુસ્ટ મળે છે આ ટ્રેન્ડ દક્ષિણ કોરિયાના પર્યટનનો ગ્રોથ એન્જિન બની ગયો છે. અમેરિકા, યુરોપ અને એશિયાના દેશોમાંથી લાખો કે-પોપ ચાહકો મનપસંદ આઇડલનો ‘બર્થડે વાઇબ’ અનુભવવા આવે છે. આ વિદેશી પર્યટકો સોલ આવીને નિયમિતપણે કાફે ટૂર પ્લાન કરે છે, જેમાં તેઓ એક દિવસમાં 8 થી 10 અલગ-અલગ કાફેની મુલાકાત લે છે. તેનાથી કાફે ઉદ્યોગ, સ્થાનિક હોટલો, પરિવહન અને રિટેલ માર્કેટને પણ બુસ્ટ મળી રહ્યું છે. આ નેટવર્કને સંભાળવા માટે હવે નિયમિતપણે ડિજિટલ પ્લેટફોર્મ અને એપ્સ બની ચૂક્યા છે, જ્યાં ચાહકો ઇવેન્ટની લિસ્ટિંગ, મર્ચન્ડાઇઝની વિગતો અને મેપ જોઈ શકે છે.