હોલિવૂડના જાણીતા ડિરેક્ટર ક્રિસ્ટોફર નોલનની ફિલ્મ ‘ધ ઓડિસી’નું નવું ટ્રેલર રિલીઝ કરવામાં આવ્યું છે. મેકર્સે 5 મેના રોજ ટ્રેલર સાથે ફિલ્મની રિલીઝ ડેટની પણ જાહેરાત કરી. આ ફિલ્મ ગ્રીક પૌરાણિક કથાના નાયક ઓડીસિયસની રોમાંચક વાર્તા પર આધારિત છે. આ પાત્રમાં મેટ ડેમન જોવા મળશે, જ્યારે ટોમ હોલેન્ડ તેમના પુત્ર ટેલિમાકસની ભૂમિકા ભજવી રહ્યા છે. ટ્રેલરમાં ભવ્ય વિઝ્યુઅલ્સ અને નોલનની સિગ્નેચર સ્ટાઈલ સ્પષ્ટ દેખાઈ રહી છે, જેનાથી ફિલ્મને લઈને દર્શકોમાં ઉત્સાહ વધુ વધ્યો છે. ‘ધ ઓડિસી’ તકનીકી રીતે પણ ખાસ માનવામાં આવી રહી છે. આ સંપૂર્ણપણે IMAX કેમેરાથી શૂટ કરવામાં આવનારી પ્રથમ કથાત્મક ફિલ્મ હશે, જેનાથી મોટા પડદા પર તેનો અનુભવ વધુ શાનદાર બનવાની અપેક્ષા છે. ખાસ વાત એ છે કે મેકર્સે ફિલ્મના પ્રમોશન માટે જુલાઈ 2025માં જ 70mm સ્ક્રીનિંગની ટિકિટો બહાર પાડી દીધી હતી, જે તેની લોકપ્રિયતા દર્શાવે છે. ફિલ્મની વાર્તા ટ્રોજન યુદ્ધ પછી ઓડીસિયસની પોતાના ઘરે ઇથાકા પાછા ફરવાની સાહસિક યાત્રાની આસપાસ ફરે છે. આ ફિલ્મ 17 જુલાઈના રોજ રિલીઝ થશે.