બોલિવૂડ એક્ટર કુણાલ સિંહ માત્ર 31 વર્ષના હતા, જ્યારે મુંબઈના એક એપાર્ટમેન્ટમાં તેમનો મૃતદેહ મળ્યો. શરૂઆતમાં તેમના મૃત્યુને આત્મહત્યા માનવામાં આવ્યું હતું, જોકે પોસ્ટમોર્ટમ રિપોર્ટે આખા કેસને પલટી નાખ્યો. ફોરેન્સિક નિષ્ણાતોએ તેને આત્મહત્યા નહીં પણ હત્યા માની હતી. તેમનું મૃત્યુ હત્યા હતી કે આત્મહત્યા, તે જાણવા માટે દિવ્ય ભાસ્કરે કેસનો રિપોર્ટ તૈયાર કરનાર AIIMSના પૂર્વ ફોરેન્સિક નિષ્ણાત તીરથ દાસ ડોગરાનો સંપર્ક કર્યો. આજે વણકહી વાર્તાના 4 ચેપ્ટરમાં જાણો એક્ટર કુણાલ સિંહની હત્યાની કહાણી- 29 સપ્ટેમ્બર 1977ના રોજ કુણાલ સિંહનો જન્મ હરિયાણામાં થયો હતો. મોડેલિંગમાં ઓળખ બનાવ્યા પછી, કુણાલે તમિલ ફિલ્મ કધાલાર ધીનમ (1999) થી એક્ટિંગ ડેબ્યુ કર્યું હતું. ફિલ્મમાં તેમની સાથે સોનાલી બેન્દ્રે લીડ રોલમાં હતી. સાઉથમાં આ ફિલ્મ હિટ રહી, જેના પછી તેની હિન્દી રીમેક ફિલ્મ ‘દિલ હી દિલ મેં’ (2000) બનાવવામાં આવી, જેમાં કુણાલ અને સોનાલી લીડ રોલમાં રહ્યા. આ ફિલ્મ પણ હિટ રહી, જેનું ગીત ‘એ નાઝનીન સુનો ન’ ખૂબ પસંદ કરવામાં આવ્યું હતું. આ બે ફિલ્મોને કારણે કુણાલ સિંહને એક પછી એક ઘણી મોટી સાઉથ ફિલ્મો મળવા લાગી. તે અનિતા હસનંદાની સાથે 2002ની ફિલ્મ ‘વરુશમેલ્લમ વસંતમ’ અને ધનુષ અભિનીત ફિલ્મ ‘દેવથૈયાઈ કંદેન’ જેવી ઘણી લોકપ્રિય સાઉથ ફિલ્મોનો ભાગ રહ્યા. સાઉથ ફિલ્મોમાં વધતી લોકપ્રિયતા વચ્ચે તેમણે અનુરાધા સિંહ સાથે લગ્ન કર્યા, જેનાથી તેમને બે બાળકો થયા. વર્ષ 2007 સુધીમાં કુણાલને ફિલ્મોમાં કામ મળવાનું લગભગ બંધ થઈ ગયું. જે એક-બે ફિલ્મો તેણે કરી હતી, તેમાં પણ તેનો સાઈડ રોલ જ હતો. આ જ કારણ હતું કે કુણાલે પોતાની પ્રોડક્શન કંપની બાલાગિરી શરૂ કરી. તેણે પોતાના પ્રોડક્શનની પહેલી ફિલ્મ યોગીની તૈયારીઓ શરૂ કરી હતી, જેમાં તેની સાથે એક્ટ્રેસ લવીના ભાટિયા લીડ રોલમાં હતી. 2007માં ફિલ્મનું શૂટિંગ શરૂ થયું જ હતું કે કુણાલ સિંહ અને લવીના ભાટિયાની નિકટતા વધવા લાગી અને બંનેના અફેરના સમાચાર ચર્ચામાં આવી ગયા. આ સમાચાર જલદી જ કુણાલ સિંહના પરિવાર સુધી પણ પહોંચી ગયા. કુણાલની પત્ની અનુરાધા આનાથી ખૂબ નારાજ થઈ. બંનેના રોજબરોજના ઝઘડા વધવા લાગ્યા અને એક દિવસ અનુરાધા બંને દીકરીઓ સાથે કુણાલને છોડીને પિયર જતી રહી. થોડા સમય પછી લવીના ભાટિયા કુણાલ સાથે તેમના મુંબઈ સ્થિત એપાર્ટમેન્ટમાં આવીને રહેવા લાગી. 7 ફેબ્રુઆરી, 2008 કુણાલ સિંહ અને લવીના ભાટિયા એપાર્ટમેન્ટમાં એકલા હતા. મોડી રાત્રે લવીનાએ મુંબઈ પોલીસને ફોન કરીને કુણાલની આત્મહત્યાની જાણકારી આપી. પોલીસ પહોંચી તો જોયું કે કુણાલનો મૃતદેહ પંખા પર લટકાવેલા ફંદાથી લટકી રહ્યો હતો. લવીના પાસે બેસીને રડી રહી હતી. પોલીસે મૃતદેહ કબજે કરીને પોસ્ટમોર્ટમ માટે મોકલ્યો. શરૂઆતમાં તેને આત્મહત્યા માનવામાં આવી. પહેલા પોસ્ટમોર્ટમ રિપોર્ટમાં પણ ફંદાથી ગળું દબાઈ જવાથી મૃત્યુ થવાની શક્યતાઓ સામે આવી. થોડા દિવસો વીત્યા જ હતા કે કુણાલના પિતા કર્નલ રાજેન્દ્ર સિંહે હત્યાની શંકા વ્યક્ત કરતા પોલીસમાં ફરિયાદ નોંધાવી. ફરિયાદમાં તેમણે 4 મહત્વના સવાલો ઉભા કર્યા. પહેલો સવાલ- જો કુણાલે આત્મહત્યા કરી, તો તેમના શરીર પર ઉઝરડાના નિશાન કેવી રીતે આવ્યા. બીજો સવાલ- લવીનાએ કહ્યું હતું કે કુણાલ તેમને રાત્રે ઘરે મુકવા જવાનો હતો, તો જો કુણાલને આત્મહત્યા કરવી જ હતી, તો તે લવીનાને છોડ્યા પછી પણ કરી શકતો હતો. ત્રીજો સવાલ- લવીનાએ કહ્યું કે તે બાથરૂમમાં હતી, જો કુણાલ આત્મહત્યા કરવાનો હતો, તો તેમને આ વાતનો અંદાજ કેવી રીતે આવ્યો કે તે કેટલી વારમાં બાથરૂમમાંથી બહાર આવવાની છે. ચોથો સવાલ- કુણાલે મૃત્યુના થોડા કલાકો પહેલા જ સંગીતકાર ડબ્બુ મલિકને કામના સંબંધમાં મેસેજ કર્યો હતો. તેમણે ટૂંક સમયમાં ડબ્બુને પોતાના ઘરે આમંત્રિત કર્યા હતા. જો કુણાલને આત્મહત્યા કરવાની હતી, તો તે જ દિવસે આગળનું આયોજન શા માટે કરી રહ્યા હતા. તપાસમાં સામે આવ્યું કે જે દિવસે કુણાલનો મૃતદેહ મળ્યો, તે જ દિવસે તેમણે આગામી ફિલ્મ ‘યોગી’ની ટીમ સાથે મુલાકાત કરી હતી અને આગળનું આયોજન બનાવ્યું હતું. પિતાની ફરિયાદ બાદ મુંબઈ પોલીસે કુણાલ સિંહની ગર્લફ્રેન્ડ લવીના ભાટિયાની ધરપકડ કરી હતી. લવીના ભાટિયાએ પોલીસને આપેલા નિવેદનમાં જણાવ્યું હતું કે તે સવારે નહાવા ગઈ હતી. લગભગ 10 મિનિટ પછી તે બહાર આવી ત્યારે તેણે જોયું કે કુણાલ ફાંસી પર લટકેલો હતો. પોલીસ પાસે લવીના વિરુદ્ધ કોઈ પુરાવો ન હોવાથી તેને છોડી દેવામાં આવી હતી. પહેલા પણ કાંડા કાપીને જીવ આપવાનો પ્રયાસ કર્યો હતો પોલીસ તપાસ દરમિયાન એ પણ સામે આવ્યું કે કુણાલ સિંહને ફિલ્મોમાં યોગ્ય કામ ન મળવા અને અંગત જીવનની ઉથલપાથલથી ખૂબ જ પરેશાન હતા. પરિવાર અને મિત્રોએ પોલીસને આપેલા નિવેદનમાં જણાવ્યું હતું કે ફેબ્રુઆરી 2008માં આત્મહત્યા કરતા થોડા દિવસો પહેલા પણ તેણે કાંડાની નસ કાપીને આત્મહત્યા કરવાનો પ્રયાસ કર્યો હતો, જોકે ત્યારે તેને બચાવી લેવામાં આવ્યો હતો. જ્યારે પોલીસ કોઈ નિષ્કર્ષ પર પહોંચી શકી નહીં, ત્યારે આ કેસ CBIને સોંપવામાં આવ્યો. જે બાદ તેમના મૃત્યુના કારણની ઊંડાણપૂર્વક તપાસ કરવામાં આવી. કુણાલનો ફોરેન્સિક રિપોર્ટ તે સમયે AIIMSના ફોરેન્સિક નિષ્ણાત ડોક્ટર ટી.ડી.ડોગરાએ તૈયાર કર્યો હતો. કુણાલ સિંહના મૃત્યુનું સાચું કારણ જાણવા માટે દિવ્ય ભાસ્કરે ડોક્ટર ટી.ડી.ડોગરાનો સંપર્ક કર્યો. તેમણે અમારી સાથેની વાતચીતમાં પ્રારંભિક તપાસ પર કહ્યું, કુણાલના નિધન પછી 20 ઓગસ્ટ 2008ના રોજ બોમ્બેમાં તેમનું પોસ્ટમોર્ટમ કરવામાં આવ્યું. પોસ્ટમોર્ટમ રિપોર્ટમાં ડોકટરોએ મૃત્યુનું કારણ ગરદન પર લિગેચર દ્વારા દબાણ જણાવ્યું, જે તેમના સંભવિત મૃત્યુનું કારણ હતું. મૃતકના શરીર પર ફાંસીના સામાન્ય લક્ષણો હાજર હતા. જેમ કે ગરદન પર ત્રાંસો લિગેચર માર્ક, મોઢાના જમણા ખૂણેથી લાળ વહેવી, જે ફાંસીનો એક મહત્વપૂર્ણ સંકેત હોય છે. તેમની જીભ દાંતો વચ્ચે ફસાયેલી હતી અને હાથ-પગના નખ વાદળી પડી ગયા હતા. આંખોમાં પેટીકીયલ હેમરેજ જોવા મળ્યું, જે આ પ્રકારના મૃત્યુમાં અવારનવાર જોવા મળે છે. નિષ્કર્ષમાં ડોકટરોએ કહ્યું કે મૃત્યુ ગૂંગળામણથી શક્ય છે અને તમામ તારણો તેની સાથે સુસંગત છે. પ્રારંભિક પોસ્ટમોર્ટમ રિપોર્ટમાં તેને આત્મહત્યા માનવામાં આવી હતી, પરંતુ જ્યારે કુણાલ સિંહના પિતાની ફરિયાદ પર કેસ સીબીઆઈને સોંપવામાં આવ્યો, ત્યારે 27 જુલાઈ 2008ના રોજ ફરીથી તેમનું પોસ્ટમોર્ટમ કરવામાં આવ્યું. આ અંગે ટી.ડી. ડોગરા કહે છે, ‘નખની તપાસ કરવામાં આવી હતી, જેમાં કોઈ પ્રકારનું લોહી કે અન્ય કોઈ વ્યક્તિના કોષો મળ્યા ન હતા. સામાન્ય રીતે હત્યાના કેસમાં પીડિત દ્વારા સંઘર્ષ કરવામાં આવે ત્યારે તેમના નખમાં આરોપીની ચામડી ફસાયેલી હોય છે. જોકે, રિપોર્ટમાં આવું કંઈ સામે આવ્યું નથી.’ ’27 ફેબ્રુઆરી 2009ના રોજ કૂપર હોસ્પિટલના ડોકટરોનો અભિપ્રાય લેવામાં આવ્યો. તેમાં કહેવામાં આવ્યું કે જે લિગેચર માર્ક દેખાઈ રહ્યો છે, તે કોઈ નરમ સામગ્રીથી બની શકે છે. જો ગરદન જમણી બાજુ નમેલી હોય તો નિશાન જમણી બાજુ હોવું શક્ય છે. હાથ પર જે વાદળી નિશાન હતું, તે કોઈ કઠોર વસ્તુથી બની શકે છે. આ રિપોર્ટમાં આત્મહત્યાની શક્યતાને નકારી કાઢવામાં આવી ન હતી. વિસેરામાં દારૂ કે અન્ય કોઈ ઝેરના પુરાવા મળ્યા નથી.’ ’20 જાન્યુઆરી 2009 ના રોજ ગ્રાન્ટ મેડિકલ કોલેજ બોર્ડનો અભિપ્રાય સામે આવ્યો. પહેલા કૂપર હોસ્પિટલનું બોર્ડ બન્યું, ત્યારબાદ ગ્રાન્ટ મેડિકલ કોલેજનું. તેમણે કહ્યું કે મૃત્યુ ભોજન કર્યાના 4 થી 6 કલાક પછી સંભવ છે અને પોસ્ટમોર્ટમથી 12 થી 24 કલાક પહેલા મૃત્યુ થયું હતું. મૃત્યુનું કારણ પાર્શિયલ હેંગિંગ (ગળું દબાવવું) જણાવવામાં આવ્યું. મૃત્યુના સમયને લઈને કોઈ વિરોધાભાસ જોવા મળ્યો ન હતો.’ ’12 ઓગસ્ટ 2009 ના રોજ કૂપર હોસ્પિટલનો ફરી એકવાર અભિપ્રાય લેવામાં આવ્યો, જેમાં મૃત્યુને હોમિસાઇડલ (હત્યા) પ્રકૃતિનું જણાવવામાં આવ્યું. જ્યારે પહેલા તેને સુસાઇડલ જણાવવામાં આવ્યું હતું. આ જ વિરોધાભાસ આગળ જતાં AIIMS ના રિપોર્ટ સાથે ટકરાયો. આ જ અલગ-અલગ રિપોર્ટ્સને કારણે CBI આ મામલો લઈને AIIMS પહોંચી.’ ડૉક્ટર ટી.ડી. ડોગરાએ આગળ કહ્યું, ‘16 સપ્ટેમ્બર 2009 ના રોજ કૂપર હોસ્પિટલમાંથી ત્રીજો અભિપ્રાય લેવામાં આવ્યો, જેમાં લિગેચર માર્કને હોમિસાઇડલ ડેથ એટલે કે હત્યાની તરફેણમાં દર્શાવવામાં આવ્યો. મુઠ્ઠી બંધ હોવાને કોઈ બ્લન્ટ ઑબ્જેક્ટ સાથે જોડવાનો પ્રયાસ કરવામાં આવ્યો. આ અભિપ્રાય પણ AIIMS ના રિપોર્ટ સાથે સુસંગત નહોતો.’ ‘7 ડિસેમ્બર 2009 ના રોજ ફોરેન્સિક સાયન્સ લેબોરેટરીને કપડાં અને અન્ડરવેર તપાસ માટે મોકલવામાં આવ્યા. અન્ડરવેર પર લોહી નહોતું. શર્ટ, જીન્સ અને બેડશીટ પર ન તો લાળ, ન વીર્ય અને ન જ સંઘર્ષના કોઈ નિશાન મળ્યા. જાતીય હુમલા કે સંઘર્ષનો કોઈ પુરાવો મળ્યો નથી.’ કુણાલ સિંહના મૃત્યુને 2 વર્ષ વીતી ગયા હતા, પરંતુ સીબીઆઈ પાસે હજુ પણ કુણાલ સિંહના મૃત્યુની ચોક્કસ માહિતી નહોતી. આખરે, 22 જાન્યુઆરી 2010 ના રોજ સીબીઆઈએ તમામ દસ્તાવેજો, રિપોર્ટ્સ અને પેપર્સ એઈમ્સને સોંપ્યા અને સીન રી-કન્સ્ટ્રક્શનની વિનંતી કરી. 12 ફેબ્રુઆરી 2010 ના રોજ સીબીઆઈએ એઈમ્સને એક રિપોર્ટ મોકલીને 24 પ્રશ્નોના જવાબ માંગ્યા. ડી.ટી. ડોગરા કહે છે, ’13 ફેબ્રુઆરી 2010 ના રોજ એઈમ્સ અને સીએફએસએલની સંયુક્ત ટીમ મારા ચેરમેનશીપ હેઠળ ગઠિત કરવામાં આવી હતી. ટીમનો મુખ્ય નિષ્કર્ષ એ હતો કે ખુરશી પર ઊભા રહીને ફાંસી લગાવવી સરળ અને સંપૂર્ણપણે શક્ય હતી. સૂટકેસ કે સોફા પર ઊભા રહીને પણ ફાંસી લગાવી શકાતી હતી, જોકે તે થોડું મુશ્કેલ હોત. બેડશીટ લાંબી, મજબૂત અને મૃતક જેવા વ્યક્તિનું વજન સહન કરવામાં સક્ષમ હતી. ગાંઠ સ્થિર અને કડક હતી. કોઈપણ કપડા પર ખેંચાણ, ફાટવાના કે સંઘર્ષના નિશાન નહોતા. સોફાનો એક પગ અને સૂટકેસને સ્પર્શ કરવો એ જીવિત રહેવાની સ્વાભાવિક પ્રતિક્રિયા પણ હોઈ શકે છે. આખું દ્રશ્ય ફાંસીની પ્રક્રિયા સાથે સુસંગત હતું.’ 2 વર્ષ પછી સીબીઆઈની તપાસ પછી કુણાલનું મૃત્યુ આત્મહત્યા જાહેર કરવામાં આવી 2 વર્ષની લાંબી તપાસ પછી આખરે બોમ્બે હાઈકોર્ટે કુણાલ સિંહ મૃત્યુ કેસમાં ચુકાદો આપતા તેને આત્મહત્યા જાહેર કરી. જોકે, કેસની તપાસમાં બેદરકારી દાખવવા બદલ બોમ્બે હાઈકોર્ટે 2 પોલીસ અધિકારીઓના સસ્પેન્શનનો આદેશ આપ્યો. આરુષિ તલવાર, ઇન્દિરા ગાંધીના ફોરેન્સિક રિપોર્ટ તૈયાર કરી ચૂક્યા છે ટી.ડી.ડોગરા ટી.ડી.ડોગરા એઈમ્સના પૂર્વ ફોરેન્સિક નિષ્ણાત રહી ચૂક્યા છે. તેમણે પોતાની મેડિકલ કારકિર્દીમાં ઇન્દિરા ગાંધીની હત્યા, આરુષિ તલવાર મર્ડર કેસ, નિઠારી કેસ, બાટલા હાઉસ એન્કાઉન્ટર કેસ, માધવરાવ સિંધિયા અકસ્માત કેસના રિપોર્ટ પણ તૈયાર કર્યા હતા.