પ્રીમિયર લીગે ચેલ્સી ફૂટબોલ ક્લબ પર નાણાકીય નિયમોના ઉલ્લંઘનના કેસમાં 92 (10 મિલિયન પાઉન્ડ) કરોડનો દંડ ફટકાર્યો છે. ક્લબ પર એક વર્ષનો ટ્રાન્સફર પ્રતિબંધ લાદવામાં આવ્યો છે, પરંતુ તેને બે વર્ષ માટે મુલતવી રાખવામાં આવ્યો છે. આ કાર્યવાહી 2011 થી 2018 દરમિયાન કરવામાં આવેલી ગુપ્ત ચૂકવણીઓને લઈને કરવામાં આવી છે. ક્લબે ઈડન હેઝાર્ડ, વિલિયન અને ડેવિડ લુઈઝ જેવા મોટા ખેલાડીઓને સાઈન કરવા માટે અનરજિસ્ટર્ડ એજન્ટોને કરોડો રૂપિયા આપ્યા હતા. નવા માલિકોએ પોતે જ માહિતી આપી હતી, 2022માં તપાસ શરૂ થઈ હતી આ આખી ગડબડ તે સમયની છે જ્યારે ક્લબના માલિક રશિયન અબજોપતિ રોમન અબ્રામોવિચ હતા. વર્ષ 2022માં જ્યારે ‘બ્લુકો’ ગ્રુપે ક્લબ ખરીદ્યું, ત્યારે તેમને એકાઉન્ટ્સની તપાસ દરમિયાન આ ગુપ્ત ચૂકવણીઓ વિશે જાણ થઈ. નવા મેનેજમેન્ટે પોતે આગળ વધીને પ્રીમિયર લીગને આ ઉલ્લંઘનોની જાણકારી આપી. તપાસમાં સામે આવ્યું કે ક્લબ સાથે સંકળાયેલા ત્રીજા પક્ષ દ્વારા ખેલાડીઓ, અનરજિસ્ટર્ડ એજન્ટો અને અન્ય લોકોને ગુપ્ત ચૂકવણીઓ કરવામાં આવી હતી. આ ચૂકવણીઓની જાણકારી તે સમયે ફૂટબોલ ઓથોરિટીને આપવામાં આવી ન હતી, જે નિયમો વિરુદ્ધ છે. પ્રીમિયર લીગ અનુસાર, આ ચૂકવણીઓ ચેલ્સીના હિતમાં કરવામાં આવી હતી અને તેને ક્લબના ખર્ચ તરીકે દર્શાવવી જોઈતી હતી. ક્લબે એ પણ સ્વીકાર્યું કે આ ચૂકવણીઓને છુપાવવી અને સાચી જાણકારી ન આપવી એ નિયમોનું ઉલ્લંઘન છે. જોકે, તપાસ પછી એ સ્પષ્ટ થયું કે જો આ ચૂકવણીઓને યોગ્ય રીતે શામેલ કરવામાં આવી હોત, તો પણ ચેલ્સી નિયમોનું ઉલ્લંઘન ન કરત. જો ક્લબે પોતે આની જાણકારી ન આપી હોત, તો તેમના પર વધુ કડક કાર્યવાહી થઈ શકતી હતી અને તેમના પોઈન્ટ્સ પણ કાપી શકાયા હોત. 7 એજન્ટોને 250 કરોડ રૂપિયા આપ્યા, હેઝાર્ડ અને વિલિયન પણ સામેલ તપાસમાં સામે આવ્યું છે કે ક્લબે સાત અનરજિસ્ટર્ડ એજન્ટો અથવા તેમની સાથે સંકળાયેલી સંસ્થાઓને કુલ 23 મિલિયન પાઉન્ડ (લગભગ 250 કરોડ રૂપિયા) આપ્યા હતા. આ પૈસા ઈડન હેઝાર્ડ, રામિરેસ, ડેવિડ લુઈઝ, આન્દ્રે શુર્લે અને નેમાનજા મેટિક જેવા ખેલાડીઓને સાઈન કરવા માટે આપવામાં આવ્યા હતા. આ ઉપરાંત સેમ્યુઅલ ઈટો અને વિલિયનની ટ્રાન્સફર ફી તરીકે લગભગ 210 કરોડ રૂપિયાની ચુકવણી પણ રેકોર્ડમાં દર્શાવવામાં આવી ન હતી. સ્ટાફને પગાર પણ ‘અંડર ધ ટેબલ’ આપવામાં આવ્યો
માત્ર ખેલાડીઓના ટ્રાન્સફર જ નહીં, પરંતુ ક્લબના સ્ટાફને કરવામાં આવેલી ચુકવણીમાં પણ ગડબડ જોવા મળી. ક્લબના તત્કાલીન ડાયરેક્ટર ઓફ ફૂટબોલ ફ્રેન્ક અર્નેસન, સ્કાઉટ પીટ ડી વિસર અને અન્ય એક સ્ટાફ મેમ્બરને લગભગ 15 કરોડ રૂપિયા આપવામાં આવ્યા હતા, જેને તેમનો પગાર માનવામાં આવ્યો હતો પરંતુ તેને સત્તાવાર રીતે રિપોર્ટ કરવામાં આવ્યો ન હતો. જે ખેલાડીઓ પર વિવાદ હતો, તેમણે ચેલ્સીને ઘણા ખિતાબ અપાવ્યા જે ખેલાડીઓના ટ્રાન્સફર પર વિવાદ છે, તેઓ ચેલ્સીના સૌથી સફળ ખેલાડીઓમાં ગણાય છે. આ જ સમયે જોસ મોરિન્હો ક્લબમાં પાછા ફર્યા હતા. તે સમયગાળામાં ટીમે 2 પ્રીમિયર લીગ, 2 FA કપ અને યુરોપા લીગ સહિત કુલ 6 મોટી ટ્રોફી જીતી હતી. એડન હેઝાર્ડે ચેલ્સી માટે 352 મેચમાં 110 ગોલ કર્યા. જ્યારે વિલિયન અને ડેવિડ લુઈઝે પણ લાંબા સમય સુધી ટીમની સફળતામાં મહત્વની ભૂમિકા ભજવી હતી. એકેડમી ખેલાડીઓના રજીસ્ટ્રેશનમાં પણ ગડબડ: 9 મહિનાનો પ્રતિબંધ
અન્ય એક કિસ્સામાં, ચેલ્સીએ 2025માં પોતે જ લીગને વધુ એક રિપોર્ટ સુપરત કર્યો હતો. જેમાં 2019 થી 2022 દરમિયાન એકેડમીના ખેલાડીઓ (યુવા ખેલાડીઓ)ના રજીસ્ટ્રેશનમાં નિયમોના ઉલ્લંઘનની વાત કહેવામાં આવી હતી. તપાસ બાદ લીગે ચેલ્સીની એકેડમી પર 9 મહિનાનો પ્રતિબંધ લગાવી દીધો છે. આ સમયગાળા દરમિયાન ક્લબ પ્રીમિયર લીગ અને EFLના કોઈપણ નવા યુવા ખેલાડીને સાઈન કરી શકશે નહીં. આ ઉપરાંત, આ મામલે 7.50 લાખ પાઉન્ડ (લગભગ 8 કરોડ રૂપિયા)નો અલગથી દંડ પણ ફટકારવામાં આવ્યો છે. UEFA પહેલેથી જ દંડ ફટકારી ચૂક્યું છે
ચેલ્સીની મુશ્કેલીઓ અહીં જ પૂરી થઈ નથી. આ જ મામલે ક્લબે 2022માં UEFAને પણ રિપોર્ટ કર્યો હતો, જેના પછી તેમના પર 10 મિલિયન યુરોનો દંડ ફટકારવામાં આવ્યો હતો. આ ઉપરાંત, ઇંગ્લેન્ડનું ફૂટબોલ એસોસિયેશન (FA) પણ આવા જ આરોપોની અલગથી તપાસ કરી રહ્યું છે. આવનારા સમયમાં FA દ્વારા પણ ક્લબ પર શિસ્તભંગના પગલાં લેવામાં આવી શકે છે.