પૂર્વ શતરંજ સ્ટાર જુડિત પોલગર હંગેરીના રાષ્ટ્રપતિ બની શકે છે. તેમને હંગેરીના વડાપ્રધાન પીટર મગ્યારે રાષ્ટ્રપતિ પદ માટે આમંત્રણ મોકલ્યું છે. પીએમ પીટરે ફેસબુક પોસ્ટ પર લખ્યું કે તેઓ જુડિતને રાષ્ટ્રપતિ પદ સોંપવાનો પ્રસ્તાવ મૂકશે. 49 વર્ષીય જુડિત દુનિયાની સર્વશ્રેષ્ઠ મહિલા ચેસ ખેલાડીઓમાં સામેલ રહી છે. તેમણે માત્ર 15 વર્ષ અને 4 મહિનાની ઉંમરે ગ્રાન્ડમાસ્ટર બનીને સૌથી યુવા ખેલાડીનો રેકોર્ડ બનાવ્યો હતો. આ વર્ષે તેમના જીવન પર બનેલી ડોક્યુમેન્ટરી ‘ધ ક્વીન ઓફ ચેસ’ પણ રિલીઝ થઈ. જાણો જુડિત પોલગરની સફર… મહિલા વર્ગને બદલે ઓપન ટુર્નામેન્ટ્સ રમ્યા જુડિત માત્ર 6 વર્ષની ઉંમરથી જ ચેસ ટુર્નામેન્ટ રમવા લાગ્યા હતા. તેમણે કારકિર્દીમાં મહિલા વર્ગમાં રમવાને બદલે ઓપન ટુર્નામેન્ટ રમી. તેમણે પુરુષ ખેલાડીઓ સામે પણ મેચ રમી. 2005માં તેઓ વિશ્વ રેન્કિંગમાં આઠમા સ્થાને પહોંચ્યા, જે કોઈ મહિલા ખેલાડીની સર્વશ્રેષ્ઠ રેન્કિંગ છે. તેઓ એકમાત્ર ચેસ મહિલા ખેલાડી છે, જેમણે 2700+ એલો રેટિંગનો આંકડો પાર કર્યો. બોબી ફિશરનો રેકોર્ડ તોડ્યો, 11 વર્લ્ડ ચેમ્પિયન્સને હરાવ્યા પોલગરે 15 વર્ષ 4 મહિનાની ઉંમરે ગ્રાન્ડમાસ્ટર બનીને બોબી ફિશરનો સૌથી ઓછી ઉંમરે ગ્રાન્ડમાસ્ટર બનવાનો રેકોર્ડ તોડી નાખ્યો હતો. તેમણે ગેરી કાસ્પારોવ, વિશ્વનાથન આનંદ, અનાતોલી કાર્પોવ, બોરિસ સ્પાસ્કી અને મેગ્નસ કાર્લસન સહિત 11 વર્લ્ડ ચેમ્પિયનોને ક્લાસિકલ કે રેપિડ મુકાબલાઓમાં હરાવ્યા. 26 વર્ષ સુધી નંબર-1 મહિલા ખેલાડી રહ્યાં પોલ્ગર સતત 26 વર્ષ 28 દિવસ સુધી વુમન્સ વર્લ્ડ રેન્કિંગમાં નંબર-1 રહ્યાં હતાં. તેઓએ 1 ફેબ્રુઆરી 1989 થી 1 માર્ચ 2015 સુધી રેન્કિંગમાં સતત પ્રથમ સ્થાન જાળવી રાખ્યું હતું. તેમણે પાંચ વખત ચેસ ઓલિમ્પિયાડનો ખિતાબ જીત્યો હતો. તેમણે હંગેરીના સર્વોચ્ચ નાગરિક સન્માનોમાં સામેલ ‘ઓર્ડર ઓફ સેન્ટ સ્ટીફન’થી પણ સન્માનિત કર્યાં હતાં. જુડિતે ભારતીય ખેલાડીઓની પ્રશંસા કરી હતી માર્ચ 2026માં એક ઇન્ટરવ્યૂમાં જુડિત પોલ્ગરે કહ્યું હતું કે આગામી ‘જુડિત પોલ્ગર’ ભારતમાંથી આવી શકે છે. તેમણે ભારતીય જુનિયર ખેલાડીઓ અને દેશમાં ઝડપથી વધી રહેલા ચેસના સ્તરની પણ પ્રશંસા કરી હતી. PM બોલ્યા- એવા રાષ્ટ્રપતિ જોઈએ જેના પર દરેક નાગરિક ગર્વ કરે પીટર મગ્યારએ કહ્યું કે આપણા દેશને એકતા, શાંતિ અને એવા રાષ્ટ્રપતિની જરૂર છે જેના પર દરેક હંગેરિયન ગર્વ કરી શકે. જુડિત પોલગરની ઓળખ રાજનીતિથી નહીં, પરંતુ તેમની પ્રતિભા, મહેનત અને ઈમાનદારીથી બની છે. મગ્યારએ કહ્યું કે જો જુડિત જવાબદારી સ્વીકારે છે, તો તે તેમના માટે સન્માનની વાત હશે.