ન્યુઝીલેન્ડે ટી-20 સીરીઝની ચોથી મેચમાં ભારતને 50 રનથી હરાવ્યું. વિશાખાપટ્ટનમમાં 216 રનના લક્ષ્યનો પીછો કરવા ઉતરેલી ભારતીય ટીમ 18.4 ઓવરમાં 165 રન બનાવીને ઓલઆઉટ થઈ ગઈ. આ હાર છતાં ભારત માટે સૌથી મોટો સકારાત્મક પાસું શિવમ દુબે રહ્યો. તેણે માત્ર 16 બોલમાં ફિફ્ટી ફટકારીને ટી-20 ઇન્ટરનેશનલમાં ભારત તરફથી ત્રીજી સૌથી ઝડપી ફિફ્ટીનો રેકોર્ડ પોતાના નામે કર્યો. ઇનિંગ્સના પહેલા જ બોલ પર તેણે 101 મીટર લાંબો છગ્ગો ફટકાર્યો. ફિલ્ડિંગમાં રિંકુ સિંહ છવાઈ ગયો. તેણે મેચમાં ચાર શાનદાર કેચ ઝડપીને ઇતિહાસ રચ્યો અને એક ઇનિંગ્સમાં ચાર કેચ કરનાર ભારતના બીજા આઉટફિલ્ડર બન્યો. ચોથા ટી-20ના ટોપ રેકોર્ડ્સ અને મોમેન્ટ્સ… 1. દુબેની ભારત માટે ત્રીજી સૌથી ઝડપી ફિફ્ટી
શિવમ દુબેએ ભારત માટે ત્રીજી સૌથી ઝડપી ટી-20 ફિફ્ટી ફટકારી. તેણે 15મા બોલ પર સિક્સ લગાવીને ફિફ્ટી પૂરી કરી. આ પહેલા આ જ સિરીઝમાં અભિષેક શર્માએ માત્ર 14 બોલમાં ફિફ્ટી ફટકારીને બીજી સૌથી ઝડપી ફિફ્ટીનો રેકોર્ડ બનાવ્યો હતો. ભારત માટે T20Iમાં સૌથી ઝડપી ફિફ્ટીનો રેકોર્ડ યુવરાજ સિંહના નામે છે, જેમણે 2007 ટી-20 વર્લ્ડ કપમાં ઇંગ્લેન્ડ સામે 12 બોલમાં ફિફ્ટી ફટકારી હતી. 2. હેનરી બીજા બોલર જેમણે સિરીઝમાં બંને ઓપનરોને પહેલી બોલ પર આઉટ કર્યા
મેટ હેનરી ટી-20 ઇન્ટરનેશનલ ઇતિહાસમાં બીજા એવા બોલર બની ગયા છે, જેમણે એક જ સિરીઝમાં બે વાર કોઈ ટીમના ઓપનરને ઇનિંગ્સના પહેલા બોલ પર આઉટ કર્યા. આ જ સિરીઝમાં હેનરીએ પહેલા ગુવાહાટીમાં સંજુ સેમસનને અને પછી વિશાખાપટ્ટનમમાં અભિષેક શર્માને પહેલી જ બોલ પર પેવેલિયન ભેગા કર્યા. આ પહેલાં આવું પરાક્રમ 2023માં નોર્ડિક T20 કપ દરમિયાન અબ્દુલ નાસિર બલૂચ (સ્વીડન) એ કર્યુ હતું. 3. ન્યુઝીલેન્ડનો ભારત સામે બીજો સૌથી મોટો T20 સ્કોર
ન્યુઝીલેન્ડે ભારત સામે T20માં પોતાનો બીજો સૌથી મોટો સ્કોર બનાવ્યો. ટીમે 215 રન બનાવ્યા. આ પહેલાં ન્યુઝીલેન્ડે વેલિંગ્ટનમાં 219 રન બનાવ્યા હતા.
4. 2022 પછી ભારત સામે પ્રથમ વખત 100+ ઓપનિંગ ભાગીદારી ટી-20માં ભારત સામે 2022 પછી પ્રથમ વખત 100થી વધુની ઓપનિંગ ભાગીદારી જોવા મળી. આ પહેલા આવો પરાક્રમ ટી-20 વર્લ્ડ કપ 2022ની સેમિફાઇનલમાં થયો હતો, જ્યારે જોસ બટલર અને એલેક્સ હેલ્સે એડિલેડમાં અણનમ 170 રનની ઓપનિંગ ભાગીદારી કરી હતી. જ્યારે ભારતની ધરતીની વાત કરીએ તો, ભારતમાં આ 2017 પછીની પ્રથમ 100+ ઓપનિંગ પાર્ટનરશિપ રહી. આ પહેલા રાજકોટમાં કોલિન મુનરો અને માર્ટિન ગુપ્ટિલે 105 રનની ઓપનિંગ ભાગીદારી કરી હતી. 5. સાયફર્ટે ટેલર અને વિલિયમસનની બરાબરી કરી ટીમ સાયફર્ટે ભારત સામે માત્ર 25 બોલમાં ફિફ્ટી ફટકારીને ન્યુઝીલેન્ડ માટે સૌથી ઝડપી 50 રન બનાવનાર બેટ્સમેનોની યાદીમાં સ્થાન મેળવી લીધું. આ સિદ્ધિ સાથે તેણે કેન વિલિયમસન અને રોસ ટેલરની બરાબરી કરી લીધી. આ પહેલા 2020માં ઓકલેન્ડમાં રમાયેલી T20 મેચમાં કેન વિલિયમસન અને રોસ ટેલરે પણ 25 બોલમાં પોતાની ફિફ્ટી પૂરી કરી હતી. 6. ભારત સામે ન્યુઝીલેન્ડનો હાઈએસ્ટ પાવરપ્લે ટોટલ
ભારત સામેની T20 મેચમાં ન્યુઝીલેન્ડે પાવરપ્લેમાં નવો રેકોર્ડ બનાવ્યો. ટીમે પ્રથમ 6 ઓવરમાં એકપણ વિકેટ ગુમાવ્યા વિના 71 રન બનાવ્યા, જે ભારત સામે ન્યુઝીલેન્ડનો અત્યાર સુધીનો સૌથી મોટો પાવરપ્લે સ્કોર છે. આ પહેલા આ રેકોર્ડ 2020માં ઓકલેન્ડમાં બનેલા 68/0ના નામે હતો. ખાસ વાત એ રહી કે ભારતની ધરતી પર આ પ્રદર્શન વધુ મોટું બન્યું, કારણ કે 71/0 ભારતમાં કોઈપણ ટીમનો ભારત સામેનો ત્રીજો સૌથી મોટો પાવરપ્લે ટોટલ છે. 7. રિંકુ એક ઇનિંગમાં ચાર કેચ પકડનાર બીજો ભારતીય T-20માં રિંકુ સિંહ એક જ ઇનિંગમાં ચાર કેચ કરનાર બીજો ભારતીય આઉટફિલ્ડર બન્યો. આ પહેલા આ પરાક્રમ અજિંક્ય રહાણેએ 2014 માં એજબેસ્ટનમાં ઇંગ્લેન્ડ સામે કર્યું હતું. હવે મોમેન્ટ્સ… 1. બુમરાહે સાયફર્ટનો કેચ છોડ્યો
ન્યુઝીલેન્ડની ઇનિંગ્સની પહેલી ઓવરના ત્રીજા બોલ પર ઓપનર ટિમ સાયફર્ટને જીવનદાન મળ્યું. અર્શદીપ સિંહના બોલ પર સાયફર્ટે ફ્લિક રમવાનો પ્રયાસ કર્યો, પરંતુ બોલ સ્વિંગ થઈને બેટની ટોપ એજ લઈ ગયો. શોર્ટ થર્ડ મેન પર ઉભેલા જસપ્રીત બુમરાહ પાછળની તરફ દોડ્યા અને બોલ સુધી પહોંચ્યા પણ ખરા, પરંતુ કેચ કરી શક્યા નહીં. બોલ તેમના હાથમાંથી સરકીને બાઉન્ડ્રી તરફ જતો રહ્યો. 2. હાર્દિકના ડાયરેક્ટ હિટથી કીવી કેપ્ટન રનઆઉટ 16.1 ઓવરમાં જસપ્રીત બુમરાહના બોલ પર મિચેલ સેન્ટનરે શોટ રમ્યો અને બોલ બહારની કિનારીને અડી શોર્ટ થર્ડ મેન તરફ ગયો. ત્યાં હાજર હાર્દિક પંડ્યાએ ચપળતા બતાવતા બોલ ઉઠાવ્યો અને વિલંબ કર્યા વિના બોલર તરફ સીધો થ્રો ફેંક્યો. સેન્ટનરે ડાઈવ લગાવી, પરંતુ ક્રીઝ સુધી પહોંચી શક્યો નહીં. હાર્દિક પંડ્યાના સચોટ ડાયરેક્ટ હિટથી કીવી કેપ્ટન રનઆઉટ થઈ ગયો. 3. અભિષેક પહેલા બોલ પર આઉટ, સૂર્યાનો કેચ છૂટ્યો મેચની શરૂઆત ભારત માટે ખરાબ રહી. મેટ હેનરીના ઓવરની પહેલી જ બોલ પર અભિષેક શર્મા આગળ આવીને મોટો શોટ રમવા ગયા, પરંતુ બેટનો બહારનો કિનારો લાગ્યો અને બોલ હવામાં બેકવર્ડ પોઈન્ટ તરફ જતો રહ્યો. ત્યાં ડીપમાંથી ઝડપથી આગળ આવતા કોનવેએ ડાઈવ મારીને શાનદાર કેચ પકડ્યો અને અભિષેક શર્મા ખાતું ખોલ્યા વિના પેવેલિયન પરત ફર્યો. ત્યારબાદ તે જ ઓવરના છેલ્લા બોલ પર કેપ્ટન સૂર્યકુમાર યાદવનો કેચ છૂટી ગયો. શોર્ટ ઓફ લેન્થ બોલ પર સૂર્યકુમારનો શોટ લીડિંગ એજ લઈને હવામાં ઉછળ્યો, મેટ હેનરીએ ફોલો-થ્રુમાં સ્લાઇડ કરતા કેચ કરવાનો પ્રયાસ કર્યો, પરંતુ બોલ તેમના હાથમાંથી બરાબર પહેલા જમીન પર પડી ગયો. જોકે, આગલી જ ઓવરમાં જેકબ ડફીએ તેમને પોતાની જ બોલ પર કેચ પકડીને પેવેલિયન ભેગા કરી દીધા. તેઓ માત્ર 8 રન જ બનાવી શક્યા. 4. શિવમ દુબેનો 101 મીટર લાંબો સિક્સ
8.5 ઓવરમાં સેન્ટનરની ધીમી, ફુલ લેન્થ બોલ પર શિવમ દુબેએ મોટો શોટ રમ્યો. બોલ બિલકુલ તેમના હિટિંગ ઝોનમાં હતો, દુબેએ હળવો શફલ કર્યો અને લોંગ ઓન ઉપર 101 મીટર લાંબો સિક્સ ફટકાર્યો. 5. દુબે રનઆઉટ થયો 15મી ઓવરના છેલ્લા બોલ પર શિવમ દુબે (65 રન) બનાવીને રનઆઉટ થયો. આ સાથે ભારતની છઠ્ઠી વિકેટ પડી. હર્ષિતે મેટ હેનરીના બોલ પર બોલરની દિશામાં રમ્યો. બોલ હેનરીના હાથને અડીને સ્ટમ્પ પર ગયો. અહીં દુબે ક્રીઝની બહાર હતો.