નેપાળના ગોરખા જિલ્લામાં રવિવારે સવારે બુઢી ગંડકી નદીમાં અચાનક પૂર આવવાથી અનેક ગામોને નુકસાન થયું છે. પૂરમાં અનેક ઘરો અને પુલો વહી ગયા. ચાર લોકો લાપતા છે. તેમની શોધખોળ કરવામાં આવી રહી છે. પૂરને કારણે 341 મેગાવોટના બુઢી ગંડકી હાઇડ્રોપાવર પ્રોજેક્ટનો બાંધકામ કેમ્પ અને કેટલાક સાધનો પણ વહી ગયા. પૂરનું પાણી સવારે આશરે 4 વાગ્યે વસાહતોમાં ઘૂસી ગયું, ત્યારબાદ લોકોને ઘર છોડીને સુરક્ષિત સ્થળોએ જવું પડ્યું. પ્રાથમિક માહિતી અનુસાર, ઊંચા પર્વતીય વિસ્તારમાં ભૂસ્ખલનને કારણે ચૂન્ચુબ્રી સ્યાર નદીનો માર્ગ બંધ થઈ ગયો હતો. તેના કારણે પાણી એકઠું થયું અને પછી અચાનક તેજ પ્રવાહ સાથે નીચે આવ્યું. રોઇટર્સના અહેવાલ મુજબ, 26 ઑગસ્ટે ભોટેકોશી અને ત્રિશૂલી નદીમાં આવેલા પૂરમાં 1455 લોકોનાં મોત થયાં હતાં. સાથે જ 5,285 લોકો હજુ પણ લાપતા છે. સરકારે જણાવ્યું કે સતત થઈ રહેલા ભૂસ્ખલનો વચ્ચે લાપતા લોકોની શોધખોળ ચાલુ છે. SMS મોકલીને લોકોને સુરક્ષિત સ્થળે જવાની સલાહ ગોરખા જિલ્લા પોલીસ કચેરીના ઇન્સ્પેક્ટર આકાશ કંડેલે જણાવ્યું કે પૂરનાં જોખમને ધ્યાનમાં રાખીને પ્રશાસને સિર્દીબાસ અને ધારચે ગ્રામિણ નગરપાલિકાના ખોર્લાબેસી, માછાખોલા, સોતી, અરખેત અને આરુઘાટમાં રહેતા લોકોને સુરક્ષિત સ્થળોએ જવાની સલાહ આપી છે. નેપાળના રાષ્ટ્રીય આપદા જોખમ ઘટાડા અને વ્યવસ્થાપન પ્રાધિકરણ (NDRRMA)ના મુખ્ય કાર્યકારી ડૉ. ધર્મરાજ ઉપ્રેતીએ જણાવ્યું કે ઉપરવાસના વિસ્તારમાંથી પૂરનું પાણી આરુઘાટ પહોંચવામાં લગભગ 3 કલાક લાગે છે. આથી નદીના નીચાણવાળા વિસ્તારોમાં રહેતા લોકોને સુરક્ષિત સ્થળોએ જવા માટે સમય મળી શકે છે. ઉપ્રેતીના જણાવ્યા મુજબ, પ્રશાસને લોકોને SMS મોકલીને ચેતવણી આપી છે. સિર્દીબાસ, જગત, યારી, તાતોપાની, સોતી અને આરુખોલા જેવા નદીકાંઠે વસેલા વિસ્તારોના લોકોને ખાસ સાવચેતી રાખવા જણાવાયું છે.