રમતગમત મંત્રાલયે બુધવારે સ્પષ્ટ કર્યું છે કે ભારત અને પાકિસ્તાન વચ્ચેના દ્વિપક્ષીય રમત સંબંધો સ્થગિત જ રહેશે. સરકારે એક સત્તાવાર મેમોરેન્ડમ બહાર પાડીને કહ્યું છે કે ભારતની રમતગમત નીતિ તેની રાજદ્વારી નીતિ અનુસાર જ ચાલશે. આ અંતર્ગત ભારતીય ટીમો બાઇલેટરલ સિરીઝ રમવા પાકિસ્તાન નહીં જાય અને પાકિસ્તાની ટીમને ભારતમાં રમવાની મંજૂરી પણ આપવામાં આવશે નહીં. જોકે, વર્લ્ડકપ કે ઓલિમ્પિક જેવી મલ્ટીલેટરલ ઇવેન્ટ્સમાં બંને દેશો એકબીજા સામે રમી શકશે. સ્પોર્ટ્સ ફેડરેશન અને IOAએ રજૂ કર્યું સર્ક્યુલર યુવા બાબતો અને રમતગમત મંત્રાલયે આ નિર્દેશ ભારતીય ઓલિમ્પિક સંઘ (IOA), ભારતીય રમતગમત પ્રાધિકરણ (SAI) અને તમામ નેશનલ સ્પોર્ટ્સ ફેડરેશનોને મોકલી આપ્યો છે. મંત્રાલયે સ્પષ્ટ કર્યું કે પાકિસ્તાનના મામલે ભારતનું વલણ બિલકુલ સ્પષ્ટ છે. આ નિર્ણય એવા સમયે આવ્યો છે જ્યારે 7 મેના રોજ ‘ઓપરેશન સિંદૂર’ની વર્ષગાંઠ છે, જે ગયા વર્ષે પહેલગામ આતંકી હુમલાના જવાબમાં શરૂ કરવામાં આવ્યું હતું. તે હુમલામાં 26 નાગરિકોના જીવ ગયા હતા. ક્રિકેટ પર સૌથી વધુ અસર, 2012થી નથી થઈ બાઇલેટરલ સિરીઝ સરકારના આ વલણની સૌથી વધુ અસર ક્રિકેટ પર પડી છે. ભારત અને પાકિસ્તાન વચ્ચે છેલ્લી દ્વિપક્ષીય શ્રેણી 2012-13માં થઈ હતી, જ્યારે પાકિસ્તાનની ટીમ ભારત આવી હતી. ત્યારથી બંને ટીમો ફક્ત એશિયા કપ અને ICC ટુર્નામેન્ટ્સમાં જ એકબીજા સામે આવી છે. તાજેતરમાં ચેમ્પિયન્સ ટ્રોફી 2025ને લઈને પણ ઘણી ચર્ચા હતી, પરંતુ ભારતના આ કડક વલણથી સ્પષ્ટ છે કે ટીમ ઇન્ડિયા સરહદ પાર જઈને રમવાના પક્ષમાં નથી. આંતરરાષ્ટ્રીય અધિકારીઓ માટે વિઝા નિયમો સરળ બન્યા ભારત પોતાને આંતરરાષ્ટ્રીય રમતગમત કાર્યક્રમો માટે એક મોટા સ્થળ તરીકે જોઈ રહ્યું છે. આને ધ્યાનમાં રાખીને સરકારે ખેલાડીઓ, ટીમના અધિકારીઓ અને ટેકનિકલ સ્ટાફ માટે વિઝા પ્રક્રિયાને સરળ બનાવવાનો નિર્ણય કર્યો છે. આંતરરાષ્ટ્રીય રમતગમત સંસ્થાઓના પદાધિકારીઓને તેમના કાર્યકાળ દરમિયાન 5 વર્ષ સુધીનો પ્રાયોરિટી મલ્ટી-એન્ટ્રી વિઝા આપવામાં આવશે. આ સાથે, આ સંસ્થાઓના વડાઓને ભારતની મુલાકાત દરમિયાન યોગ્ય પ્રોટોકોલ અને સન્માન આપવામાં આવશે.