મેસેજિંગ એપ વોટ્સએપે ભારત સહિત કેટલાક અન્ય દેશોમાં ઘણા યુઝર્સના એકાઉન્ટ્સ 24 કલાક માટે રિવ્યૂમાં મૂકી દીધા છે. આ દરમિયાન એપના તમામ મેસેજિંગ અને કોલિંગ ફીચર્સને બ્લોક કરી દેવામાં આવ્યા. જ્યારે પ્રભાવિત યુઝર્સે એપ ખોલી ત્યારે સ્ક્રીન પર મેસેજ લખેલો આવ્યો, ‘એકાઉન્ટ રિવ્યૂમાં છે. વિનંતી કરેલી તારીખ: 3 ઓગસ્ટ 2026. તમારી એકાઉન્ટ એક્ટિવિટી અને ડિવાઇસ ઇન્ફોની તપાસ કરવામાં આવી રહી છે જેથી એ સુનિશ્ચિત કરી શકાય કે તે અમારી સેવાની શરતોનું પાલન કરે છે.’ આ સમસ્યા પછી પ્રભાવિત યુઝર્સે સોશિયલ મીડિયા પર પોતાની ફરિયાદો નોંધાવી. આ મામલે કંપનીના પ્રવક્તાએ નિવેદન જારી કરીને સ્પષ્ટતા કરી. કહ્યું કે અમે અન્ય યુઝર્સની સુરક્ષા માટે આવું કરીએ છીએ. ક્યારેક ભૂલ થઈ જાય છે. તેને જલ્દી સુધારીશું. પ્રશ્ન-જવાબમાં સમગ્ર મામલાને સમજો… પ્રશ્ન 1. આ સમસ્યા ક્યારે શરૂ થઈ અને શું યુઝર્સને અગાઉથી જાણ કરવામાં આવી હતી? જવાબ: આ સમસ્યા ભારતીય સમય અનુસાર સોમવારે રાત્રે લગભગ 8 વાગ્યે સામે આવી. મેટાએ યુઝર્સને એકાઉન્ટ બ્લોક કરવા અથવા રિવ્યૂમાં મૂકતા પહેલા કોઈપણ પ્રકારની ચેતવણી કે નોટિફિકેશન આપ્યું ન હતું. પ્રશ્ન 2. સ્ક્રીન પર મેસેજ ઉપરાંત એપમાં બીજા કયા વિકલ્પો આપવામાં આવ્યા છે? જવાબ: ‘એકાઉન્ટ ઇન રિવ્યૂ’ વાળા મેસેજની બરાબર નીચે વોટ્સએપે બે વિકલ્પો આપ્યા છે. પહેલો વિકલ્પ ‘જવાબદારીપૂર્વક વોટ્સએપનો ઉપયોગ કેવી રીતે કરવો’ નામથી માર્ગદર્શન આપે છે અને બીજો વિકલ્પ ‘ચોરાયેલા ફોન અને એકાઉન્ટ વિશે’ માહિતી માટે છે. પ્રશ્ન 3. વોટ્સએપ કંપનીએ આ આખી ઘટના પર શું સ્પષ્ટતા કરી છે? જવાબ: આ મામલે વોટ્સએપના પ્રવક્તાએ કહ્યું, ‘અમે અમારી સેવાનો ખોટો ઉપયોગ કરનારાઓથી આગળ રહેવા માટે હંમેશા કામ કરીએ છીએ અને અન્ય યુઝર્સને સુરક્ષિત રાખવા માટે એકાઉન્ટ્સને બેન કરીએ છીએ. જોકે, ક્યારેક-ક્યારેક અમારાથી ભૂલ પણ થઈ જાય છે અને જ્યારે આવું થાય છે, ત્યારે અમે લોકોને પાછા ચેટિંગ પર લાવવા માટે તેને જેટલી જલદી બની શકે તેટલી ઠીક કરવાનો પ્રયાસ કરીએ છીએ.’ એકાઉન્ટ રિવ્યૂ પ્રક્રિયા પ્રશ્ન 4. પ્રભાવિત યુઝર્સનું સોશિયલ મીડિયા પર શું કહેવું છે? જવાબ: કોઈ કારણ વગર એકાઉન્ટ બ્લોક થવાથી પરેશાન યુઝર્સે X અને અન્ય પ્લેટફોર્મ્સ પર પોતાનો ગુસ્સો વ્યક્ત કર્યો. એક યુઝરે લખ્યું, ‘મારું વોટ્સએપ એકાઉન્ટ કોઈ સ્પષ્ટતા વગર ડિસેબલ કરી દેવામાં આવ્યું છે. મેં અપીલ સબમિટ કરી દીધી છે, પરંતુ સ્ક્રીન પર ફક્ત 24 કલાકનો મેસેજ દેખાઈ રહ્યો છે.’ પ્રશ્ન 5. શું આ ટેકનિકલ ઇશ્યૂથી લોકોના કામકાજ પર પણ અસર પડી છે? જવાબ: હા, સલોની નામની એક એક્સ યુઝરે પોસ્ટ કર્યું, “મારું વોટ્સએપ કોઈ પણ ચેતવણી વગર અચાનક ડિસેબલ થઈ ગયું. હું ફક્ત ઓફિશિયલ એપનો જ ઉપયોગ કરું છું અને મારું આખું કામ વોટ્સએપ પર જ નિર્ભર છે. આ બહુ જ અકારણ મુશ્કેલી છે.” પ્રશ્ન 6. જો તમારું એકાઉન્ટ પણ રિવ્યૂમાં જતું રહે, તો તમારે શું કરવું જોઈએ? જવાબ: જો તમારી સ્ક્રીન પર 24 કલાકનો સમીક્ષા મેસેજ દેખાઈ રહ્યો છે, તો તમારે કંપની તરફથી તપાસ પૂરી થવાની રાહ જોવી પડશે. આ ઉપરાંત, તમે સ્ક્રીન પર દેખાઈ રહેલા અપીલ બટન અથવા વોટ્સએપ સપોર્ટ પેજ પર જઈને તમારો પક્ષ રજૂ કરી શકો છો. જો તમે નિયમોનું ઉલ્લંઘન કર્યું નથી, તો એકાઉન્ટ 24 કલાકમાં આપમેળે રિસ્ટોર થઈ જશે.