આલિયા ભટ્ટ હાલમાં પોતાની કારકિર્દીના અત્યંત વ્યસ્ત અને રસપ્રદ તબક્કામાંથી પસાર થઈ રહી છે. એક પછી એક મોટા પ્રોજેક્ટ્સ વચ્ચે હવે તેના નામે વધુ એક સરપ્રાઈઝ જોડાઈ ગયું છે. સમાચાર છે કે તે કલ્ટ ક્લાસિક ફિલ્મ ‘તુમ્બાડ’ની સિક્વલ ‘તુમ્બાડ 2’માં ખાસ ભૂમિકા ભજવવા જઈ રહી છે. જોકે, આ રોલ કેમિયો હોવાનું કહેવાય છે, પરંતુ વાર્તામાં તેનું મહત્વ ઘણું મોટું માનવામાં આવે છે, કારણ કે તેમનું પાત્ર ફિલ્મના એક મહત્વપૂર્ણ વળાંક પર જોવા મળશે. આલિયાએ મુંબઈના મડ આઇલેન્ડમાં બે દિવસનું શૂટિંગ પૂરું કરી લીધું છે. ફિલ્મ સાથે સંકળાયેલા લોકોનું કહેવું છે કે મેકર્સને એક એવા ચહેરાની જરૂર હતી, જે ઓછા સ્ક્રીન ટાઈમમાં પણ વાર્તામાં ઊંડાણ અને રહસ્ય ઉમેરી શકે. આલિયા આ ભૂમિકા માટે એકદમ યોગ્ય માનવામાં આવી, કારણ કે તેમની સ્ક્રીન પ્રેઝન્સ મજબૂત છે અને તે નાના રોલમાં પણ મોટી અસર છોડવાની ક્ષમતા ધરાવે છે. આ જ કારણ છે કે તેમનો આ કેમિયો ‘તુમ્બાડ 2’ના નેરેટિવમાં ખાસ મહત્વ રાખશે. ‘લવ એન્ડ વોર’માં આલિયા પણ સૈનિકના રોલમાં છે ‘લવ એન્ડ વોર’માં આલિયા સાથે રણબીર કપૂર અને વિકી કૌશલ છે. સૂત્રો અનુસાર, આલિયા આ ફિલ્મમાં એક બહાદુર સૈનિક તરીકે જોવા મળશે. તેમના કરિયરમાં આ પહેલીવાર હશે જ્યારે તે યુદ્ધની પૃષ્ઠભૂમિવાળી ફિલ્મમાં આવો શક્તિશાળી કિરદાર ભજવશે. ફિલ્મનું શૂટિંગ હાલ મુંબઈમાં ચાલી રહ્યું છે, જ્યાં ભારતીય સેનાના વિવિધ વિભાગો, મેસ અને કલ્ચરલ એક્ટિવિટીઝને મોટા પાયે ફિલ્માવવામાં આવ્યા છે. ભણસાલી આ પ્રોજેક્ટને લઈને ખૂબ જ ગંભીર છે. એવું કહેવામાં આવી રહ્યું છે કે ‘લવ એન્ડ વોર’ની લંબાઈ પણ લગભગ સવા ત્રણ કલાક હોવાની શક્યતા છે. પહેલા આ ફિલ્મ માટે ઇટાલીમાં 45 દિવસનું એક ભવ્ય શૂટિંગ શેડ્યૂલ નક્કી કરવામાં આવ્યું હતું, પરંતુ બાદમાં લોજિસ્ટિક પડકારોને કારણે તેને રદ કરવું પડ્યું. ભણસાલીએ તેનો તોડ કાઢતા મુંબઈના ગોરેગાંવ સ્થિત રોયલ પામ્સ પાસે જ એક વિશાળ સેટ તૈયાર કરાવ્યો છે. ફિલ્મના ‘વોર’ વાળા બેકડ્રોપ માટે મધ્ય પ્રદેશના મ્હોઉ સ્થિત બ્રિટિશ કાળના આર્મી બેઝ કેમ્પની પણ પસંદગી કરવામાં આવી છે. ‘આલ્ફા’માં છે સ્પાય અવતાર, એક્શનમાં દેખાશે એક નવી સ્ટાઈલ ઉપરાંત આલિયાની ‘આલ્ફા’ પણ ચર્ચામાં છે, જેમાં તે એક સ્પાયના રોલમાં દેખાશે. આ માટે તેણે ખાસ ટ્રેનિંગ લીધી છે અને ઘણા એક્શન સિક્વન્સ પણ શૂટ કર્યા છે. ફિલ્મનું શૂટિંગ હવે અંતિમ તબક્કામાં છે અને આલિયા પોતાનો મુખ્ય ભાગ શૂટ કરી ચૂકી છે. ‘આલ્ફા’ના અનુભવે આલિયાને ‘લવ એન્ડ વોર’માં ઘણી મદદ કરી છે.